DANIEL 2 - Kathara Bible (BSI)

Nebuchadnezzarwui Mang

¹ Nebuchadnezzarna mungda kakhane kum, mang akha shimana, kala ningrākhaida mapivāpaithuwa.

² Chieina awungana mahei kathembing, laivā kathembing, khanong sākatheibing kala awor kathem Chaldeanaobingli mang chi hāngmi khavai saikorali hokhui ngasaka. Athum katonga awungawui mangāli anganinga.

³ Chieina awungana athumli hānga, “Ili mang akha shimana, kala chiwui kakhalat theikhangaiwui vang I wukkhanangshunhaira.”

⁴ Chieina Chaldeanaobingna hānga, “O awunga, okpeimeiranu! Nawui mang chi naraobingli kahāngmilu, chithākha ithumna kakhalat hāngmira.”

⁵ Awungana Chaldeanaobingli hānga, “Iwui tui hi makahatlakmana; nathumna iwui mang chi kala chiwui kakhalat mahāngmiakha nathumwui phasā rimkazamserhaora, kala shim katonga sākhaimiserhaora.

⁶ Kha nathumna mang chi hāngmishapakha kala khalatmishapakha, nathum iwui eina sāman kachungkha samphangra kala khayā kāngasakra. Chiwui vang eina mang kala chiwui kakhalat chi hāngmilu.”

⁷ Athumna kakhane sāda ngahānkāluishita, “Mang chi awungana kahāngmilu, chithākha chiwui kakhalat ithumna hāngmira.”

⁸ Awungana ngahānkai, “Nathumna atam shimān khavai kasā ina thei, khikhalajila iwui eina kashok tui chi makhangapatana kaji nathumna thei,

⁹ kalikha mang chi ili mahāngmiakha, nathumwui vang hukhum akha lei. Atamna khangachei makhuirāmiranglakha eina tangda kapiklaga minam khavai nathum ngasan kahaina. Chiwui vang eina iwui mang chi hānglu, chithākha nathumna chiwui kakhalat hāngmishapa da ina theira.”

¹⁰ Chaldeanaobingna awungali ngahānkai, “Awungawui kakaso hi sāmishapa okathuili mi akhala maleimana; kaja okathuili khangama, kapanga awunga kachikathāna laivā kathembingli, mahei kathembingli, lah Chaldeanaobingli hikathā tui mahānglakranga.

¹¹ Awungana khangahān tui hiya kasaka otna, kala hikathā hi phasā makhavaiya kameobing maningla khipākha matheimara.”

Varena Danielli Mangwui Kakhalat Hāngkhami

¹² Hiwui vang awunga malungvātnāhaida Babylonli khalei thangkhamabing saikora shaothatserhaolu da kasohaowa.

¹³ Chieina thangkhamabing saikorali shaothatserhaolu kaji athishurda Daniellonglila sāthat khavai khangarān sai.

¹⁴ Chieina Babylonli khalei thangkhamabingli shaothat khavai kazata awungawui shipai kathāna Ari-ochli, Danielna thangmeilak eina kala pinglak eina hānga;

¹⁵ “Khisāda awungana hiyākha sāshida hukhum tāhaokhala?” da Ari-ochli ngahāna, chieina ana maram chi Danielli hāngchithei.

¹⁶ Danielna awungawui ngalemli vāda, mang chi hāngmishap khavai atam kasha̱kha khamilu da apoi.

¹⁷ Danielna shimli ungda Hananiah, Mishael kala Azariah athumli shokta khalei saikora chi hānga,

¹⁸ kala Babylonli khalei thangkhamabingli ngasoda athumlila mashaothat khavai kazingramwui Varewui lukhamashan poda khangathuma tui chi phongmi khavai seihā sālu da hānga.

¹⁹ Kala Danielli māngli rāmahāmida khangathuma tui chi chitheimi. Chieina Danielna atungshongwui Vareli ningkashi mi.

²⁰ Danielna hānga: “Mashimānda Varewui mingli sochingranu, awor kala pangshapla awuisera.

²¹ Atam, zur-kan ana ngachei ngasaka, ana wungnaobingli khuishok khuizang sai; thangkhamabingli awor mi, kala theishingkakhuibingli kathem mi.

²² Kasaka kathuka tui ana phongmi, tangkhamangli khalei chila ana thei; kala awuili kahor lei.

²³ O Ishāvā ngarāwui Vare! Ina ningshida masot chigatli; kaja awor kala yāng nana ili mi, kala ithumna nali kapo chi nana ili theingasakhaira, kaja awungana ningkachāng chi nana ithumli chitheimihaira.”

Mangwui Kakhalat Hāngkachithei

²⁴ Chieina Babylonli khalei thangkhamabingli shaothat khavai kaso kahaia Ariochwuili Danielna vai, ana vāda hānga, “Babylonwui thangkhamabingli masāthatalu; ili awungawui mangāli thānvamilu, mangwui kakhalat chi ina awungali hāngmira.”

²⁵ Ari-ochna Danielli katotlak eina awungawui mangāli thānvai, kala hithāda hānga, “Judahwui eina raithā kahai athumwui ngachaiwui eina, awungawui mang khalatmikashapa ākha samphanghaira.”

²⁶ Awungana Belteshazzar kaho Danielli hānga, “Ili kashimān mang kala chiwui kakhalat nana hāngmishaprala?”

²⁷ Danielna awungali ngahānkai, “Awungana khangahān matheikharar chi hāngmikashap thangkhama, khanong, laivā kathem mi maleimana,

²⁸ kha ngathum kahai hāngmikashap Varivara akha kazingramli lei, kala ana Awunga Nebuchadnezzarli naoda rāshokki kaji chitheimihaira. Nana pida leilakha nawui kala mahākhami chi hina:

²⁹ “Awunga nana petli pida leilakha naoda khi shoknikhala kaji chi ningli rāza̱mi; kala ngathum kahai chitheikhame china nali khirāra̱ kaji rāphongmi.

³⁰ Kha iwui vanga, mi khangateili ina thangmeikhameiwui vang kathuka tui hi ili phongkhami maningmana, kha nawui mangwui kakhalat chi theikhavai kala nawui ningli kaphaning chi chitheimi khavaina.

³¹ “O awunga, nana mima̱ kahakva̱ akha thei. Mima̱ chi hingpit eina hakmahā kachangkhata, kala khangacheewui azak khuida nawui mangāli nganingsai.

³² Mima̱ chiwui akui sinā akachang eina sai, angun eina apāng lupāsāna, awuk eina khaishāng pithraina,

³³ aphei marina, kala pheikhum mari eina ngalei manāta.

³⁴ Nana yangda leilakha, mipāng mazangla sākhaikashoka lunggui akhana mari eina ngalei khamanāt pheikhum chili rāchakza̱da chi akha̱ sāthuihaowa;

³⁵ kaja, marila, ngaleila, pithraila, lupāsāla, kala sinā chila tāpha̱haida akha̱ sāthuiserhaowa, kala lumkachāng lanpumwui māhik thāda masina phanthuihaida amei-amā akhala matheiluithuwa. Kha mima̱li rāchakkaza̱ lungguinao chi hakkhamahā phungrei sāthuihaida okathui katonga pemhaowa.

³⁶ “Nawui mang chi china; ara awungali chiwui kakhalat ithumna hāngmira.

³⁷ O awunga, awungabingwui awunga, nali atungshongwui Varena wungram, pangshap kala tekhamatei mihaira,

³⁸ chili lāngda apam kachida khalei mila, ramsāla, yongkazat vānaola, saikorali khamunga sākhangasaka, na sināwui akui china.

³⁹ Nawui thili teokhamei awunga akha rāra; kala chiwui thili kakathuma pithraiwui wungram akhana okathui katongali mungra.

⁴⁰ Chiwui thili khamate wungram, mariwui pangshap kathā rāra, kaja marina ot saikorali sākhai kashap thāda saikora sākhaiserra.

⁴¹ Kala ngayarda mari, ngayarda hamkasāwui ngalei kathā khamanāt pheikhum eina pheimareng chithāda, wungram ngakai ngaroklaga mungra; kha nana marili leikhon manāt kahai kathei chi tākam eina kaikhava mariwui kapang thāda pangra.

⁴² Kala pheimareng mari eina ngalei khamanāt thāda wungram kaikha panglakra, kaikha ngazanlakra.

⁴³ Mari eina leikhon khamanāt thāda athum eina athum ngalā ngakhotta manātromhaora, kha mari eina ngalei makhamanui thāda athumla machāngarokmara.

⁴⁴ Chitharan atungshongwui Varena khangazipa wungram akha sākara, kala chiwui sākashap vākashap pangshap chi yur khangateili mahorsangmimara. China wungram saikora sākathānhaora, kala chiya leichingra;

⁴⁵ mipāng eina masākakhai lungguinaona marila, pithraila, lupāsāla, sinala sākazamser kahai nana kathei chithāda shokra. Hiwui thili khi rāra̱khala kaji reikhamatai Varena awungali chitheimihaira. Mang chi mangapatlakmara, kala kakhalat hi khamashungana.”

Danielli Awungana Sāman Khami

⁴⁶ Chieina awunga Nebuchadnezzarna Danielli kui mashunzangda khayākashi mi kala nganamkaphā otyur riktāda ali kachigat sākhavai kasoi.

⁴⁷ Awungana Danielli hānga, “Kachangkhat eina nawui Vare hiya varebingwui Varena kala awungabingwui Prohona, kala ngathum kahai phongkhamena; khikhalajila ngathum kahai hi nana phongmishaphaowa.”

⁴⁸ Chiwui thili awungana juilak kahai masot mida hakkhamahā sāmanla mi; kala Babylon ngaleiwui khamunga sāngasaka, kathembing saikorawui kathānala sāngasaka.

⁴⁹ Danielna kapo athishurda Shadrach, Mishach, kala Abednego athumli Babylon leikhaiwui yangkhame sāngasaka, kha Danielna awungawui hanga̱ shimli pama.