CHAPCHĀT 5 - Kathara Bible (BSI)

Lumashanmi khavai Kapo

¹ O Proho, ithumwuili shokkahai, kaphaningungmilu; yanglu, ithumwui maikashi hi katheimilu.

² Ithumwui shimluikat kha̱minaoli mikāhaira, ithumwui shimla zakmai makathei mili mihaira.

³ Ithum marānao, avāva̱ makhalei ngasāhaira; Ishāva̱ ngarā ra̱meinaobing thāhaira.

⁴ Ithumna mangda khalei tara̱wui vang aman miphalungra, ithumna samkaphang thingla lokhuiphalungra.

⁵ Ithumwui kahungli kashai parda panglāk eina kashama; ithum chothaira, ithumli khangasāmla mangasāmkhui ngasakmana.

⁶ Zāshap samphang khavai Egyptli kala Assyriali ithumwui pāngli mihaira.

⁷ Ishāvā ngarāna morei sai, athum maleiluimana; kala ithumna athumwui khayonkhamāng phunga.

⁸ Raonaobingna ithumwuitungli munga; athumwui pāng eina ithumli kanshok khavai khipākha maleimana.

⁹ Ithumwui manglā hamlaga kashakazā samphanga, lamhāngli raighai khaleiwui vang.

¹⁰ Chāmwui kachui kasā china, ithumwui ahui leirang kasā thāda sai.

¹¹ Zionli preiva̱̱ ngarāli; Judah keinungli kachingva̱ ngalānaobingli sākhamāngmihaowa.

¹² Wungnaobingli athumwui pāng eina kangyuihai, khararnaobingli khayākashila machitheimana.

¹³ Yaronnaobingli tandi eina mā rungngasaka; kala naoshinaobingna chakchāngchāng thing phungzata.

¹⁴ Kasarnaobing keinungwui ngavei eina thuihaira, yaronnaobingna laa masāluimana.

¹⁵ Ithumwui ningwui khamathānla ngasāmhaira; ithumwui pheichak kasā sikafa onhaira.

¹⁶ Kuihon ithumwui kuiwui eina tātunghaira; kakhanang ithumwui ngasāranu, kaja ithumna morei sāhaira!

¹⁷ Hiwui vang ithum ning kazāhaowa, hiwui vang ithumwui mikla māmāchahaira,

¹⁸ kaja Zion Kaphung ngachakting eina khaleiwui vang, ramfana chiwuitungli yaozata.

¹⁹ Kha O Proho, nava katang mavaila mungchinga; nawui wungpamkhong thot saikora vāshunga.

²⁰ Khisāthuda nana ithumli malaichaohaokhala? Khisāthuda nana ithumli hirankha horhaokhala?

²¹ Ithumli nakhalattali khuisangmiluilu, O Proho, chithāda ithumli khuisangluipaira! Achālakhawui thāda ithumwui atamla chitha ngasaklu.

²² Maningkha nana ithumli horchao kahaila? Nana ithumli malungvātlākhaola?