CHAPCHĀT 4 - Kathara Bible (BSI)

Jerusalem Konglui kahaiwui Thili

¹ Sināna kathāda yumsihao, sinā kachanga kathāda ngacheihao! Kathara ngalungbing chānrei haophok khavai kachida horkathānserhaira.

² Zionwui naomayarabing akachanga sinā thāda aman kasakabing, kathāda ngaleiham kasaawui them thada khuihao!

³ Kharāng eina tangda anaobingli na̱ shimanda nganaokhui, kha iwui mibingwui naongalāva̱ lamhāngwui ostrich thāda sāshilaka.

⁴ Na̱ mangda khalei naobingla ra̱kachangna akārakli male napshānhaira; naoshinaobingna zāt poi, kha khipākhana mamizāmana.

⁵ Morchātlak eina zākasābing ara shongfali thingakanda lei; sophayori eina khamathāthā sāri kasābing hotlāli ngaleopida lei.

⁶ Sodomli kashong kharāng pāng masāza̱la mikkhayipkhalungli kashimānli lāngmeida iwui mibingwui naongalāva̱li khamachinna hakmei.

⁷ Awui wungnaobing horamli tharmeisai, seina̱li charmei; athumwui phasā shamadruwui kachar lunghārli hormei, athumwui maipan hānshi kahai sapphire thai.

⁸ Ara athumwui mai hamakli zikmeihaira, shongfali athumwui azak mamachutkhuirarmana; athumwui ahuila ara̱kuili nganarshānhaida thing katheng thāhaira.

⁹ Chāmthit eina kathibingle raighai eina kathibing ringphāmei, luiwui athei-arai ningchāngchāngda khanangda ngairon eina khumthathaira.

¹⁰ Iwui mibingli rekakharek kharā tharān; ava̱ ngarāna kachichāwui khalumanao khalatta hangshai.

¹¹ Prohona awui malungkhavāt kāshunglak eina sāda, Zionli mei sa̱katā china shimphungabingla chuitup tāhaowa.

¹² Okathuiwui awungabingna mashitsangmana, lah apuk-apagawui mibingnala mashitsangmana, kaja yangkashena Jerusalemwui ngaveili zangshaprada.

¹³ Awui alungli khangarongwui ashee tākhangasaka marānbingwui morei, pāngmonbingwui khayonkhamāngwui vangna.

¹⁴ Athumna ngapeoda, chānreili yaozata; ashee eina sākhamānghaida khipānakha athumwui kashankachon masāza̱ngaimana.

¹⁵ “Thulu! Makathara!” da mibingna athumli kashama. “Thulu! Thulu! Masāza̱alu!” Chieina athum yāmkazata, yaokazata sāthuihaowa. yurbingwui alungli mibingna, “Athum ithumli mangayurpamluimara” da hāng ngaroka.

¹⁶ Proho akhalattana athumli yaokathān kahaina, ana khipālikha matheimiluimara; pāngmonbingli khayākashi maleiluimana; khararnaoli malumluimara.

¹⁷ Aremali ngachonmi khavai yangpamshonda ithumwui mik ngazanhaira; ithumna yangkapamli mangachonmikharar yur akhali yangpama.

¹⁸ Yangkashebingna ithumwui shongfalila mazatpai khavai ithumwui pheikār shurzata; ithumwui khangachang nganaihaira; ithumwui atamla shānphokhaira ithumwui khangachang rāhaira.

¹⁹ Kazingramli yongkazata khalāng sāshaili ithumli kakharombingna thākmei; athumna ithumli phungreili kharomkai, athumna lamhānglila ithumli rimpama.

²⁰ Prohona thao neomi kahaia, ithumwui nātangkhurwui eina kashok khaksui athumwui chomli sangmihaowa, “Awui khaya̱li yurbingwui alungli ithum okthuira” da ithumna kahānga chi.

²¹ Mathānlu, kala ringphalu, O Edomwui naongalāva̱, Uz ngaleili somkapama; kha nalila tengkot chi kānrāra; maripreihaida nakhalatta raihailaga mahonghat eina zatra.

²² O Zionwui naongalāva̱, nawui khayonkhamāngwui vang kashong khalāng kuphaira, ana nali maraithāluimara; kha O Edomwui naongalāva̱, nawui khayonkhamāngwui vang kashong lāngra, nawui morei ana phongshokmira.