CHĀNSAM 5 - Kathara Bible (BSI)

Phokaphāwui pongli Hāngkhamathin

¹ Inaomayara, iwui thangkhamei hi nganākhuilu, iwui theishingkakhuili nāshunglu;

² chi eina nana mashunmakhui theikhuishapra, kala namorchaina theithangkhamei mayonra.

³ Kaja kapākhayong sha̱naowui morchaili khuira̱ ngaya̱tai; kala awui tuimatui thaoli nganaimei;

⁴ kha naoda ava thingkhā thāda khai; zankhangasunga raighai thāda zana.

⁵ Apheina kathi pamli zata; awui pheikārna Kathewui ramwui shongpongli shurvai;

⁶ ana kharingawui apongli mazatmana, apong ma̱zatphaphada kali zatlikhala kaji ana matheimana.

⁷ Chieina ara, O naomayarabing, ili nganālu, kala ikhamorna kahāng tui hi eina mapākthuihaialu.

⁸ Shanao chiwui eina nawui apong katāvali hailu, kala awui shim khāmong ngalemli mavaalu;

⁹ maningakha nana nawui khayā kateili mihaipai kala nawui mirin atam lukhamashan makathei mili mihaipai;

¹⁰ makathei mina nawui yāng eina chipemkhuihaida, nawui chotchān yangkashebingwui vang ngasāhaipaishina;

¹¹ naoda naphasā, aphila kānhaida athitlam nana ringāda hāngra,

¹² “Kharākli ina kayākha ningkachaisākhala, kala hāngkhamachinli iningna kayākha yangkharingsakhala!

¹³ Chishutmebingwui tamkachithei ina makhuisangmana, lah ili hāngkachitheiabinglila manganāsangmana.

¹⁴ Yarui ashangva̱wui kakazip alungli I shimānchaoki jihairasai.”

¹⁵ Nawui tara̱hamwui eina manglu, nawui ra̱khongwui eina longkashoka tara̱ manglu.

¹⁶ Nawui ura̱ longphaphāda chanreili tara̱ longngasakrala?

¹⁷ Chi nawui vangmāng sāranu, kha̱mibingwui vang mangasaaranu.

¹⁸ Nawui ura̱ sokhami ngasāranu, na yāronlakhawui preiva̱li ningyang unglu;

¹⁹ seichuinao thāda leishiri kahai, chaonao thāda yangkhangai. Awui leikashina atam kachida nali ningyāng ungngasakchingranu, awui leikashili malungchāngchingranu.

²⁰ Inaomayara, khisāda nana kapākhayong sha̱naoli malungchāngra, kala makhangatunva̱li hungrei khuirakhala?

²¹ Kaja miwui shongpong chi Prohowui miktāli lei, kala ana awui shongfa saikora yangda lei.

²² Makaphā miwui khayonkhamāngna ali khalen sanga, kala awui morei kasālungli ali mana.

²³ Hāngkachithei khavātwui vang a thi, kala awui mangkhama̱wui vang a shimānhaowa.