CHĀNSAM 31 - Kathara Bible (BSI)

Awungali Hāngkachithei

¹ Ava̱va̱na tamkachithei, Massawui awunga Lemuelwui tui:

² Khikhala, inaomayara? Khikhala, iwui naopamwui inaomayara? Khikhala, iwui tuingashit inaomayara?

³ Nawui yāng sha̱naobingli mamihaialu, awungabingli shimān khangasakbingwui apongli mazatalu.

⁴ Awungabingwui vang maningmana, O Lemuel, zam khamang hi awungabingwui ot maningmana, lah zamshei ningkachāng hi khamungabingwui ot maningmana;

⁵ manglaga hukhum tāmikahai tui chi malaihailaga, kakhanangbingwui mashun masho-ngacheimihaipaishina.

⁶ Thiuki kajibingli zamshei shimanlu, kala ningchotlak kahaibingli drakhāra̱ shimanlu;

⁷ manglaga athumwui kachām-khangai malaihaoranu, kala athumwui sipkasā maphaningluiranu.

⁸ Khak khangasha̱bingwui vang matuimilu, mikyan mayangsangmila horkahaibing chiwui mashunwui vang.

⁹ Nakhamor makāda khamashung eina bichar sālu, khavāta kachāmabingwui mashun yangmilu.

Sākashapa preiva̱

¹⁰ Kaphā preiva̱ khipāna phākhuishapra? Aman kasaka chāra̱-chāsānlila ana aman sakmei.

¹¹ Agaharana ali ning tongchaowa, kala ana mavātlakla katong samphanga.

¹² Awui mirin peida gaharali kaphā samichinga, makaphā masālakmana.

¹³ Ana sahā kala khamanaka tāwon kachon phākhuida sāngairereo kahai pāng eina ot sai.

¹⁴ Ava leihkhalonawui jahas thāda, apam katāva̱wui eina kashakazā khuiunga.

¹⁵ Ana kazing mathangranglakha ngakarthuida, awui shimkhurwui kashakazā ngarānmi, kala rao sha̱naobingna sākhavai athumwui ot ngayarmi.

¹⁶ Ana shimlui machuklaga lokhui; apāngwui eina samkaphang athei chieina drakhā yāmgui vāsanga.

¹⁷ Kashānli yang eina shānneira̱ neiya kala pāngtheili yāng kāngasaka.

¹⁸ Awui leihkhayor ot kānkhanā thei. Awui thaomei ngayā mamitmana.

¹⁹ Apāng eina tareng singa, kala shirei khavai chi apāng eina singa.

²⁰ Kachāmabingli pāng tonga, kala khavātabingli awui pāng vāshunga.

²¹ Ashi shimkhurwui vang phāmli mangacheemana, kaja awui shimkhur saikora hungping kahai kachon ngavaiya.

²² Akhalattawui ngavai khavai kachon sākhui; awui kachonva hungrisi khamanakana.

²³ Kha̱wui khararnaobingli ngasoda ngaveili kapam tharan, agaharali mina theimi.

²⁴ Ana khamanaka kachon raklaga yora; leihkhayornaoli shānneira̱ yorsanga.

²⁵ Pangshap kala khayākakā chi awui sārina, kala naodawui vang ana ringphai.

²⁶ Akhamorwui eina thangkhamei tui matui, kala amaleli lumashankatheiwui tuimānga.

²⁷ Shimkhurwui pongli khamathāmāng ngarāna, ngachāng makakāwui zāt mazāmana.

²⁸ Naongarāna sokhamiva̱ hoi; agaharanala ali masot mida hānga:

²⁹ “Sha̱nao kachungkhana mathālak kahai ot sai, kha nawuina athum saikorawuili mataimeiya.”

³⁰ Yangkhangai hi kapiklaka, khamathā aremana, kha Proholi khangachee sha̱naoli songayiya.

³¹ Awui pāng eina kashok athei ali milu; kala ngaveili awui otsakna ali soranu.