CHĀNSAM 30 - Kathara Bible (BSI)

Agurwui Tui

¹ Massali khalei Jakehwui naomayara Agurwui tuina. Mi china Ithi-elli hānga, Ithi-el eina Ucalli:

² Mi akha khangasā kachangkhat eina I mangma̱nāhaira. Mi akhawui theishingkakhui iwuili maleimana.

³ Thangkhamei ina matamkhuimana, Katharapāwui ponglila I matheithangmeimana.

⁴ Khipāna kazingramli kālaga tunghaira? Khipāna masi apāng eina ngashumkhuihaira? Khipāna kachon eina tara̱ romkhuihaira? Khipāna okathui achikun peida sākhui? Awui ming khipa ho, anao mayarawui ming khi ho? Nana theilaka!

⁵ Varewui tui kachiva̱ khamashungnada theikhui; ana ali khangayinbingwui chāngvei sami.

⁶ Awui tuili malāngsangalu, ana nali kaharpaishina kala nali kakapikna chipaishina.

⁷ Ina nali ot khani poli; I mathiranglakha ngga majimialu:

⁸ Khangui eina kakapik iwui eina katāva̱li khuithuimihaolu; ili kachām nilala kashāng nilala mamialu; iwui vang zāvaishap kashakazā ili mizālu,

⁹ chi maningakha I thohaida nali malaihaipaishina, kala “Proho khipākhala?” da hāngpaishina, maningkha I chāmhaida lihaipai, kala iwui Varewui ming makhao ngasakpai.

¹⁰ Raoli akhavāwui mangāli mamashātalu, ana nali khonshida khayon mipaishina.

¹¹ Avāva̱ ngarāli khonkashe mi kala ava̱va̱ ngarāli makaso mi lei.

¹² Khalattava tharzārihaiya da khuihailaga, athumwui thuikhanāmva masākhamathā mi lei.

¹³ Mi kaikhava mikyan lāngsolaka, mikkor kayākha juida yangkākhala!

¹⁴ Kachāmabingli okathuiwui eina, khavātabingli miwui alungwui eina shaikhavai raighai katha ahā, ghainao katha ahā kakā mi lei.

¹⁵ Mahutwui naongalāva̱ khani lei, “Milu, milu” da anina poi. Ningyang maungphut kaji kathum lei; matina “Shaphaira” da mahānglakmana.

¹⁶ Kazeiram, nao kashumva̱, ra̱changching kaja okathui, kala “Shaphaira” da mahānglak kaje mei.

¹⁷ Avāva̱li mana̱kashe, ava̱va̱li khayā makashiawui mik chi tampākwui hangkhāna mara̱shokmihaida lāngjāna shaihaora.

¹⁸ Iwui vang otyur kathum hi matakhakhainai, mati ina matheirarmana:

¹⁹ kazingli yongkazat khalāngwui apong, lungkaili khalei phara̱wui apong, hakkhamahā shamadruli huikazat marikhongwui apong, kala mayarnao akha eina sha̱nao akha khangasowui apong.

²⁰ Hi shāmkasā sha̱naowui apongna: ana zālaga, khamor mithailaga “I khayon masāhaimana” da hānga.

²¹ Ot kathumwui azingli okathui nganuka; matiwui azingli hi maphungrarmana:

²² raonaona awunga khangasā tharan, kala mangkhama̱na kashakazā katho-kachir tharan;

²³ chinkhamahai sha̱naona gahara samkaphang tharan; kala raopāva̱na akhavaiva̱ khangasā tharan.

²⁴ Okathuili kateo ot mati lei, kha athum thangmeishuna;

²⁵ zāling hi kapanga yur maningmana, kha athumna lumkachāng athumwui kashakazā ngarānsanga;

²⁶ sākharei kapinga yur maningmana, kha lungkaili athip sai;

²⁷ khaohwui awunga mangavāmana, kha asur eina ngawokzata;

²⁸ chirang nathumna pāng eina tukkhuishapa, kha awungawui dolanli pama.

²⁹ Otyur kathumwui kazat yangngailaka, matina ngamlak eina kārzata:

³⁰ sāwui ngachaili pangmeikap kaje kazingkha̱ khipālikha makapeikhaunga;

³¹ yokyaksak kahai harvā, mevā, kala awungana awui mibingwui mangāli kazat.

³² Mangma̱da nakhalatta sosaakha, lah makaphā ning phaningsaakha khamorli napāng matamlu.

³³ Seina̱ shireilaga makhan shoka, nātang shireilaga ashee shoka, kala malungkhavāt eina khanganang shoka.