CHĀNSAM 29 - Kathara Bible (BSI)

¹ Hāngmachinchinglala manganākasang mi chi, kashuirak eina ngapokhaida masākhuiluipaimara.

² Khangarong mina pangshap kasing tharan mibing mathāna, kha makhayā mina khamung tharan mibing ringngai.

³ Thangkhameili leikashi naomayarana avāva̱li mathān ngasaka, kha khayorva̱li khangayur mina awui lan sāshimāna.

⁴ Mashun eina awungana ngalei chingrihai ngasaka; kha pheizā khuikazā mina chi shimān ngasaka.

⁵ Khongnainaoli sotkhamasaoa che apheili khalen kasangna.

⁶ Makaphā mina awui chonkhamakān khalenli manna, kha khangarong mina laa sāda mathāna.

⁷ Khangarong mina kachāmawui mashun thei; makhayā mina chikathā theithangkhamei maleimana.

⁸ Mashātkazar mina keinung sa̱tai, kha thangkhamana malungkhavāt ngalanthui ngasaka.

⁹ Thangkhamei mina mangkhama̱ali tui ngaphatakha, mangkhama̱ana thurda mana̱ya, kala va̱ri kahai maleimana.

¹⁰ Ashee ra̱kachanga mina shāt makakā mili yangkharinga, kala makhayā mina awui manglā khuikhavai sai.

¹¹ Mangkhama̱ana awui malungkhavāt kashokahok tai, kha thangkhamei mina kasaikha thumhai.

¹² Khamungana khangui tui khuisangakha, awui otva̱bingla makhayā sāthura.

¹³ Kachāma eina rekakhareka samphangruma; khaninili Prohona mikli kahor mi.

¹⁴ Kachāmali awungana mashun bichar sāmiakha, awui wungpamkhong mashimānla leichingra.

¹⁵ Lijei eina khamachina thangmei ngasaka; kha makhamachin naona ava̱va̱li khayak ngasaka.

¹⁶ Makhayaana pangshap kasing tharan, chonkhamakān mataisanga; kha khangarongna athumwui kashimān yangra.

¹⁷ Nanaoli rāklu, nali ana ngasāmkhui ngasakra; ana naningli mathān ngasakra.

¹⁸ Marānkhami makhaleipamli mibingna khangarin maleimana, kha ain khamayon mi chi sokhamina.

¹⁹ Tuina da chimāng eina raoli mamachinpaimana, kaja ana theikhuihailala, mahensangmara.

²⁰ Machukmajala totot matuikashoka mi katheila? Aliva mangkhama̱li kachihāna kachangmei.

²¹ Nganuilakhawui eina lumkā kahai rao china naoda awui shimlui khuihairasāra.

²² Malungvātkazar mina nganang ngasaka, malungthuikazar mina khangui khalāng shok ngasaka.

²³ Langkasona ali maishi ngasakra, kha ningngai ngahuiri kahai mina maikhayā samphangra.

²⁴ Khalewui angasotana akhalattawui rinli yangkharinga, khonkashi chi ana shai, kha mahāngphatmana.

²⁵ Miwui khangacheena khalen sanga, kha Proholi khangachee mi khikha mathāmana.

²⁶ Kachungkhana khamungawui ngahānkhangai phai, kha Prohowui eina mina mashun samphanga.

²⁷ Makhamashung mi hi khangarongawui vang ningkakachai otna, kha mashun apongli kazat mi hi makhayāwui yangkakharing otna.