CHĀNSAM 28 - Kathara Bible (BSI)

Makhayā eina Khangaronga

¹ Khipānakha makharomlala makhayā mina yāmzata, kha khangarongbingva kazingkha̱ thāda malung pinga.

² Ngalei akha rotmarāt kahai tharan khamunga kachungkha shoka; kha theishingkakhui eina theithangkhamei miva chingri eina okthuivāshumra.

³ Kachāmana kachāmali rekakharek hi kazingna theishirai tāktāmiser kahai kathāna.

⁴ Ain horkahai mina makhayā mili masot mi, kha ain khamayonbingna athumli mamayāmana.

⁵ Makaphā mina mashun matheithangmeimana, kha Proholi kaphā mibingna chi theishingkhui.

⁶ Shānglaga apong masho ngacheida kazatle ningsāngazipta kazata kachāma phāmei.

⁷ Ain khamayona chi thangkhama naomayarana, kha morkahākli khangaso china avāva̱li maishi ngasaka.

⁸ Awui lan atar eina chungsang khangasaka kala mataisang khangasaka chipāwui lan kachāmali lukhamashan katheia awui vang kazipmi kahaina.

⁹ Mi akhana ain manganāsangla ngareithuihaikha, awui seihā kasā eina tangdala ningkakachai otna.

¹⁰ Khangaronga mili makapha apongli thānkhangui mi chi awui chomli khalatta tāzangra; kha shāt makakā mina khamathā shimlui khuira.

¹¹ Kashānga mina a khalatta thangmeiya da phaninga, kha theishingkakhui kachāma china ali phāshokra.

¹² Khangarong mina khayui tharan, mi saikorana lumlao sai; kha makhayā mina reikasang tharan, mibingna athum khalatta yāmngathuma.

¹³ Khalattawui morei ngathum kahai mina mamataisangngayaomana, kha hāngphatta chiho kahaibingna lukhamashan samphanga.

¹⁴ Proholi ngacheeching kaji mi sokhamina; kha wuklung khamakang mina kakhanangli tāzangra.

¹⁵ Kazingkha̱ kakhangang thāda, singomna kakharom thāda, makhayā awungana kachāmabingli chithāda sai.

¹⁶ Theishingkakhui makhavai khamunga chi sākashe rekakharekana; kha makhamashung eina tongkazāli ningkakachai mina sāngmeida okpeira.

¹⁷ Mi akhana khangateili ashee tāngasakakha, mathiranglakha eina tangda yāmkazata ngasāranu; ali khipānakhala mangachonmiaranu.

¹⁸ Ningsāngazipta kazata mili kanmira, kha masho ngachei khangasaka mi chomli tāzangra.

¹⁹ Luikhavā mina kashakazā kachungkha samphangra, kha masā khavai phākazata mi chiya chāmkhamatai samphangra.

²⁰ Ningtongda shitkasang mili sokhamina pemtinghaora, kha thākta shāngkhangai mi chili kashong malāngla machihomara.

²¹ Michang kasā maphāmana; kha zāt ngahomkhawui vang mina khalāng ot sai.

²² Wokhari mina lanli kharoma, kala khavāt kaho awuitungli rāra kaji matheimana.

²³ Sotkhamasaoli lāngda hāngkhamachinna naoda lumkāmei.

²⁴ Ava̱ maningakha avāva̱wui eina leekhuilaga “Hi chonkhamakān maningmana” kaji mi chi shimān khangasaka miwui khavākna.

²⁵ Kākharam mina nganang ngasaka, kha Proholi shitkasang mili shāngsang ngasakra.

²⁶ Khalattawui ningli shitkasang mi chi mangkhama̱na, kha thangkhamei eina kazat mili kanshokmira.

²⁷ Kachāmali khamibing chi mavātmara, mikning kahaibing khonkashi kachungkha samphangra.

²⁸ Makhayā mina reikasang tharan mibingna athum khalatta yāmngathuma; kha athum shimān kahai tharan, khangarongana mataisanga.