CHĀNSAM 27 - Kathara Bible (BSI)

¹ Akhamawui vang malāngsoalu, kaja zimiksho china khi khuirārakhala da na matheimana.

² Kateina nali soranu, nakhalattawui khamor eina mahāngalu; makathei mina hāngranu, namorchai eina mahāngalu.

³ Ngalung ritlaka, situi khāngla makāmana; kha mangkhama̱ana khareo khanini hili ritmei.

⁴ Malungkathui sāshilaka, malungkhavāt hakmahālaka; kha yuikashili khipāna nganingshaprakhala?

⁵ Ngathumda leikashilia phongda khamachin phāmei.

⁶ Ngasotnaowui eina khamā za̱lala leikashina; yangkashewui maya̱kakhui mithitkha̱na.

⁷ Sānkahai mina khuira̱ ningkachai, kha thaida khalei mile kakhā ot saikora shimserhaowa.

⁸ Shimwui eina thuikahai mi che, athipwui eina māngthui kahai vānao kathāna.

⁹ Thao eina nganamkaphā otna ning mathān ngasaka, kha rotkhamarātna manglā sākhai.

¹⁰ Nawui ngasota, kala navāwui ngasotali mahorhailakalu; kala nawui kalāshāt atamli nachināwui shimli mazangalu. Tāda khalei achināli nganaida khalei khongnai phāmei.

¹¹ Inaomayara, thangmeimeilu, kala ining mathān ngasaklu, ili kakharar mili ina ngahānkāpai khavai.

¹² Thangkhama mina kalākashi theida akhalatta yāmngathuma; kha ningkapaina ningpai eina chota.

¹³ Kha̱miwui vang nganingkhami tharan awui kachon akha khuilu, kala makatheia miwui vang nganingkhami tharan awui eina khangashit khuihailu.

¹⁴ Ngathorthakva ngakarthuida khongnainaoli panglāk eina vaoda sokhami chi khonkashina da shānkhuira.

¹⁵ Kazing rothang tara̱ ngayishon kaje eina nganangshon kaje sha̱nao ngaraichai,

¹⁶ sha̱nao chili kakhām chi masili kakhāmna, lah awui yapāng eina thao yonkakhui kathana.

¹⁷ Marili marina zanngasaka, kala mi akhali khangatei mi akhana zanngasaka.

¹⁸ Khaorārong khamayon china chiwui athei kashai samphanga, akhavāli mayonkapama china maikhayā samphanga.

¹⁹ Tara̱lungli khalatta mai kathei thāda, mi chiwui ningna mi chi theikhuipai.

²⁰ Kathewui ram eina Abaddonna ningyāng khaung masamphanglakmana, kala miwui mikna ningyāngkhaung mavailakmana.

²¹ Khāng lupāsāwui vāngna, sharkha̱ sināwui vāngna, mili awui kaso eina theikhui.

²² Mangkhama̱ali mā kharung thāda runglala awui mangkhama̱ otsak awui eina mathuilakmara.

²³ Nawui seihom theikazazakta nawui yao ashangva̱li yangpamlu;

²⁴ kaja kashāng chi chithāching majimana; kala kuihon thot saikorali rungchingla?

²⁵ Khawo thihaida kadhar kashon tharan, kala phungrei thingnā timfa kahai tharan,

²⁶ yaonaobingna nawui ngavai khavai kashankachon mira, mewui eina luiman samphangra;

²⁷ zāshap mewui ana̱ eina samphangra, nashi shimkhur zākhavai, kala napreiva̱ ngarāli uikhavai.