CHĀNSAM 26 - Kathara Bible (BSI)

¹ Lumkachāng horam kathak lah māhāli kazingkharo thāda, khayākakā hi mangkhama̱wui vang matik machāmana.

² Konghi ngashingkazat thāda, yāngyao yongkazat thāda, kashong maleila khonkashi matāmana.

³ Sajei siguiwui vang, nārenra̱ gadhāwui vang, kala lijei mangkhama̱ khumkhorwui vāngna.

⁴ Mangkhama̱li awui mangkhama̱ thāda mangahānkālu, na khalattala a thāhaipaishina.

⁵ Mangkhama̱ali awui mangkhama̱ thāda ngahānkaakha, a khalatta thangmeiya da phaningra.

⁶ Mangkhama̱a akhali pao kachiphun khalatta phei katathaida khangashao samphang khavaina.

⁷ Mangkhama̱ miwui chānsam tui phei katekawui phei kānkhanā maleila hokkathāng kathāna.

⁸ Mangkhama̱ mili khayākashi khami hiya kachākli thailungthei khalapshān kahai kathāna.

⁹ Mangkhama̱bingwui khamor chānsamva khamarip miwui pāngli ka̱shāt kazang kathāna.

¹⁰ Mangkhama̱a kala maripkazāra mili ngalang phākasang hiya, malā kakāpana mi kachiva̱li kapphāphā kaji kathāna.

¹¹ Malotā kahai fana ungzāluishit kaji thāda mangkhama̱a china mangkhama̱ otsak latlui latluida sai.

¹² khalattawui thangkhama mina da kaphaning mi nana katheila? Chikathā miwui vanga mangkhama̱awui kachihān kachangmei.

¹³ Chāngshena, “Shongfali kazingkha̱ lei, chānreili kazingkha̱ lei” da hānga.

¹⁴ Khāmongna chiwui kābijā eina khanganing thāda, chāngshela awui pettungli chithāda nganinga.

¹⁵ Chāngshena khongpheili zangpara; khamorli kāsang khavai chāngnāya.

¹⁶ Horzakta ngahānkākathei mi shinili, chāngshena a khalattawui ningli a thangmeimeiya da phaninga.

¹⁷ Miwui kakhararli awui thāda zangphāphā kaje mi chiya, shongfali zatkasā fa khanāli yonkakhui kathāna.

¹⁸ Kapā mina meira̱hun, malā kala thikapai ot eina herkhanganao kathā,

¹⁹ mi chi awui khongnaili kapiklaga, “Ina ngashānkasāna” da kahāng chikathāna.

²⁰ Thing yumhaiakha mei mitkahai thāda, kasupta khamatui mi makhalei chile kahar khangarok vānhaowa.

²¹ Meithāna mahaili, meiwonna thingli kachui thāda, khararkazara mina chithāda nganang khavai thotsanga.

²² Kasupta khamatui tuihan zākapha zāt thai, chibing chi phasā alung zangshunga.

²³ Makaphā ningwui tāngpat kahai morchai ngaleiham ashamli ari neokahai thai.

²⁴ Mili yangkakharingna amorchaili hāngphaneplaga awui ningli kakapik phaningzata.

²⁵ Ana leishilak eina kahāng tharan ali mashitsangalu, kaja awui ningli ningkakachai shini lei;

²⁶ phākhaningda yangkakharing thumhailala, awui makhayā otsak yarui mangāli phongshokra.

²⁷ Chom kachuiana chili tāzangra, ngalung kashireoawui khumkhorli lungguina ungshireororra.

²⁸ Kakapika malena awui shaili yangkharinga, kala sotmasaokathei khamorna shimānkhavai sai.