CHĀNSAM 25 - Kathara Bible (BSI)

Solomonwui Chānsam Katei

¹ Hibing hila Judahwui awunga Hezekiahwui mibingna namkakhuia Solomonwui chānsambingna.

² Khangathum hi Varewui tekhamateina, kha awungabingwui tekhamateiva chi phāshok khavaina.

³ Kazingramwui kajuiyākha, kala okathuiwui kathukrankha thāda awungabingwui ning maphākhuirarmana

⁴ Lupāsāwui eina maripai khuishokhaiakha, mari kasaana ham sākhavai asa samphanga;

⁵ makhayā chi awunga khalei chiwui eina khuithuihaolu, chieina awui wungpamkhong khamashung khangarong eina sākāra.

⁶ Awungawui mangāli na khalatta makhāngchikatalu, khangamawui ngalemlila manganinglu;

⁷ kaja wungnaowui mangāli maishiki kajiwui vanga, “Hili rālu,” da hokakhuina phāmei. Namikna theikahai chi,

⁸ bichar shimli totot eina makhuirālu, kaja nawui khongnaina nali maishi khangasak tharan na naoda khi sārakhala?

⁹ Nawui tuingaphun nakhongnaili na khalatta ngayātkhuilu, kala mi kateiwui khangathum tui maphongmiphāphālu;

¹⁰ maningakha kashā mina nawuitungli kakhayak khuirāpaishina, kala nawui aming zakkashi katang mavaimara.

¹¹ Tuiyar chālak eina khamatui, lupāsāli sināwui theithukthei yeksang kahai kathāna.

¹² Nganākasangali thangkhamei tui hāngkachithei, sināwui khutop lah sināwui ngachān sāri kathāna.

¹³ Ningtongda shitsangkapai paome hiya kachihopa chiwui vang, mahā kachāngwui khamakui horam kathāna, akhavāwui manglā ringphā ngasaka.

¹⁴ Khikha mamilaga lemmet khami tākam eina langkaso mi chi zingrot makazang muiyā eina masi kathāna.

¹⁵ Ningzinghāringda khamungalila suikhuipai, kala kashima malena ara̱ sātekra.

¹⁶ Nana khuira̱ samphangakha, nawui kashap chimāng manglu, sānhaida malopaishina.

¹⁷ Nawui khongnaiwui shimli naphei mavākārsangchingalu, ana nali sānhaida yangkharingpaishina.

¹⁸ Khongnaiwuitungli makhamashung shākhi kasā mi chi raizaithing lah, raighai lah kazana malāthing kathāna.

¹⁹ Rotkhamarāt atamli shitkasang makhalei mili kachihān, ahā kashui lah phei nganaikathui kathāna.

²⁰ Wukkakhanangali laa sākasanga mi chi, sikachāng kachon raimi kahai kathāna, khamāli drakhāra̱ kathur kasang kathāna.

²¹ Nawui yangkashena thaiakha, ali zāt mizālu; kala ana ra̱changakha, ali mangkhavai tara̱ milu;

²² kaja athumwui kuitungli nana meithā parkahaina, kala Prohona nali sāman mira.

²³ Atungshongwui masina zingrot khuirai; kala mashātkathei malena thurshi eina yanga.

²⁴ Tui shokkazar sha̱naoli ngasokapamle, shimtung chithek akhali ngateikapam phāmei.

²⁵ Ngalei katāva̱wui eina khamathā pao samkaphang hi, ra̱kachanga mina khamakui tara̱ khamang kathāna.

²⁶ Khangarong mina makhayāli mayākhami hiya, makhuipit kahai ura̱ maningkha sāmakhao kahai tara̱ kathāna.

²⁷ Khuira̱ tarākha kazā maphāmana, chieina sotkhamasao tui machungnālu.

²⁸ khalatta mangarinkathei mi hiya, keinungli sākhaizanglaga phākho maleila haikahai kathāna.