CHĀNSAM 23 - Kathara Bible (BSI)

¹ Khamunga akhali phazā ngarum khavai pamkazang tharan, namangāli khi leikhala da yangkazaklu;

² na morkahāka mina jiakha nakharokli khainao tosanghailu.

³ Awui shaikaphā zākaphā chi maningchāngalu, kaja chibing chiya phākakhaning kashakazāmānga.

⁴ Lan chungda samphang khavai ngalang mazarlu, aya tungda sālu.

⁵ Namikna chi theikhaleoda chi thuihaora; kashuirak angachāng kālaga khalāngwui thāda kazingram yongkāhaora.

⁶ Urkashe miwui zāt mazaalu; awui zākaphā makahaoalu;

⁷ kaja ava ningli aman shānkapama kathāna. “Zālu, manglu” da ana hānga, kha awui ningva nawuili maleimana.

⁸ Nana zāsang kahaibing chi maloshokra, kala nawui ningkashi tui arema sāra.

⁹ Mangkhama̱ana kashāpamli mamatuialu, kaja nawui thangkhamei tui chili ana ningkachaira.

¹⁰ Achālakhawui thari maphuralu, lah avāva̱ makhaleiawui luili mazangalu,

¹¹ kaja athumwui Ngatangkhame panglaka; ana athumwui vang nganingmira.

¹² Tamkachitheili ningsanglu, theithangkhamei tui nganākhuilu.

¹³ Naoshinaoli kharāk machihohaialu, nana ali lijei eina kashao eina a mathimara.

¹⁴ Nana ali lijei eina shaoakha, nana awui mirin Kathewui ramwui eina huikhuira.

¹⁵ Inaomayara, naning thangmeiakha, iwui ningla mathānlakra.

¹⁶ Nakhamorna mashuntui khamatui tharan imanglā ringphāra.

¹⁷ Naning morei kaphungbingli mayuishiaranu, kha thangkachida Proholi ngacheechingranu.

¹⁸ Shingā leichaowa kala nawui kachihān makaimara.

¹⁹ Inaomayara, nganālu, kala thangmeilu, kala nawui ning khamashung apongvāk zatngasaklu.

²⁰ Zamkhor khamaripbingwui alungli mazangalu, sā morhāklāk eina kashaibinglila mashuralu;

²¹ kaja khamaripa kala morkahākbing chāmphalungra, pikhangaina mili karopkui thāda ngavaimira.

²² Nali pharākakhuia navāwui tui nganālu, kala sārkahai tharan nava̱li maningkachaialu.

²³ Khamashung lokhuilu, kala chi mayorhaialu; thangkhamei, tamkachithei, kala theishingkakhui lokhuilu.

²⁴ Khangarongawui avāva̱ mathānkhailakra, thangkhamei naomayara pharākakhui a chi ringphāshunra.

²⁵ Nava̱ eina navāli ringpha ngasaklu, nali vaikakhuiva̱li mathān ngasaklu.

²⁶ Inaomayara, nawui ning ili milu, kala iwui apong namikna yangkhuiranu.

²⁷ Kaja khayorva̱̱ chi kathuka chomna, makhangatunva̱ khamashā ra̱khongna.

²⁸ Pha̱ma̱ kashao thāda ana shongrimda mashitkasang mi mataisang ngasaka.

²⁹ Khipā ningchot? Khipā wukkhanang? Khipāna nganang? Khipāna phen? Angalang maleila khipāna khamā za̱li? Khipāwui mik hungda lei?

³⁰ Zamli honkapambing, khamanata zamkhor khamangbingna.

³¹ Zamna hungda leilakha, khoramlungli khamalao tharan, kala nganaipat eina mangkasang chili mayangalu.

³² Naolak eina phara̱ thāda makeira, chaoshai thāda mara̱ya.

³³ Namikna makhanining theira, naningna masho ngacheida tui matuira.

³⁴ Nala shamadrulungli kape mi thāhaora, jahas kachon chiphan khavailungli kapi akha thāda.

³⁵ “Athumna ili shaowa, khamāva maza̱mana, ili shaowa, kha I kachot matheimana. Ina katharan ngakarthuira? I mangkhavai phaluishitra.” da nana hāngra.