CHĀNSAM 21 - Kathara Bible (BSI)

¹ Prohowui pāngli awungawui ning kongrāna; awui vāngasak khangangaili ana ngareivā ngasaka.

² Mina awui kasāsā chi awui miktāli mashunga da phaninga, kha Prohona ning onyanga.

³ Pha̱kaphayāle khamashung khangarong eina mashun kasā Prohona khuisangngaimei.

⁴ Khanganing mikyan eina lāngkaso ning, makhayāwui thaomei moreina.

⁵ Ningkazanawui khangarāna makahatlākla makhavātli thānvai, kha teikakatā kachiva̱na chām samphanga.

⁶ Kakapika male eina kazipkasang lan phankazata akahur kala kathiwui khalen kathāna.

⁷ Makhayāwui khangashaona athumli khuithuihaora, khikhalajila athumna kaphā ot masāngaimana.

⁸ Khayonawui apong makhuikazama, kha katharawui acham khamashungana.

⁹ Khamarāk sha̱naoli pamrumki kajiwui vanga, shimtung achithek akhali ngateikapam phāmei.

¹⁰ Makhayāwui manglāna kashi ot ningchānga; awui khongnaina awui mikyanli lukhamashan masamphangmana.

¹¹ Mashātkazarali kashong khalāng tharan ningkapaina thangmeihaowa; thangkhamali tamkachithei tharan, ana theithangkhamei ngarumsanga.

¹² Khangarongana makhayāwui shimpānrin ngashānpama, makhayā chili shimān ngasaka.

¹³ Kachāmabingwui ringkhangāli manganākasang mi chile ana ringkhangā tharan alila mashāmimara.

¹⁴ Ngathumda ngachonkhamina malungkhavāt suitā ngasaka, kala maingātta khami pheisāna malung thuingasaka.

¹⁵ Mashun bicharli khangarong mina mathāna, kha makaphā kasābingwui vanga ningchota.

¹⁶ Theishingkakhui apongwui eina thuikahai mina kathewui kazip khavai lungli ngasāmra.

¹⁷ Ringkaphā lumlao ningkachānga chi kachāma mi ngasāra; zamkhor kala thao ningkachāng mi mashāng ngayaomana.

¹⁸ Makhayā hi khangarongawui kala mashitkasang hi khamashungawui ngatang khavaina.

¹⁹ Khamarāk kala khonkazāra sha̱naoli ngasokapamle siwukli okkathuina phāmei.

²⁰ Kasaka lan thangkhamawui shimli lei, kha mangkhama̱ mina sāshimana.

²¹ Khamashung khangarong eina lukhamashan kaphā mina khayākakā kala kharing samphangra.

²² Kapingana khikha mathamara da kachihan keinung chi thangkhama tamkazaklaga sākhai.

²³ Maleli kala akhamorli khāmshapa china khalatta kakhanang masamphangmara.

²⁴ “Mashātkazar” kaho hi langkasobing, khayāning khanganing, kachorkashi ot kasā miwui amingna.

²⁵ Ot kasāli pāngmareng masāza̱ngaithuda ngachāng makakāle awui ningkachāng china sāthata.

²⁶ Langpongda makhayaana ngamarpama, kha khangarong mina khamila mi kashivāmla maleimana.

²⁷ Makhayaawui pha̱kaphayā ningkakachai otna, kashi ningngai eina khuikharā tharan kayākha marmeirakhala!

²⁸ Minama shākhi shimānra, kha mi akhana shākahuia tui chiya mashimānmara.

²⁹ Makhayā mi mai shālaka, kha khamashung mina awui otsak chukmaja̱kazaka.

³⁰ Thangkhamei, theishingkakhui, hāngkachithei, Prohona mamayākha masamphangrarmana.

³¹ Raikasā zimikshowui vang siguili shaksāmi, kha khayui chi Prohowuina.