CHĀNSAM 19 - Kathara Bible (BSI)

¹ Tui masho ngacheida khamatuia mangkhama̱a chile, ningsā ngazipta kazata kachāmana phāmei.

² Theikakhui makhalei hi miwui vang maphāmana, kala aphei thakkhanāla awui apong shimāna.

³ Mi akhawui mangkhama̱ otsakna awui apong kashimān khuikharā tharan, Proholi mamayāla malungvāta.

⁴ Lanna ngasotnao kadhar kachungkha hokhui, kha kachāmale ngasotnaona nothāhaowa.

⁵ Minama shākhi kasā mili kashong marāngla machihomara, kala kakapik tui khamatui mi chi mayāmshokmara.

⁶ Pāngkatong miwui ngahānkhangai kachungkhana phai, kala mi kachiva̱ lemmet khamewui ngasotnaosera.

⁷ Kachāmali chinao ngarāna yangkharingsera; ngasotnaobingna kayākha mataimeirakhala? Ana athumli tui eina suiya, kha chinala kānkhanā maleimana.

⁸ Thangkhamei mina khalatta leishi, theishingkakhui khaleina reisangra.

⁹ Minama shākhi kasā mili kashong malāngla machihomara, kala kakapik tui khamatui mi shimānra.

¹⁰ Mangkhama̱ mina ngatorngakoklak eina okathui mangayimana, raona wungnaowuitungli khamung mangayimeimana.

¹¹ Ning khamathāna mina malung mavātzarmana, kala miwui sākhangui yangkhumkhami chi awui khayākakāna.

¹² Awungawui malung kathui kazingkha̱ kakhangang thai, kha awui ngahānkhangai thingnā-ra̱hātungli ikra̱ katā thai.

¹³ Mangkhama̱ naomayara avāva̱wui shimān khavaina, kala preiva̱wui kakharar zingrotra̱ ngayishon kaji thai.

¹⁴ Shimlui kala lan avāva̱ ngarāwui eina samphanga, kha thangkhamei preiva̱̱ Prohowui einana.

¹⁵ Ngachāng makakāna piphuphai ngasaka, kala chāngshena kathai samphangra.

¹⁶ Ningkhami khamayon mina kharing samphanga; tuili ningkakachaia chi thira.

¹⁷ Kachāmali lumashankhami chi Proholi kachishutna, kala awui kaphā sākahai chiwui sāman Prohona runmira.

¹⁸ Kachihān leilakha nanaomayarali rāklu; awui shimān khavai maphaningalu.

¹⁹ Malung thuikazara mina chiwui kashong runra; nana ali kanshokmiakha nana sāluipapamra.

²⁰ Hāngkachithei khuisanglu kala tamkachithei nganākhuilu, naodawui vang thangmeimei khavaina.

²¹ Miwui ningli khangarān kachungkha lei, kha sākashok chi Prohowui ning eina vaira.

²² Mi akhawui eina ningkachāng chi khangavapna, kala kakapikale kachāma phamei.

²³ Proholi khangacheena kharingli thānzanga; chi khalei mina ningyāng ungda chingrihai; ali kalākashi marāmara.

²⁴ Chāngshena khongpheili zangparlala khamorli makāshungmara.

²⁵ Mashātkazarali shaolu, ningkapaina thangkhamei tamkhuira; theishingkhui kathei mili hāngmachinlu, chieina ana theikakhui mataisangra.

²⁶ Avāva̱li khangashaowa, ava̱va̱li kakashama naomayara china mai shingasaka kala tui kapo shokngasaka.

²⁷ Inaomayara nana tamkakhui ngasāmhaiakha, tamkhui kahai saikora yanglāhaora.

²⁸ Makānkhana shākhi kasā mina mashunli mana̱shi, kala makhayāwui khamorna khangui khalāng shaisanga.

²⁹ Mashātkazar mili shongrān tāra, kala mangkhama̱bingwui khumkhorli lijei parra.