CHĀNSAM 18 - Kathara Bible (BSI)

¹ Ngakhei kahai mina khamashunglila nguikhavai phayatshang phayattai.

² Mangkhama̱ana theishingkakhuili khamathān maleimana; kha awui kaphaning kahāng chimāngli ringphai.

³ Makaphā makhayā kharā tharan, khayā makashila rai, maikashiwui eina khayāmakakā rai.

⁴ Mi khamorwui tui hiya kathuka tara̱na, thangkhamawui ura̱ chi longkazata kongna.

⁵ Makhayā miwui mijang kazang kala, khangarongawui mashun shimān khangasak makaphāna.

⁶ Mangkhama̱wui morchaina nganang ngasaka, kala akhamorna kashao reokhuiya.

⁷ Mangkhama̱wui khamor awui shimān khavaina, kala amorchaina khalattawui khalen kasangna.

⁸ Kasupkazata miwui tui han shaikaphā thai, phasāli vāshunga.

⁹ Khalattawui ot kasāli ngachāngkachata mi chi sākashimān miwui achināna.

¹⁰ Prohowui minga khamakanga dolanna, khangarong mina chili yāmzangda chingri kahai samphanga.

¹¹ Kashānga miwui lan chiya awui khamakanga keinungna, kala kajuiya pan thāda ali ngākmi.

¹² Kashimān marāranglakha miwui ning ngamreka, kha ngahuiri kahaina maikhayā mangāli zata.

¹³ Mi akhana manganākhuiranglakha ngahankaakha, chi awui mangkhama̱ otsak kala khayā khamalāna.

¹⁴ Miwui manglāna kakazā khāngshapa; kha manglā yurkahai chi khipāna phungrarrakhala?

¹⁵ Ning kazanga china theithangkhamei samphanga, kala thangkhamawui khanāna theithang khamei phāya.

¹⁶ Lemmet khamina miwui apong sāmida khangamkharei miwui ngalemli zangpai.

¹⁷ Khangatei akhapana rāda mamanāranglakha hangkharepā chiwui tui khamashung thai.

¹⁸ Lungsanlāk eina ngapai khangarok chili, kalā khayangna tui kupngasaka.

¹⁹ Achināli khangachon hi khangazipa keinung thai, kha kharar khangarok hiya shimreiwui ngaveithing thai.

²⁰ Akhamorwui atheina katho samphanga, amorchaiwui eina khamathei china katho samphanga.

²¹ Kathi kala kharingla malewui pangshapli lei, chili leikashibingna chiwui athei kashai samphangra.

²² Preiva̱ samkaphanga chi kaphā ot samphanga, kala Prohowui eina ngahānkhangai samkaphangna.

²³ Kachāma mina khamayo seihā tui shichina, kha kashāngana hāngngeingeihai.

²⁴ Ngasotnao sārek kaji ngasotnao lei, kha chinaongarāli nganaimeida khangavapa ngasotnaola lei.