CHĀNSAM 17 - Kathara Bible (BSI)

¹ Shim pemting eina khanganang zātkhānliva katheng eina chingri phākazāna phāmei.

² Thangmeilak eina kasā raonao china makhangatun naomayarawuitungli mungra, kala chinaongarā akha thāda shimlui samphangra.

³ Khāng lupāsāwui vāngna, sharkha̱ sināwui vāngna, kala Prohona ning tamyanga.

⁴ Makaphā kasā mina makhayā morchaiwui tui khui; kala kakapika mina sākashewui maleli shitsanga.

⁵ Kachāmali mana̱kashe mi chi awui Kasā Akhavāli zeikakharuina, miwui kalākashili ringkaphā mi chili kashong malāngla mathāhaimara.

⁶ Ara̱ ngarāna awova̱wui kuihonna, kala anao ngarāwui khayā avāva̱ ngarāna.

⁷ Chānhan khamathā mangkhama̱awui vanga makhangayi tuina, khangui tuimatui wungnaowui vang mangayimeikharmana.

⁸ Pheizā kasā hi khamewui mikyanle lunghaila kathāna; ana ngareikhavāvāli reikasang samphanga.

⁹ Khayon pheokhamena leikashi phai, kha otsak akha chi latlui latluida kasā tharān ngasotnao pākngasaka.

¹⁰ Mangkhama̱a akhali shākha shida kashirle, theishingkakhui mi akhali hāngmachinkha kashina thukmeida theikhui.

¹¹ Makaphā mina khangashaomāng phai, kala awuitungli sākashi paome akha chihovāra.

¹² Mangkhama̱a akhali awui mangma̱sakwui alungli samphangki kajile, anao tukthui kahaiya singom ava̱li samphangtha̱ranu.

¹³ Kaphā sākhamiwui vang makaphā hanmiakha, makaphā chi awui shimkhurwui eina mathuimara.

¹⁴ Khanganang haokaphok hi tara̱ longshok khangasak kathāna, chieina makhararphokranglakha thāhaolu.

¹⁵ Makhayaali mashun khami, khamashungli yonkhangasaka chi Prohowui mangāli ningkakachai ot thathuiya.

¹⁶ Ning makhalei mangkhama̱ana thangkhamei lokhavai awui pāngli pheisā leida khi sāvaira?

¹⁷ Ngasotnaona atam kachida leishi ngaroka, kala achinā hi kalāshāt atamwui vang kapharāna.

¹⁸ Ning makhalei mina khangashit sai, kala awui khongnainaowui mangāli shākhi nganingmi.

¹⁹ Khayon-khamāng ningkachāng mina nganangngailaka, khāmong kajui sakakāna kashimān phākazatna.

²⁰ Zakkashi ning kaphaning mina mareisangngayaomana, kala matuiphāphā kaji malena kalākashili tāzanga.

²¹ Mangkhama̱ nao avāva̱wui vang wukhanang khavaina, kala mangkhama̱awui avāva̱na khamathān masamphangmana.

²² Mareojao kahai hiya kaphā arina, kha shipur kahai ningngaina ara̱kui thengngasaka.

²³ Mashunli masho ngachei ngasak khavai makhayaana ngathumda pheizā zai.

²⁴ Theishingkakhuia mina thangkhameili yanga, kha mangkhama̱awui mikna okathui vākatangshong lei.

²⁵ Mangkhama̱a naomayara chi avāva̱wui vang wukhanang khavaina kala ali pharākakhuiva̱ ning chotkhavaina.

²⁶ Khamashung mili kashong khalāng maphāmana; khayākakā mili kashao mamashungmana.

²⁷ Tui kathuma chi theithangkhamei lei, malungkhanima chi theishingkakhui mina.

²⁸ Mangkhama̱ana kasaikha pamkahai tharan thangkhameina da khui; amorchai katim kahai tharan, a thangmeiyada shānkhui.