CHĀNSAM 14 - Kathara Bible (BSI)

¹ Thangmeiva̱na awui shim sākai, kha mangkhama̱va̱na khalattawui pāng eina pheitai.

² Mashungrik eina kazata china Proholi ngachee, kha khangui mina awui apongli ningkachaiya.

³ Mangkhama̱wui chānmatui akhumkorwui lijeina, kha thangkhamawui morchaina athumli phārimira.

⁴ Mukkā makhalei pamli, zātla maleimana; kha makhavāta theishirai mukkāwui pangshap einana.

⁵ Ningkatonga shākhina makapikmana, kha kakapika shākhina kakapik matuishoka.

⁶ Mana̱shikathana aremali thangkhamei phai, kha thangkhamei miwui vanga awor hi kapaina.

⁷ Mangkhama̱ mi khaleipamli mapamalu, kaja chili awor masamphangmara.

⁸ Thangkhama miwui thangkhamei chi awui apong theikhui khavaina, kha mangkhama̱ miwui maphākakhuina thānngui.

⁹ Makhayāli Varena mana̱shi, kha mashungrik kahaina awui ngahānkhangai samphanga.

¹⁰ Ningna akhalattawui kakhā chi thei, kala khipānakhala chiwui khamathān chila mangayarpaimana.

¹¹ Makhayāwui shim sāshimānhaora, kha mashungrik kahaiwui kachonshim reisangra.

¹² Mi akhawui vang apong khamashung akha khalei thāda lei, kha chiwui akatang chi kathiwui apongna.

¹³ Khamana̱ atamlila ningva khananga, kala khamathānwui akuplam ningkachotna.

¹⁴ Ningkhamakhui mi awui apong athishurda awui atheina pemra, kala kaphā mina awui ot kasāwui athishurda pemra.

¹⁵ Ningkashambingna saikora shitsanga, kha shingā kathei mina kachishong vāra̱khala kaji yanga.

¹⁶ Thangkhama mina ngashara kala makaphāwui eina ngareithuihaowa, kha mangkhama̱na khangashar horhaida paireka.

¹⁷ Malungvatkazārana mangma̱sak eina sai, kha kashi kaphā kathei mina ngarina.

¹⁸ Ningkashamana mangkhama̱ phākhui, kha shingā katheia chili theishingkakhui ngahonmi.

¹⁹ Makaphāna kaphāli khoruma, makhayāna khangarongawui ngaveili khoruma.

²⁰ Kachāmali awui khongnai eina tangdala maningchāngmana, kha kashāngava ngasotnao kachungkha lei.

²¹ Khongnainaoli ningkakachaia chi morei kaphungana, kha kachāmabingli lumashankhame chi ringkaphāna.

²² Makaphā khangarānbing chi mayonmala? Kapha khangarānbingna khayākashi kala ningkatong samphanga.

²³ Khanangda ot kasā saikorali tongkazā lei, kha tuimāngakha vātshona.

²⁴ Thangkhamawui kuihon aworna, kha mangkhama̱wui otsak chi mangkhama̱bingwui pāsina.

²⁵ Mashun shākhina mirin kachungkha huikhui, kha kakapik khamatui chi yorkazāna.

²⁶ Proholi khangacheeli ningshai khavai lei, kala anaongarāna ngayin khavai samphangra.

²⁷ Proholi khangachee hi mirinwui ura̱na, kathi khalenwui eina yāmshok khavaina.

²⁸ Awungawui tekhamatei ayaonao kachungkhawuili lei, kha ayaonao maleila wungnao khikha masāvaimana.

²⁹ Malung mavātkazāra mi chi theishingkakhui kahakva lei, kha malungvātkazārana maphākakhuili masot mi.

³⁰ Chingri kahai ningna phasāli ringngasaka, kha yuikashina ara̱kui shuingasaka.

³¹ Kachāmali kachipata mi china awui Kasā akhavāli zeikakharuina, kha mili lukhamashan chi ali khayākashina.

³² Makhayā mili awui makaphāna chithita, kha khangarong mina awui ningsākhangazipwui mangā eina ngayin khavai samphanga.

³³ Thangkhamei hi theishingkhuikathei miwui ningli lei, kha hi mangkhama̱bingwui ningli mazangmana.

³⁴ Khamashung khangarongna yurli mai kāngasaka, kha moreina miyur saikorali maishi ngasaka.

³⁵ Thangmeilak eina kasā rao china awungawui ngahānkhangai samphanga, kha kakhayak otsak kasaa chiwuitungli malungkakang tāshunga.