CHĀNSAM 12 - Kathara Bible (BSI)

¹ Hāngkhamachinli leikashe chi aworli leikashina, kha hāngkhamachinli ningkakachaia chi mangkhama̱na.

² Kaphā mina Prohowui ngahānkhangai samphanga, kha makaphā khangarān mili ana khayon mi.

³ Mi hi makhayāna masomkāmana, kha khangarongawui angayung mangatha̱lakmara.

⁴ Kaphā preiva̱̱ hiya gaharawui kuihonna, kha maikashi phungsangkhamiva̱ chiya gaharawui ara̱kui shuikhangasak kathāna.

⁵ Khangarongawui kaphaning tāzak hai; makhayā miwui hāngkachithei mikhanamānga.

⁶ Makhayāwui tuina ashee shokkhavai rimpama, kha mashungrik kahaiwui khamorna mibingli kanshokmi.

⁷ Makhayābingli ngakhuntāhaida maleiluimana, kha khangarongawui shim nganingchingra.

⁸ Mi akhali ningkakāwui athishurda sochikata, kha ningkhamakhui mili yangkharinga.

⁹ Khangam-kharei sāreklaga zākhavai makhaleiliva, ngazanlala khalatta nganingkazā chongmei.

¹⁰ Khangaronga mina awui sha̱keiwui manglāwui vang phaningmi, kha makhayāwui lukhamashan sāshilaka.

¹¹ Kachichāwui lui khavā mina makhavāta kashakazā samphangra, kha makānkhanāli kharomkazata mi chiya ning makhaleina.

¹² Makhayāwui khamakanga dolan arema sāthuihaowa, kha khangarongawui angayung nganingshinghai.

¹³ Makaphā mi amorchaiwui khayon chili manna, kha khangaronga china kakhanangwui eina yāmshoka.

¹⁴ Mi akhali awui tuiwui athei china kaphā eina ningyāng ungngasaka, kala mi akhawui pāng eina kasā ot chi ali latunga.

¹⁵ Mangkhama̱wui otsak khalattawui miktāli mashungrikhai, kha thangkhama mina hāngkachithei nganākhui.

¹⁶ Mangkhama̱wui malungkhavāt theipailaka, kha shingā katheia thangkhama mina kazeili matheimimana.

¹⁷ Khamashung tui khamatui ana mashun shākhi mi, kha makhamashung shākhina kachipat tui matui.

¹⁸ Chānhān makhaungawui tui zeisa̱nao eina kasa̱ thai, kha thangkhamawui malena khamā raimi.

¹⁹ Mashuntui nganingchinga, kha kakapika male hunkhawui vangmānga.

²⁰ Mikhanam hi makaphā khangarānbingwui ningli lei, kha kaphā khangarān athumwuili khamathān lei.

²¹ Khangarongali kalāshāt marāza̱mana, kha makaphāle kakhanangna pema.

²² Kakapik hi Prohowui mangāli ningkakachai otna, kha ningtongda kasābing awui ningyāngkhaungna.

²³ Thangkhamei mina awui awor thumhai, kha mangkhama̱bingna athumwui mangkhama̱ vaozata.

²⁴ Khamakhuna miwui pāngna mungra, chāngsheli tandi ot sāngasakra.

²⁵ Ningkachot hina mili ngazan ngasaka, kha khamathā tuina ali mathān ngasaka.

²⁶ Khangarong mina makaphāwui eina ngareithuihaowa, kha makhayāwui apongna athumli ma̱zat ngasaka.

²⁷ Chāngshe mi zākhavai masamphangmara, kha khamakhuna mina kasaka lan samphangra.

²⁸ Khangarong shongfali kharing lei, kha khanguiwui apongna kathili thānvai.