CHĀNSAM 10 - Kathara Bible (BSI)

Solomonwui Chānsam

¹ Thangkhama naobingna avāva̱li ringphāngasaka, kha mangkhama̱ naona ava̱va̱wui malung kharingna.

² Makaphā-makhayā eina tongkhuida kazipkasang tongkazā maleimana, kha khamashung khangarongna kathiwui eina kankhuimi.

³ Khangaronga mili Prohona thaida mazat ngasakmana; kha ana makhayābingwui khangarān pa̱ngapā ngasaka.

⁴ Pāng makhangarapna chāmngasaka, kha khamakhunawui pāngna shāngngasaka.

⁵ Lumkachāng kazipkasang naomayara chi thangkhamana, kha māhāli kapi naomayara chi kakhayak samphanga.

⁶ Sokhami hi khangarongbingwui kuili lei, kha makhayāwui khamorli sākashimāng thumhai.

⁷ Khangaronga mili sokhaminada phaningunga, kha makhayā miwui aming shuitāra.

⁸ Thangkhamawui ningna ningkhamili khuisanga, kha morsaptap kahai mangkhama̱ mi kashimānli zangra.

⁹ Ningsāngazipta kazata china tāphup eina zatra, otsak makhamashunga chi phongshokhaora.

¹⁰ Mik kakashina khonzār ngasaka, kha pinglak eina hāngkhamachin china chingrihai ngasaka.

¹¹ Khangarongawui khamor kharinga ura̱na, kha makhayāwui khamorli sākathat ngathumhai.

¹² Yangkakharingna khanganang shokngasaka, kha leikashina khayon saikora fakhammi.

¹³ Theishingkakhuia awui morchaili thangkhamei samphanga, kha lijei hi ningmakhalei mangkhama̱wui khumkhorwui vangna.

¹⁴ Thangkhama mina theikakhui kaziphai, kha mangkhama̱wui matuiphāphā kajina kashimān rānganai ngasaka.

¹⁵ Kashāngawui lan awui khangazipa keinungna, kachāmawui chāmna athumwui kashimānna.

¹⁶ Khangarongawui sāmanna kharingli thanvāmi, makhayāwui katong moreina.

¹⁷ Hāngkachithei khuikasang mi kharing pongli kazatna, kha hāngkhamachin makhamayā mina ma̱thuihaowa.

¹⁸ Yangkakharing kathumawui morchaili kakapik lei, kala khamashāt tui khamatui chi mangkhama̱na.

¹⁹ Kachungkha matui kahai tharan, khalāngla mavātmana, kha mamatuiphāphā kaje mi thangkhamana.

²⁰ Khangarongawui male khamathā lupāsāna, makhayāwui ning aman teomeikhameina.

²¹ Khangarongawui morchaina kachungkhali mizai, kha mangkhama̱na ning khavātwui vang thi.

²² Prohowui sokhamina shāngngasaka, kala chili ana wukkakhanang mangarumsangmimana.

²³ Mangkhama̱wui vang khayon ot kasā hi ngareokhanganao kathāna; kha thangkhamawui achamna theishingkakhui miwui ningyangkhaungna.

²⁴ Makhayāna khangachee chi awuitungli tāra, kha khangarongawui ningkachāng chi ungshungmira.

²⁵ Siphan zingrot kharā eina makhayā chi maleiluithuwa, kha khangarong mi mangatha̱la leichingra.

²⁶ Ngachāngmakakā mili kachiho athumwui vanga ahāli kathura drakhāra̱ kala mikli meikhut khangami kathāna.

²⁷ Proholi khangacheena okpeingasaka, kha makhayā miwui mirin sha̱ra.

²⁸ Khangarongawui kachihān ringkaphā eina atanga, kha makhayā miwui ningkashai arema ngasāra.

²⁹ Mashun eina kazata miwui vanga Prohona awui ngayin khavaina, kha makaphā kasāwui vang shimān khavaina.

³⁰ Khangaronga mi mangacheilakmara, kha makhayā mina ram chili mapānmara.

³¹ Khangarongawui khamorna thangkhamei shoka, kha masho-khangacheiya miwui male katathaora.

³² Khangarongawui morchaina khuisangkapai tui thei, kha makhayāwui khamorliva, mashokhangachei tuimānga.