CHĀNSAM 1 - Kathara Bible (BSI)

Chānsamwui Kankhanā

¹ Davidwui naomayara, Israelwui awunga, Solomonwui chānsam:

² Kaja mibingna awor kala hāngkachithei, kathuka tuibing theikhui khavai,

³ thangkhamei eina ot kasāwui pongli hāngkachithei, khamashung khangarong, mashun-makhui, kala ngaraikachā mashun samphang khavai;

⁴ kaja ningkashambingli thangkhamei mikhavai; theishingkakhui kala khalatta machukathei khanuithotli mikhavai—

⁵ thangkhameibingnala shālaga tamkakhui mataisang khavai, kala theishingkakhuibingna kathem samphang khavai,

⁶ chānsamla, akachangla theikhui khavaina.

Yaronnaoli Hāngkachithei

⁷ Proholi khangachee hi theishingkakhui haokaphokana; Mangkhama̱bingna thangkhamei kala hāngkachitheili yangkharinga.

⁸ Nganālu, inaomayara, navāwui hāngkachithei, kala nava̱wui tamkachithei manganākasang masaalu;

⁹ hi nakuili mayong pāsi khangakham, kala nakahungli chā khangachā kathāna.

¹⁰ Inaomayara, morei kaphungbingna nali suiakha mamayaalu.

¹¹ Athumna, “Ithumli shurlu, ithum ngathumda phama̱ ashaosa, khayon makhalei mili ngathirai asāsa;

¹² Kathewui ram thāda ithumna athumli kharing eina tongtingda mayuisanghaosa, Akhurli tāzang kahaiabing thāda:

¹³ ithumna aman kasaka ot kachungkha samphangra, ithumwui shim ngaponkakhui ot eina chipemra;

¹⁴ nathumwui yar hili horsangngarumda ithum saikora lupākhao akha ngarumra” jilala,

¹⁵ inaomayara athumwui apongli mangayurzatalu, athumwui shongpong eina naphei ngalanhaolu;

¹⁶ kaja athumwui pheina makaphāli vai, kala athuma ashee shokkhangasak thāklaka.

¹⁷ Kaja vānao akhawui miktheili khalen kasang aremana;

¹⁸ kha mibing hina khalatta thikhavai athumna honpama, kala khalattawui manglā khuikhavai rimpama.

¹⁹ Sāshāt eina katong samkaphang mi saikorawui apong hithai; akhavāpāwui mirin khuithuimihaowa.

Thangkhameina Kaho

²⁰ Aworna chanreili panglāk eina vaowa; leihngapha̱lungli ana awui akhon chuimei ngasaka;

²¹ phākho matungmeikap kachiwui eina ana vaowa, kala keinung ngaveili ana matuiya:

²² “O ningkashambing, nathum karankha ningshamfarakhala? Mashātkatheibingna karankha khamashātli mathanra̱ kala mangkhama̱bingna aworli ningkachaira?

²³ Iwui hāngkhamachinli nganālu, yanglu, ina iwui kaphaning nali hāngsera; iwui tui ina nali chitheira.

²⁴ Kaja ina nali hoi, chithālala nana makhuisangmana, ipāng katingshoka kala khipākha makhuisangmana,

²⁵ kala iwui hāngkachithei saikora nathumna matheimithuwa, hāngkhamachin akhala makhuisangmana,

²⁶ nawui unshimuili inala mana̱ra; khangachee kharā atamli ina ngashan sanganaora,

²⁷ khangacheena siphan zingrot thāda, kala nathumwui unshimui sur kakhaning thāda kharā tharan, kachotkachāng nathumli kharā tharan ina mana̱shira.

²⁸ Chieina athumna ili ngakaora, kha ina mangahānkāmara; athumna ili phāshang phātālala masamphangmara.

²⁹ Khikhalajila athumna aworli yangkharinga kala Proholi khangachee athumna makapangkhuimana,

³⁰ Iwui hāngkachithei akhala makhuimana, kala iwui hāngkhamachin saikorali chinhaowa,

³¹ chiwui vang eina athumna athumwui apongli kazatwui athei shaira, kala khalattawui khangarān eina sānra.

³² Kaja ning kashambing ning khangachei eina thi, kala ichachamabingna theithangkhamei khavāt eina khalatta shimāna;

³³ kha ili nganākasanga china ning nganungkhung eina okthuira, kala makaphāli mangacheela leiyāsa eina pānra.”