AMOS 8 - Kathara Bible (BSI)

Athei Lukkhawui Khamahā

¹ Hithāda Vare Prohona ili chithei: Yanglu, lumkachāngwui athei yur lukkhatkhana.

² Kala ana hānga, “Amos, nana khi theikhala?” Chieina Ina ngahānkai, “Lumkachāngwui athei lukkhatkha thei.” Chieina Prohona ili hānga, “Iwui miyur Israelwuitungli khangachang atam rāhaira; Ina athumli chi mangacheimilui mara.

³ Chitharan Khorumshimwui laakhon chi chapkhangachā khon ngasāhaora,” “kathingun kachungkhara, kapam kachungkhali athumli akhon mashokla horkazam haora” da Vare Prohona hānga.

Israel Shimānkida Khanganai

⁴ Hi nganālu, khavātabingli naikakazapabing, kala lam hiwui kachāmabingli shimān khangasakabing,

⁵ nathumna, “Mā yorpai khavai, chāngthar katharān kuphaoni khala? Kehu yorkhavai sabbath katharān kannikhala, chithāda ithumna khuilui kathāda teongasakmei paira̱ kala shekel chungngasakmei paira, kala makhamashung khāntam eina minam khuipaira,

⁶ chithāda ithumna kachāmabingli lupāsā eina lokhavai, kala khavātabingli pheihop akha eina ngatha̱khui khavai; kala hangkha̱māng eina yorsang khavai ngarāna.”

⁷ Jacobwui lāngsot chiwui vang Prohona khangashit sāhaira; “Kachangkhat eina Ina athumwui otsak akhanidala mamalai mara.

⁸ Hiwuivang mi kachiva̱ masifa ngayimalā, kala chili okathui saikora sifaya, kala athum saikora Nile kong kathui thāda, kala Egyptwui Nile thāda ngaphumkashi shokkashi majimarala?”

⁹ “Kala chithangchi,” da Proho VAREna hānga, Ina ngashunung zimik tunngasakra, kala ngashunung okathui tangmang ngasakra.

¹⁰ Nathumwui lumlao phanit Ina sikafa onngasakra, kala nathumwui laa saikora chapchātlaa sāngasakra; Ina mi kachiva̱ bora ngavaingasakra, kala kui sitāngasakra; naoho-naotongwui vang chapkhangachā thāda, malungkharing katanga ngasāngasakra.

¹¹ Proho VAREna hānga, “Yanglu, zimiksho chi rārāli, lam hili Ina kumshāt chihorāki kaji, zātwui kumshāt, tara̱wuila maning mana, kha Prohowui tui chi nganā khavaiwui ponglina.

¹² Athumna shamadru akhawui eina shamadru akhali, kala atungshong eina zingsho vāpeida yaozatra; Prohowui tui chi phākhui khavai athumna phāshang phatāra, kha athumna chi masamphang mara.

¹³ Chithanghon lāshiyoyo kala yarshoshova̱, ra̱kachangwui vang vānra.

¹⁴ Samariawui Ashimahli mingzaida shākhi sāda, ‘O Dan, nawui varena theiya’ kala, ‘Beer-shebawui mirin thāda kharingbing’ da hāngra, athumna pitāra, mangakarthuklui mara.”