2 WUNGNAOBING 3 - Kathara Bible (BSI)

Israel Eina Moabwui Rai

¹ Judahwui awunga Jehoshaphatna mungda tharāda kachishata kum, Ahabwui nao Jehoramna Samariali Israelwui awunga sāphoka kala ana kum tharāda khani munga.

² Avāva̱ eina ava̱va̱wui yākha mazakshimana jilala ana Prohowui mangāli makhayā ot sai, kaja ana avāva̱na sākahai Baalwui lungshom chi shaokhaihaowa.

³ Chithālala Nebatwui nao Jeroboamna morei sāda Israelli morei sākhangasak chithāda anala chiwui eina mapākthuihaila sāchinga.

⁴ Chitharan Moabwui awunga Mesha yao khayoka mi sāsai; kala Israelwui awungali kumshirinda yaonao lakhkha kala yaovā lakhkhawui yaohah chigatchinga.

⁵ Kha Ahab thikahai eina, Moab awungana Israelwui awungali ngakaishihaowa.

⁶ Chiwui vang Awunga Jeroboamna Samariawui eina shokta Israelnaobing kazipkhui.

⁷ Kala Judahwui awunga Jehoshaphatli pao chihovāda “Moabwui awungana ili ngakaishihaowa; ini Moabli rai matāsikhala?” da hānga. Ana, “Vāra, ini khi khangatei leikhala, iwui mila nawui mina, iwui siguila nawui siguina” da ngahānkai.

⁸ Chieina ana, “Kachishong eina vāsikhala?” da hānga. Jehoramna, “Edomwui lamhāngshong eina vāsa.” da ngahānkai.

⁹ Chiwui thili Israelwui awungana Judahwui awunga eina Edomwui awungali ngasoda vai. Athumna zimiksho shinithang kuizat kahai tharan, shurkazata raimibingwui vangla, sha̱keibingwui vangla tara̱ masamphangthuwa.

¹⁰ Chieina Israelwui awungana hānga, “Iyavo! Wungnao kathum Moabwui pāngli horsangmi khavai Prohona hokhuihaira.”

¹¹ Jehoshaphatna hānga, “Proholi ngasankhuipai khavai hili Prohowui marān khipākha maleimala?” Israel awungawui raimi akhana hānga, “Elijahwui pāngli tara̱ heisangkhame, Shaphatwui nao Elisha leida lei.”

¹² Jehoshaphatna hānga, “Ali Prohowui tuina ngasomi.” Chiwui vang eina Israelwui awunga Jehoshaphat eina Edomwui awungana awuili tai.

¹³ Israelwui awungali Elishana hānga, “Navā eina nava̱wui marānbingli vālu. Iwuili khi rāsākhala?” Kha Israel awungana hānga, “Maningmana, wungnao kathum hili Moabwui pāngli horsangmi khavai Prohona hokakhuina.”

¹⁴ Elishana hānga, “Ina otram ngatha̱khami, saikorawui Prohona thei kaja Judahwui awunga Jehoshaphatli ina khayākashi maleisāsi kaja, nalila ina matheimimara, khayangla mayangkāmara.

¹⁵ Ili laa kathem mi akha khuirāmilu.” Laasame china laa kasā tharan Prohowui pangshap awuitungli tāshunga.

¹⁶ Kala ana hānga, “Prohona hānga, ‘Thengcheng kahai kongrā hi ina tara̱ eina chipemra.’

¹⁷ Kaja Prohona hithāda hānga, ‘Nathumna masi eina zingrot matheimara, kha kongrā tara̱na chipemhaida, nathumla, nathumwui sha̱kei kala sāyurla khamang samphangra.’

¹⁸ Hiya Prohowui vang kapaiana; Moabwui mibingla nathumwui pāngli horsangmira,

¹⁹ raipan sakā kahai keinung kachiva̱, khamathā keinung kachiva̱, nathumna yuikhuira; kala thing khamathāthābing ta̱tekra; ura̱pam saikora sāphinra; kala ngalei katumpam kachiva̱ lunggui chipemda sākathānhaora.”

²⁰ Akhama kathā ngathor, pha̱phayāda chigatki kaji atamli, yanglu, apam kachiva̱ tara̱ mapemranglakha eina tangda Edomwuishong eina tara̱ longrai.

²¹ Awungabing rai ngarar khavai rāhaira kaji Moabwui mibingna kashā tharan chāngvei phungkatheiya, nganuimeikap kaje eina thuilaga rarmeikap kaje eina tangda hokhuiserlaga aram tharishong pareng asāhaowa.

²² Athumna ngathor kathui tharan zimikna tara̱tungli kaprorda Moabwui mibingna tara̱ saikora ashee thāda hungping eina thei.

²³ Kala athumna hānga, “Asheelaka, awungabing chi athum eina athum ngashātthat ngarok kahailakra. Ara jo, Moabnaobing, angaponkhuisa.”

²⁴ Kha Israelwui rairumli khavā tharan Israelwui mibingna thuingararda Moabnaobing mayāmranglakha eina tangda ngarara kala athumna mangāshong vāmamānda kachungkha sāthata.

²⁵ Athumna keinungbing chi khuihaida ngalei katumpapamli mi kachiva̱ ngalung mapemranglakha eina tangda horsanga; ura̱pam kachiva̱la saphinmihaowa, kala thing khamathāthāla ta̱tekmiserhaida Kir-haresethli chiwui lungguibingmāng taimihai, kala shairong kasingbingna kuinamda keinung chi yuikhui.

²⁶ Athum mayuithukthura kaji kathei eina Moabwui awungana raighai kasing mi shāshini khuilaga Edom awungawuishong namkhaishok khavai sai, kha mararthuwa.

²⁷ Chieina awui mahut shinki kaje awui naochizaili khuilaga phākhotungli rikkatā kachigat sāda pha̱haowa. Kala Israelwuitungli malungkhavāt kahakva tāhaoda athumna mangararluila kachichā ramli latunghaowa.