2 WUNGNAOBING 25 - Kathara Bible (BSI)

Jerusalem Kongkhalui

¹ Ana mungda kachiko kum, kachāng katharawui zimiksho katharāthang, Babylonwui awunga Nebuchadnezzarna awui raimi saikorali ngasorāda Jerusalem khuikhavai kuimareida khangarān sāserhaowa.

² Awunga Zedekiahwui khamung zingkum tharāda akha eina tangda kuinama.

³ Kachāng khamatewui kachikothang keinung chili kashakazā kasak marnāhaoda mibingna zākhavai akhala masamphangthuwa.

⁴ Chieina apongnao akha sākhuilaga awungala awui raimibingla, ngayā sailung, awungawui yāmgui ngavei kahai phākho khaniwui ngachaili yāmshokhaowa. Atam chili Chaldeanaobingna kuinamhaoda Arabahshong yāmvai.

⁵ Kha Chaldeawui raimibingna awungali kharomvālaga Jericho tampākli angaphankhuida awui raimibing ngapha̱yanghaowa.

⁶ Athumna awungali tukkhuida Babylon awungawuili Riblahli khuiungmi, kala awuitungli tuitak khuihaowa.

⁷ Zedekiahwui miktāli anaomayarabingli sāthata, kala awui mikla latshokmithathuihaowa; kala pheipāng khalaplaga Babylonli khuivai.

Khorumshim Sākakhui

⁸ Kachāng kaphangāwui zimiksho kashinethang— Babylonwui awunga Nebuchadnezzarwui tharāda kachiko kum—awungawui raimi kathānawui ngākkhame Nebuzaradanna Jerusalemli vai.

⁹ Kala Prohowui shim, awungawui shim, kala Jerusalemli khalei shim kahahak kachiva̱ mei thottāmiserhaowa.

¹⁰ Kala raikānwui kathānali ngasozat kasā Chaldeanwui raimibingna Jerusalemwui phākho kuikhamarei chi shaokhaimiserhaowa.

¹¹ Taihaikasā mibing, yāmhaida Babylon awungali yāmkasangbing, kala khangatateibingla raituk sāda raikānmewui kathāna Nebuzaradanna shimenthuiserhaowa.

¹² Kha kachām-khangaibing khani kathumli lui vākhavai yāmgui sākhavai taimi.

¹³ Kala Prohowui shimli sākahai pithraiwui pakra̱, pithrai eina sākakhui shamadrunao apheithingla zangda, Chaldeawui raimibingna shaokhaiserlaga Babylonli khuiunghaowa.

¹⁴ Hamla, berchala, meikhanitla, thao riktā khavai akhongla, kala Khorumshimli savai khavai khorkhong, pithrai eina kasā,

¹⁵ meiyaikhong, koklui, saikora khuithuiserhaowa. Raikānwui kathāna china, sinā eina kasā, lupā eina kasā khuithuiserhaowa.

¹⁶ Solomonna sasang kahai pakra̱ khani, shamadrunao kala aphei, kala pithrai eina kasā khorkhong saikora chi chungnahaida maonrarmana.

¹⁷ Pakra̱ akhawui kajui khuining tharāda chishata, chiwui atungli pithraiwui agui akha sāsanga, agui chiwui kasang khuining kathumna; kala pithrai eina kabothei kuimareida yeksanga. Pakra̱ kakhane chila tākamhaipapama.

Babylonli Judah Mibing Khuikhavā

¹⁸ Raikānwui kathāna china pāngmon kharei Seraiah kala pāngmon kakhane Zephaniah, kala khāmong khamayona athum kathumli tukkhui;

¹⁹ kala raiwui atamli thānkhamewui otva̱ akha, kala keinung chili awungawui hangva̱ phangā leikasā chi tukkhui; kala ngaleiwui mibingli kazipkhuida raithānwui kapimeli ngasoda ngalei chiwui mi keinungli leikasā hangtharukla tukkhui.

²⁰ Raikanmewui kathāna Nebuzaradanna athumli tukphungda Riblahli Babylon awungawui pāngli khuiungmi.

²¹ Kala Babylon awungana athum katongali, Hamath ngaleiwui Riblah chili sāthatserhaowa. Chithāda sāda Judahli awui ngaleiwui eina ayarli tukthuiserhaowa.

Judahwui Lammunga, Gedaliah

²² Judah ngaleili notha kahaibingwuitungli mungkhavai, Shaphanwui nao Ahikamna kapharā Gedaliahli Babylon awungana lammunga sākhavai kapangsanga.

²³ Babylon awungana Gedaliahli lammunga sanghaira kaji mibingna kashā tharan, ram chili khalei raimi kathānabing kala khangatateibingla Gedaliahli samphang khavai Mizpahli vāsera; amingbing chiya; Nethaniahwui nao Ishmael, Kareahwui nao Johanan, Netophathli khalei Tanhumethwui nao Seraiah, kala Maacathpa Ja-azaniahna.

²⁴ Gedaliahna mingzaida athumli kala athumwui mibingli hānga, “Chaldeawui otva̱bingli mangacheelu, apam hili pamda Babylon awungawui otram ngatha̱lu, chithakha khikha mathālakmara.”

²⁵ Kha kachāng kashineli, Elishamana kapharā Nethaniahwui nao wungva̱pa Ishmaelna, mi tharā thānphunglaga Gedaliahli kala ali ngasokasā Jehudiwui mibing, Chaldeawui mibing saikorali Mizpahli shaothatserhaowa.

²⁶ Chi theilaga Chaldeawui mibingli ngacheehaida khararnaosan mateila raithānabingla Egyptli yāmvāserhaowa.

Jehoiachinli Phātop eina Kachiho

²⁷ Judahwui awunga Jehoiachinli tukthuida thumrāda kashine kum, kachāng tharāda kakhanewui zimiksho maga̱da kashinethang, Evil-merodakh, Babylonwui awungana mungkaphok eina, Jehoiachinli lumashanda phātopwui eina chihomi;

²⁸ kala ali mathālak eina ngahānmida Babylonli khalei wungnaobingwuitungli chipama.

²⁹ Chithāda Jehoiachinna phātop kachon mangaveiluithuwa. Kala thangkachida awungali phazāngarumchinga;

³⁰ kala ringlakha eina tangda awui sāvai khavai pheisāla thangthangwui vang awungana michinga.