2 WUNGNAOBING 22 - Kathara Bible (BSI)

Judahwui Awunga Josiah

¹ Josiahna mungkaphok tharan awui kum chishat kāshunghairasai, kala Jerusalemli kum thumrāda akha munga. Ava̱va̱wui ming Jedidah hoi, Bozkathli khalei Adaiahwui naongalāva̱na.

² Ana Prohowui mangāli khamashung ot sai, kala avāva̱ Davidwui thāda khangarong apongli zatchingda uishong yāshongla mangareithuihaimana.

Ain Lairik Samkaphang

³ Kum tharāda chishat kākashung eina awunga Josiahna kapime Shaphan, kaja Meshullamwui nao Azaliahna kapharā chili Prohowui shimli chihokāda hānga,

⁴ “Pāngmon kharei Hilkiahli kahānglu, kaja Prohowui shimli khuikharā pheisā khāmong khamayonbingna mibingwui eina kazipkhui kahai chi shānkhuiranu;

⁵ kala chi Prohowui shim kasāli yangkhamibingwui pāngli sangmihaoranu; kala Prohowui shim kachiphobingli miranu;

⁶ kaja, mistribing, shim kasābing, ngalung kasingbing, kala thing lokhavai eina ngalung kasingwui aman mihaoranu.

⁷ Kha athumli misang kahai pheisā chiwui pongli mangathingranu, kaja athumna ning tharlak eina sāda lei.”

⁸ Kala Pāngmon kharei Hilkiahna kapime Shaphanli hānga, “Prohowui shimlungli ain Lairik chi ina samphanghaira.” Kala lairik chi khami eina Shaphanna pāyanga.

⁹ Shaphan kapimena awungali, “Naraobingna Prohowui shimli leikasā pheisā saikora chi khuilaga shim yangkhamebingwui pāngmonli horsangmiserhaira.” da unghānga.

¹⁰ Kapime Shaphanna, “Pāngmon Hilkiahna ili lairik akha mihaida lei.” da awungali hānga. Kala ana awungawui mangāli pāchithei.

¹¹ Awungana ainwui lairikli kapihaikasā chi kashā tharan, awui kachon serkhākta,

¹² awungana pāngmon Hilkiah, Shaphanwui nao Ahikam, Micaiahwui nao Achbor, kapime Shaphan kala awungawui rao Asaiah athumli kasoda hānga,

¹³ “Iwui vang, mibingwui vang, Judahwui vang samkaphang lairik chiwui tui chi Proholi vāngasanlu; kaja ithumli makhamayāwui vang Prohowui lungvāt haklakhaira; khikhalajila ithumwui pongli hāngmi kahai saikora chiwui athishurda ishāvā ngarāna tui chi mamayonthuwa.”

¹⁴ Chiwui athishurda pāngmon Hilkiah, Ahikam, Achbor, Shaphan kala Asaiah, athumna marānva̱ Huldah, ava Harhasna kapharā Tikvahwui nao, kachonkakhopwui yangkhame Shallumwui apreiva̱na (atam chili ana Jerusalemwui shim kakhane chili pamsai); athumna ali ngasanngaruma.

¹⁵ Kala ana athumli hānga, “Proho Israelwui Varena hithāda hānga: ‘Nathumli iwuili chihokharā mi chili unghānglu,

¹⁶ Prohona hithāda hānga, Yanglu, ngalei hili kala hili kapambingwuitungli Judah awungana lairik hi pālaga theikakhui kalākashi saikora chi ina khuirāra.

¹⁷ Khikhalajila athumna ili malaihaida vare khangateili nganamkaphā thao riktālaga athum pāng eina sākakhui saikora china ili malungvāt ngasakhaira; chiwui vang apam hili iwui malung kakang masuitāluimara.

¹⁸ Kha Proholi ngahānkhui khavai chihokharā Judah awungali hithāda unghānglu, Proho Israelwui Varena hithāda hānga: Nana shākahai tui hiwui pongli,

¹⁹ khikhalajila nawui ning ngateida Prohowui mangāli hamkasangwui vang, ngalei eina hiwui mibingli ina khonkashi kala kashimān rāki kaji tui nana kashā tharan kachon serkhākta kachapwui vang, inala nawui tui khuisangmihaira da Prohona hānga.

²⁰ Chiwui vang eina yanglu, ina nali chingri eina thingasakta kalākashi shokki kaji saikora hi nawui thotli mashok ngasakmada namik eina matheimara.’” Athumna tui chi awungali unghānga.