2 WUNGNAOBING 17 - Kathara Bible (BSI)

Israel Awunga Hoshea

¹ Judahwui awunga Ahazna mungda khamaga̱ kum, Elahwui nao Hosheana Israelwui awunga sāda Samariali mungphoka, kala kum chiko munga.

² Prohowui mikyanli makaphā chi ana sai, chithālala awui mangāli leikasā Israel awungabing mathāmana.

³ Assyriawui awunga Shalmaneserna ali rai rātāda shai zanga kala ali shai michinga.

⁴ Kha Hosheana yankasai chi Assyriawui awungana theihaowa, kaja Egyptwui awunga Soli khangathum paome chihovāda Assyriawui awungali kumkachidawui shai mamithuwa. Chiwui vang Assyriawui awungana ali tukkhuida phātop sanghaowa.

Samaria Kongkhalui

⁵ Chiwui thili Assyriawui awungana ngalei saikorali rai rātāda Samariali kum kathum kuinampama.

⁶ Hosheana mungda kachiko kum, Assyriawui awungana Samaria khuihaowa, kala Israelwui mibingli tukungserhaida athumli Halahli, Gozanwui kongphei Haborli, Medenaobingwui keinung keinungli chipamvāhaowa.

⁷ Kashok saikora hi athumwui Proho Vareli ngakaishida Israelnaobingna morei kasāwui vangna, kaja awunga Pharaohwui pāngli leisāda Egyptwui eina thānshokkhame chili malaihaida vare kateili khorumhaowa;

⁸ kala Prohona Israelnaobingwui vang kashamshokmi kahai miyurbingwui khangachā zatkhanā, kala Israel awungabingna kasā ngashan chili zathaowa.

⁹ Athumwui Proho Varewui mangāli makhamashung otbing chi Israelnaobingna ngathumda sai. Raikānphung eina thuilaga keinung ungshungda athumwui vang kajujui apam sākhui;

¹⁰ kaphungtonli, matekchim kahai thingphei kachiva̱li lungshomla kala Asherimla sakai;

¹¹ kala athumwui mangāli Prohona khuithui kahaiya miyurbingna kasā thāda kajujui apamli nganamkaphā thao riktai. Prohona malungvāt khavai athumna makhayā otmāng sai,

¹² Prohona meoma̱li, “Nathumna chili makhorumpaimana” da hāngkahai chili athumna khoruma.

¹³ Chithālala, “Iwui rao marānbingli chihoda navā ngarāli ina kaso kahai iwui ain saikora chiwui athishurda makaphāwui eina mai ngareiunglaga iwui ningkhami kala shiyan-chikan mayonlu” da Prohona Israel eina Judahli awui marān kala kathei kachiva̱li hāngmathin ngasaka.

¹⁴ Kha athumwui Proho Vareli mashitkasanga avāva̱ ngarāna kasā thāda ngakaishida manganāsangthuwa.

¹⁵ Awui shiyan-chikan, kala avāva̱ ngarāli tuingashit kasā kala athumli hāngkhamathin chili ningkachaihaowa. Makhamashunga meoma̱wui thi shurda athum mamashungthuwa, athumwui thāda sāshara da Prohona kaso kahai, athumli kuimareida khalei yurbingwui thi shurthuihaowa.

¹⁶ Athumna Proho Varewui kakaso saikora chi horhaida, athum khalattawui vang heikakhui seinao khani sākhuihaowa; kala Asherahla sākhuida zimik kachāng sirāli khoruma, kala Baalli otram ngatha̱ya.

¹⁷ Chigat khavai athumna naongarā, sha̱naola mayarnaola riktai; khanongla sai, laivāla sai, kala Proholi malungvāt ngasakta awui mikyanli makaphā sākhavai athum khalatta makhayā otli yorsanga.

¹⁸ Chiwui vang Prohona Israelli malungvātnahaida awui mikyanwui eina horhaida; Judahwui shang maningla khangatei maleisāmana.

¹⁹ Judahnala athumwui Proho Varewui shiyan chikan mamayonmana, kha Israelna sākachithei ngashan chili zathaowa.

²⁰ Chieina Prohona Israelwui ara̱-azā saikorali mamayāthuwa, kala chotchāng ngasakta awui mangāwui eina ayarli mahorhaichaoranglakha eina tangda shimān khangasakbingwui pāngli horsangmihaowa.

²¹ Ana Davidwui shimkhur eina Israelli khuithui kahai chitharan athumna Nebatwui nao Jerobaomli awunga sāngasaka. Kala Prohowui thi mashur ngasakla Jeroboamna Israelnaobingli morei kachungkha sāngasaka.

²² Jeroboamna morei kasā saikora chili Israelwui mibingnala sai.

²³ Awui rao marānbingli hāngmi khangasak athishurda Prohona awui mikyanwui eina Israelli horhaichao majiranglakha eina tangda Israelnaobingna ning mangateimana. Chiwui vang Assyriali kashamvāhaida Israelnaobing aja eina tangda chili pamda lei.

Assyriabingna Israelli Rākapan

²⁴ Assyriawui awungana Israel naobingwui mahutli Babylon, Cuthah, Avva, Hamath kala Sepharvaimwui eina mi khuirālaga Samariawui keinungbingli chipama; Samaria chi athumwui ngasāthuihaoda keinung keinungbingli pānngasaka.

²⁵ Athumna chili pānphokkhareli Proholi mangacheemana; chiwui vang Prohona kazingkha̱ athumwui alungli chihorāda mi kasāthathaowa.

²⁶ “Nana Samariali mi khuiphungda kachipambingna apam chiwui varewui ain matheimana; chiwui vang ana kazingkha̱bing chihorāda, yanglu, athumli makeithathaira” kaji pao Assyriawui awungali hānga.

²⁷ Chieina Assyriawui awungana, “Apam chiwui eina khuithui kahai pāngmon akha chili chihovālu, kala ana chili pamda ngalei chiwui varewui ain chi tamchithei ngasaklu.” da kasoi.

²⁸ Chiwui vang Samariawui eina khuithui kahai pāngmon akha vāda Bethelli achipama, kala Proholi kathāda athumna ngacheerakhala kaji athumli tamchithei.

²⁹ Kha chithālala yur kachiva̱na kachichā shiwui kameo sākhuilaga kachichā yurna pamkhavaipamli Samariawui mibingna sāhaikasā kajujui apamwui kameoshimbingli haihai;

³⁰ Babylonwui mibingna Succoth-benoth sākhui, Cuthwui mibingna Nergal, Hamathwui mibingna Ashima,

³¹ Avviwui mibingna Nibhaz eina Tartak sākhui; kala Sepharnaobingna naongarāli Sepharvaimwui vare Adrammelech eina Anammelechli meili riktai.

³² Athumna Proholila ngacheeya, kala mi samkaphangphang kajujui apamwui pāngmon sāda kajujui apamli pha̱kaphayā ot sāmi.

³³ Athumna Proholi ngacheeya kha athum ngachaiwui eina khuithui kahai yurbingwui kasā khavā thāda athumwui varebinglila otram ngatha̱ya.

³⁴ Aja eina tangda kharewui kasā khavā thāda sachingdalei. Athumna Proholi mangacheemana, kala awui ain kala shiyan-chikan nilala kala ningkhami nilala, Israella kaho Jacobwui naongarāli kaso kahai chi athumna akhala mamayonmana.

³⁵ Prohona tuingashit akha sāda athumli hānga, “Vare khangateili ngacheeda makhorumalu, otramla mangatha̱alu, kapha̱la mapha̱alu;

³⁶ kha pangshap kharei eina pāng katingmida Egyptwui eina nathumli thānshokkhame Proholi ngacheelu; nathumna ali khorumra kala ali pha̱phayāra.

³⁷ Kala nathumwui vang kapimi kahai shiyan-chikan, ain kala kakaso ning ngasharda nathumna mayonra. Vare khangateili nathumna mangacheepaimana,

³⁸ kala ina nathumli ngashitmi kahai chi mamalaipaimana. Vare khangateili mangacheepaimana,

³⁹ kha Proho nathumwui Vareli ngacheelu; kala yangkashibingwui eina ana nathumli kanmira.”

⁴⁰ Chithālala athumna manganāsangla kharewui kasā khavā tākam eina sai.

⁴¹ Chiwui vang yurbing hina Proholi ngacheeya, kala sākakhui meoma̱lila khoruma; kala athumwui naongarā kala ara̱-azānala awova̱ ngarāwui kasā thāda aja eina tangda sāda lei.