2 WUNGNAOBING 16 - Kathara Bible (BSI)

Judahwui Awunga Ahaz

¹ Remaliahwui nao Pekahna mungda tharāda kashine kum, Jothamwui nao Ahazna Judahli thuimunga.

² Ana thuikhamung tharan kum maga̱ kāshunghairasai, kala kum tharāda tharuk Jerusalemli munga. Avāva̱ Davidna kasā thāda masāla, Prohowui miktāli ana makhamashung otmāng sai;

³ Israelwui awunga khangateibingwui thishura. Israel mibingwui vang kasham kahaiya yurbingwui ningkakachai otsak chi anala sāda anaomayara eina tangda pha̱phayāda meili riktai.

⁴ Kajujui apambingli, kaphungtonli, kala khamatek thingrongwui azingzingli ana pha̱phayāda nganamkaphā thaola riktai.

⁵ Chiwui thili Syriawui awunga Rezin eina Remaliahwui nao Israelwui awunga Pekahna Jerusalemli rai ngararda Ahazli akuinama, kha ali mayuirarthuwa.

⁶ Atam chitharan Edomwui awungana Elath hankhuihaida Judahwui mibing saikora Elathwui eina kashamserhaowa. Kashamhaida Edomwui mibingna Elathli rāsomda aja eina tangda khalei hina.

⁷ Chiwui vang Ahazna Assyriawui awunga Tiglath-pileserli pao chiphunda hānga, “Iya nawui raona kala nanaona. Ili ngararda khalei Syriawui awunga eina Israelwui awungawui pāng eina ili kharākankhuimilu.”

⁸ Ahazna Prohowui shimli khalei kala awungawui lanshimli khalei sinala, lupāsāla kapeokhuilaga Assyriawui awungali kachigat sāda chihovai.

⁹ Assyriawui awungana mayāmida Damascusli akai, kala mi kachungkha Kirli tukvāhaowa, Rezinlila shaothathaowa.

¹⁰ Ahaz awungana Assyriawui awunga Tiglath-pileserli samphang khavai Damascusli khavā tharan chili leikasā hanphut chi thei. Uriah pāngmonli, hanphut chi tākam eina sākakhui ama̱nao akha Ahaz Awungana chihovai.

¹¹ Kala Damascuswui eina awunga Ahazna kachiphun ama̱nao chi tākam eina Uriahna hanphut akha sākhui, kala awunga Ahaz malatungranglakha sākuphairasai.

¹² Awungana Damascuswui eina latkhaung tharan ana hanphut chi ungyanga. Kala hanphut chiwui ngalemli vāda chili kai,

¹³ kala rikkatā kachigat, tharāzat kachigatla sai, ra̱shakchigatla sāda ningyatchigatwui ashee chi hanphutli yikrora,

¹⁴ Rida Prohowui mangāli leikasā pithraiwui hanphut chi, ana Prohowui shimwui mangā eina awui hanphut ngachaili leikasā chiwui eina khuithuihailaga awui hanphutwui atungshong haihaowa.

¹⁵ Awunga Ahazna Uriah pāngmonli hithāda kasoi, “Kahaka hanphut hiwuitungli ngathorwui rikkatā kachigat, kala ngazin tharāzatchigat, kala awungawui rikkatāchigat, awui tharāzat kachigat, ngalei chiwui mibing saikorawui rikkatā kachigat, athumwui tharāzat kachigat, ra̱shakchigat; kala rikkatā kachigatwui ashee kala pha̱kaphayā saikorawui ashee chi hili yikrorserlu; kha pithraiwui hanphut hiya awungawui ngahānkhui khavai sāra.”

¹⁶ Awunga Ahazna kakaso chi makailakla Uriah pāngmonna sai.

¹⁷ Awunga Ahazna khongsai rungkhavai aphei chi sāteklaga ra̱khon chi, pithrai eina kasā seiwuitungli mahailuila ngalungtungli, runghai.

¹⁸ Kala Assyriawui awungawui vang eina, sabbaththang awungana zangkhavai dolanlungli sākahai kala khāmong shokshungda sākahai shongfanao chila khuishokhaowa.

¹⁹ Ahazwui otsakbing saikora Judah Awungabingwui Thotrinchān Lairikli makapiserhaimala?

²⁰ Ahaz thikahai eina avāva̱ ngarāli ngasoda Davidwui keinungli chifahaowa; kala anaomayara Hezekiahna awui mahut thuishinhaowa.