2 WUNGNAOBING 15 - Kathara Bible (BSI)

Judahwui Awunga Azariah

¹ Israelwui awunga Jeroboamna mungda, maga̱da kaphangā kum, Amaziahwui nao Azariahna Judahwui awunga sāphoka.

² Ana mungkaphok atamli kum tharāda tharuk kāshunghairasai, kala ana Jerusalemli kum hangphangāda khani munga. Ava̱va̱wui ming Jecoliah hoi.

³ Avāva̱ Amaziahna kasāsāwui athishurda ana Varewui miktāli khamashung chi sai.

⁴ Chithalala kajujui apambing chi makhuithuimihaithuda mibingna pha̱kaphayā otla nganamkaphā thao rikkatāla kajujui apambing chili sāchinghaowa.

⁵ Ali Prohona tandi mida phārrei kazāhaowa, kala mathiranglakha eina tangda shim khangatei akhali chipamhai. Kala anaomayara Jothamna shimkhurwui otla, kala khamungwui otla yangmithathuia.

⁶ Azariahwui kasākhavā, kala ana kasā saikora Judah Awungabingwui Thotrinchān Lairikli makapiserhaimala?

⁷ Azariah thikahai eina avāva̱ ngarāwui ngalem, Davidwui keinungli chifahaowa; kala anaomayara Jothamna awui mahut thuishina.

Israelwui Awunga Zechariah

⁸ Judahwui awunga Azariahna mungda thumrāda kachishata kum, Jeroboamwui nao Zechariahna Samariali Israelwui awunga sai, kala kachāng tharuk munga.

⁹ Avāva̱ ngarāna kasā thāda anala Prohowui mikyanli makaphā chi sai. Israelli morei sākhangasaka, Nebatwui naomayara Jeroboamna kasā chiwui eina ana mangareithuimana.

¹⁰ Ibleamli leilakha Jabeshwui nao Shallumna makhamayāwui vang ngathumda mithit khalen sāda sāthathaowa, kala awui mahut ana awunga thuishina.

¹¹ Zechariahwui kasā otsakbing chi, yanglu, Israel Awungabingwui Thotrinchān Lairikli kapiserhaida lei.

¹² (Hi Prohona Jehuli, “Nanao mayarabingna thot khamate eina tangda Israelwui wungpamkhongli pamra.” Kala chithāda rāshoka.)

Israelwui Awunga Shallum

¹³ Jabeshwui nao Shallumna mungkaphok atamli, Judahwui awunga Uzziahna Judahli mungda kum thumrāda chiko kāhairasai. Samariali Shallumna kachāng akha munga.

¹⁴ Chiwui thili Gadiwui naomayara Menahemna Tirzahwui eina Samariali vālaga Jabeshwui naomayara Shallumli sāthathaowa, kala ana mahut thuishinhaowa.

¹⁵ Shallumwui kasāsā otsakbing kala ana ngathumda yuishāt ot kasā chi, yanglu, Israelwui Awungabingwui Thotrinchān Lairikli kapiserhaida lei.

¹⁶ Atam chili Tirzah eina thuilaga Tappuah katonga, Menahemna yuiserhaowa, khikhalajila athumna ali mahamsangmara jihaoda ana athumli yuikhuilaga nao khavai sha̱nao saikora kaikhanini sāmihaowa.

Israelwui Awunga Menahem

¹⁷ Judahwui awunga Azariahna mungda thumrāda kachiko kum, Gadiwui nao Menahemna Israelli mungphoka, kala Samariali kum tharā mungsai.

¹⁸ Prohowui mikyanli ana makaphā chi sai; Nebatwui nao, Israelli morei sākhangasaka Jeroboamwui morei saikorawui eina awui mirin peida mangareithuimana.

¹⁹ Assyriawui awunga Pulna ngalei chili rākaida; Menahemna awui wungpangshap kasing mayāmi khavai lupāsā kg. thing thumrāda mati kharit khuimi.

²⁰ Kala Assryriawui awungali mikhavai pheisā chi Israelwui kashāngbing mi kachiva̱wui eina lupā hangphangārip ngashaikhui. Chiwui vang Assyriawui awunga chili mapamluila aramli unghaowa.

²¹ Menahemwui otsakbing kala ana kasā saikora Israel Awungabingwui Thotrinchān Lairikli makapiserhaimala?

²² Menahem thihaoda anaomayara Pekahiahna awui mahut thuishina.

Israelwui Awunga Pekahiah

²³ Judahwui awunga Azariahna kum hangphangā kākashung atamli Menahemwui nao Pekahiahna Israelwui awunga sāda Samariali mungphoka; kala kum khani munga.

²⁴ Prohowui mikyanli ana makaphā ot sāda, Israelli morei sākhangasaka, Nebatwui nao Jeroboamna kasā chiwui eina mangareithuimana.

²⁵ Awui raithāna Remaliahwui nao Pekahna Gileadwui mi hangphangāli ngasoda ngathumda mithit khalen sāda ali sāthathaowa, kala ana awui mahut thuishina.

²⁶ Pekahiahwui otsakbing kala ana kasāsā saikora, yanglu, Israel Awungabingwui Thotrinchān Lairikli kapiserhaida lei.

Israelwui Awunga Pekah

²⁷ Judahwui awunga Azariahwui hangphangāda kakhane kum, Remaliahwui nao Pekahna Samariali Israelwui awunga sai, kala kum maga̱ munga.

²⁸ Prohowui mikyanli ana makaphā chi sai; kala Israelli morei sākhangasaka, Nebatwui nao Jeroboamna morei kasā chiwui eina mangareithuimana.

²⁹ Israelli Pekahna munglakha Assyriawui awunga Tiglath-pileserna rāda Ijon, Abel-beth-maacah, Jan-oah, Kadesh, Hazor, Gilead kala Galilee, Naphtaliwui ngalei katonga yuikhuihaowa; kala mibingla Assyriali tukvāhaowa.

³⁰ Chiwui thili Uzziahwui nao Jothamwui khamaga̱ kum Elahwui nao Hosheana Remaliahwui nao Pekahli ngathumda ngasankhuida sāthathaowa, kala awui mahut thuishina.

³¹ Pekahwui otsakbing kala ana kasāsā saikora yanglu, Israel Awungabingwui Thotrinchān Lairikli kapiserhaida lei.

Judahwui Awunga Jotham

³² Remaliahwui nao, Israelwui awunga Pekahna mungda kakhane kum, Judahwui awunga, Uzziahwui nao Jothamna mungphoka.

³³ Awui zingkum maga̱da phangā kākashung tharan ana mungphoka kala kum tharāda tharuk Jerusalemli munga. Ava̱va̱li Jerusha hoi, Zadokwui naongalāva̱na.

³⁴ Avāva̱ Uzziahna kasā athishurda anala Prohowui mikyanli khamashung chi sai.

³⁵ Chithālala kajujui apambing makhuishokmihaithuda, mibingna chili pha̱phayai kala nganamkaphā thao riktai. Prohowui shimwui atungshongwui ngavei chi ana sakai.

³⁶ Jothamwui otsakbing kala ana kasāsā saikora Judah Awungabingwui Thotrinchān Lairikli makapiserhaimala?

³⁷ Chiwui atamli Judahli makhamayāwui vang Syriawui awunga Rezin eina Remaliahwui nao Pekahli Prohona Judahli ngarar khavai chihoi.

³⁸ Jotham thikahai eina avāva̱ ngarāli ngasoda Davidwui keinungli chifahaowa; kala anaomayara Ahazna awui mahut thuishina.