2 WUNGNAOBING 12 - Kathara Bible (BSI)

¹ Jehuna mungda kashine kum Jehoashna mungphoka kala Jerusalemli kum hangmati munga. Ava̱va̱li Zibiah hoi, Beer-shebawui einana.

² Jehoashna awui mirin peida Prohowui mangāli khamashung otmāng sai, kaja ali pāngmon Jehoiadana ngakuimi.

³ Chithalala kajujuipambing chi makhuithuimihaimana; chiwui vang mibingna pha̱kaphayā nganamkaphā thao rikkatā ot sāchinga.

⁴ Jehoashna pāngmonbingli hānga, “Prohowui shimli khuikharā kathara otbingwui pheisā chi, kaja mi kachiva̱wui eina khuiphalungki kajina, mipha̱wui eina ngashaikakhui kala kachichā khalatta mingairereo eina Proholi rākachigat saikora chi;

⁵ pāngmon kachiva̱na kachichāwui theikhamasuibingwui eina khuirāda shim chipho kapaibing athumli chiphoranu.”

⁶ Kha awunga Jehoashna mungda maga̱da kakathuma kum eina tangda pāngmonbingna shim chi machipholakthuwa.

⁷ Chiwui vang awunga Jehoashna pāngmon Jehoiadalila kala pāngmon khangateibinglila hokhuida hānga, “Khisāda nathum shim chi machiphothukhala? Chiwui vang eina ara theikhamasuibingwui eina pheisā makhuiluialu, kha shim chipho khavai mihaolu.”

⁸ Pāngmonbingna miwui eina pheisā makhuimara, shimla machiphomara da mayāhaowa.

⁹ Jehoiada pāngmonna oko akha khuilaga ashamli akhurnao saphuthai; kala Prohowui shimli zangkhavai hanphutwui yāshong ngalemli haihai; kala khāmong khamayona pāngmonbing china, Prohowui shimli rākhamimi pheisā chi chili sanga.

¹⁰ Kala okolungli pheisā chunghairada kathei tharan awungawui kapime eina pāngmon kharei china kāshānkhuida Prohowui shimli samkaphang pheisā chi khaobingli khalapshantithai.

¹¹ Ngarak kahai lupā chi Prohowui shim kasāli yangkhamebingwui pāngli horsangmi; kala athumna mistribing, ot kasābing,

¹² ngalung kashaobing, ngalung kaharbing kala Prohowui shim kachipholi thing ngalung lokhavai kala zangkhangayiyi chili athumna mishoka.

¹³ Kha Prohowui shimwui vang lupāsāwui khongsai, changjee, koklui, talla̱ ̱, maningakha sināwui khongphei khongphāng, lupāsāwui khongphei khongphāng Prohoshimli rākachigat pheisā chieina masākhuirangsai,

¹⁴ kaja Prohowui shim kachiphobingli miserhaowa.

¹⁵ Kala ot kasābingli mikhavai pheisā kasingbingli pheisā kachisinwui pongli khipānakha makazikazāmana, kaja athum ning tharlak eina sai.

¹⁶ Khayonchigatwui pheisā eina suihamchigatwui pheisā Prohowui shimli makhuirāmana; chiya pāngmonbingwui vang sāhaowa.

¹⁷ Atam chitharan Syriawui awunga Hazaelna Gathli vāngararda chi khuihaowa. Kha Hazaelna Jerusalemlila ngararkida kasā eina,

¹⁸ Judahwui awunga Jehoashna, avāva̱ ngarā Judahwui awungabing, Jehoshaphat, Joram kala Ahaziah athumna sāmiman sāda tharchigat kahai lemmet kala akhalattawui sāmiman kachigat, chili lāngda Prohowui shimli kala awungawui shimli lan kazip khavaili khalei saikora Syriawui awunga Hazaelli chihovāhaowa. Chieina Hazaelna Jerusalemwui eina hanunghaowa.

¹⁹ Joashwui kasā khavā ana kasāsā saikora, Judah awungabingwui Thotrinchān Lairikli makapiserhaimala?

²⁰ Awui raobingna ngathumda ngasankhuilaga, Sillashong tākhavai shongfali khalei Millowui shimli Joashli sāthathaowa.

²¹ Ali sākathatbing chi, awui rao Shimeathwui nao Jozacar eina Shomerwui nao Jehozabadna. Alila avāva̱ ngarāli ngasoda Davidwui keinungli chifahaowa; kala anaomayara Amaziahna awui mahut thuishina.