2 WUNGNAOBING 10 - Kathara Bible (BSI)

Ahabwui Ara̱-azā Mutkhami

¹ Ahabwui naomayara hangshini Samariali leisai. Chieina Samariawui khamungabing, ararbing kala Ahabwui naomayarabingli khamayonabingli Jehuna chithi chiphunda hānga,

² “Iwui chithi hi nathumli rāshungkhaleoda, yanglu, nathumwui akhavāwui naomayarabing nathumli ngasopamda lei kala chili siguila, siguigarila, khutlaila kala raipan sakā kahai keinungla leiserda lei,

³ akhavāwui anaomayarawui ngachaili phāmeikap kaje kala kāshungmeikap kaje hākhuida avāva̱wui wungpamkhong tungli chipamlu, kala nathumwui akhavāwui shimkhurwui vang rai ngararlu.”

⁴ Kha athum ngacheekhailakhaoda hānga, “Yanglu, awunga khanina ali mayuithukakha kathāda ithumna khi sāthukrakhala?”

⁵ Chiwui vang eina konung akhavāla, keinung kashinala, ararbingla kala khamayonabingla khokkha sāda Jehuli pao chihovāda hānga, “Ithum nawui raosera, nana sālu kaji saikora ithumna sāra. Ithum khipālikha awunga khangatei maphāsangmara, nawui phāra kaji chi sālu.”

⁶ Chieina ana chithi kakhane chihoda hithāda hānga, “Nathum iwui mijang zangra jiakha kala iwui kahāng nganāga jiakha, nashi akhavāwui naomayarabingwui kui akhama hitharan hili khuirāserlu.” Awungawui naomayara, athum hangshini chi keinungwui khangam-khareibingna nganaosai.

⁷ Chieina athumli chithi chi rākashung tharan awungawui naomayara, athum hangshini chili kui rangkhuilaga sopkai eina Jezreelli chiphunvai.

⁸ Paomena, “Awungawui naomayarabingwui akui khuirāhaira,” da ali kahāng tharan, ana “Kazing mathangranglakha eina tangda ngavei zangkhavaili athum chi akhum khani eina haisalu.” da kasoi.

⁹ Ngathorshong ana shoklaga mibingli hānga, “Nathumwui khayon maleimana. Iwui akhavāli mamayāmada ngathumda mithit khalen sāda shaokathata chi ina; kha hibingli khipāna sākathat?

¹⁰ Prohona Ahabshi shimkhurwui pongli hāngkahai tuikhurkha eina tangda mangacheilakmara kaji hi theilu; kaja awui rao Elijahli hāng khangasak chi ungshung khangasakna.”

¹¹ Jezreelli Ahabwui shimkhur awui khangam-khareibing, awui ngasotnaobing, pāngmonbing, akha eina tangda mataila saikora sāthatserhaowa.

Awunga Ahaziahwui Theisā Sākathat

¹² Chiwui thili ana Samariali vai. Shongfali zatlakha, Beth-eked Seihomphungli vākashung tharan,

¹³ Judah awunga Ahaziahwui athei-asābingli samphangda ana hānga, “Nathum khipālongkhala?” Athumna ngahānkai, “Ahaziahwui theisāna, wungnaobingli kala awungva̱wui naomayarabingli asamphangsida kazatna.”

¹⁴ Ana hānga, “Athumli kharing eina tukkhuilu.” Chieina athumna kharing eina tukkhuilaga Beth-ekedwui leikhur akhawui alungli mi hangmati chi akhala matailakla sāthatserhaowa.

Ahabwui Leikasā Theisā Mutmi kahai

¹⁵ Ana apam chiwui eina kānkathui tharan Rechabwui nao Jehonadab ali rangarokrārāsai, kala shālam kasā eina, ali hānga, “Ina nali shitkasang thāda nanala ili shitsangla?” Jehonadabna, “Mha.” da ngahānkai. Jehuna hānga, “Chithakha, napāng ngarānkālu.” Ana pāng ngarānkakā eina Jehuna yonkhuilaga awui siguigarili kātong ngasaka.

¹⁶ Kala ana hānga, “Ili ngasovālu, kala Prohowui vang iwui ningkatong chi yangkhuilu.” Chithāda awui siguigarili tongngaruma.

¹⁷ Ana Samariali vākashung chitharan Prohowui tui Elijahna hāngkahai athishurda, Ahabwui mi Samariali khalei saikora akhala mataimila sāthatserhaowa.

Baalli Khokharumbing Kashimit

¹⁸ Chiwui thili Jehuna mi saikora kazipkhuida hānga, “Ahabna Baalli khokharum khikha maningmana; kha Jehu ina thukmeikhārda khorumra.

¹⁹ Chiwui vang eina ara Baalwui marānbing, ali khokharumbing kala pāngmonbing saikora iwuili horāserlu; khipākha machakshokla, kaja Baalli ina hakkhamahā pha̱kaphayā sāra; makharāpa chi thira.” Kha Jehuna Baalli khokharumabingli shaothat khavai awor kasāna.

²⁰ Kala Jehuna kasoda hānga, “Baalwui vang phanee khavai vaohaolu.” Chieina athumna vaohaowa.

²¹ Kala Jehuna Israel apam apeichaoda saikorali chihovai; kala Baalli khokharuma mi saikora rāsera, makharā akhala maleimana. Athumna Baalwui shimli zangda mangāshongla, khanukshongla pemhaowa.

²² Kashankachon kasinga chili hānga, “Baalli khokharumabingwui sāri athumli ngavaimiserlu.” Chieina ana athumwui vang sāri chi khuishokmi.

²³ Chiwui thili Jehuna Rechabwui naomayara Jehonadabli ngasoda Baalwui shimli zanga, kala Jehuna khokharumabingli hānga, “Hiwui alungli Baalli khokharuma mi maningla Prohowui rao akha eina tangda mazang khavai yangkazaklu.”

²⁴ Rikkatā kachigat kala pha̱phayā khavai zanga. Ayarli Jehuna mi hangchishat khangarān sāhailaga hānga, “Nathumwui pāngli ina horsangmi kahai athumwui ngachaili nathum kachikathāna yāmshok ngasakhaiakha chipāwui manglā shimānra.”

²⁵ Jehuna rikkatā hanphut kala pha̱kaphayā kachigat kupkhaleoda raimibing kala otva̱bingli hānga, “Zangsāthatserhaolu, akha eina tangda machakshokaranu.” Athumna sāthatser kahaiwui thili raimibing kala otva̱bing china Baalshimwui shim zangkhameiya kāli zanga,

²⁶ kala Baalwui lungshom chi khuishokta riktāmihaowa.

²⁷ Lungshomla, shimla pheimiserhaida aja eina tangda paishim sādalei.

²⁸ Chithāda Jehuna Israelwui eina Baal sāshimitmihaowa.

²⁹ Kha Jehuna Nebadwui nao Jeroboamna Bethel eina Danli sināwui seinaoli khokharum kala Israelnaobingli khorum khangasak chiwui moreiwui eina mai mangareiungmana.

³⁰ Prohona Jehuli hānga, “Iwui mikyanli nana khamashung ot kasāwui vang kala iwui kaphaning athishurda nana Ahabwui shimkhurli sākhamiwui vang, nanaomayarabing thot mati eina tangda Israelwui awunga sāra.”

³¹ Kha Israelwui Proho Varewui ain athishurda Jehuna ngasharda mazatmana; kaja Jeroboamna Israelli morei sākhangasakwui morei chiwui eina mai mangareiungmana.

Jehu Kathi

³² Atam chitharan Prohona Israel ngayarkhaiphokhaowa. Israelwui leiret ungshung vāshungda Hazaelna yuihaowa:

³³ Jordan eina thuilaga zingshoshong, Gileadwui ngalei katonga Gad, Reuben, Manasseh, Aroer eina Arnon tampāk ngalemli khalei, chiya Gilead eina Bashan katongana.

³⁴ Jehuwui otsak khangatatei kala ana sākahai saikora kala awui pangshap saikora Israel Awungabingwui Thotrinchān Lairikli makapiserhaimala?

³⁵ Jehu thikahai eina avāva̱ ngarāli ngasoda Samariali chifahaowa. Kala anaomayara Jehoahazna awui mahut thuishina.

³⁶ Samaria ngaleili Jehuna Israelli khamung chi kum maga̱da chishatna.