2 WUNGNAOBING 1 - Kathara Bible (BSI)

Ahaziah Kathi

¹ Ahab thikahaiwui thili Moabna Israelli thuingarara.

² Chitharan Samariali Ahaziahna awui mathāng atowui eina saotāda kazāhaowa; chiwui vang paome chihovāda hānga, “Vālu, kakazā hiwui eina I marainikhala Ekronwui vare Baal-zebubli angahānlu.”

³ Kha Prohowui kazingraona Tishbewui Elijahli hānga, “Ngakarthuida Samariawui awungawui paome chili ahānglu, ‘Israelli Vare maleithuda Ekronwui vare Baal-zebubli angahānki kajila?’

⁴ Chiwui vang Prohona hithāda hānga, ‘Nana pikhavai pet chiwui eina mangakarthuiluimara; kha na thilākhaora.’” Chiwui vang Elijah vāhaowa.

⁵ Paomebing china awungali latkhaung eina ana ngahāna, “Khisāda nathum latunghaokhala?”

⁶ Athumna ali hānga, “Mi akha ithumli rāngarokta ana hānga, ‘Nathumli chihokharā awunga chili latungda hānglu; kaja Prohona kahāngna, Israelli Vare maleithuda Ekronwui vare Baal-zebubli angahānki kajila? Chiwui vang eina nana pikhavai pet chiwui eina mangakarthuiluimara; kha na thiphalunghaora.’ da hānga.”

⁷ Ana hānga, “Nathumli samphangda rākahānga chi kachikathā mikhala?”

⁸ Athumna ngahānkai, “Sahā kachon ngavai, sāhui shānneira̱ neiya.” Ana hānga, “Hi Tishbewui Elijahna.”

⁹ Chiwui thili awungana hangphangāwui raithāna akha awui hangphangāli ngasoda chihovai. Ana kaphungtonli pamsāda Elijahli ahānga, “O Varewui mi, awungana, ‘Zanglu.’ da hānga.”

¹⁰ Kha Elijahna hangphangāwui raithāna chili ngahānkāda hānga, “I Varewui mi akhana jiakha, kazingwui eina mei tāda na kala nawui mi hangphangā chilila chuithathaoranu.” Chieina kazingwui eina mei tāda alila awui hangphangā chilila chuithatserhaowa.

¹¹ Awungana khangatei hangphangāwui kathāna kala awui hangphangāli ngasoda chihovāluishita. Ana awuili kāda, “O Varewui mi, hi awungawui kakasona, thākta zanglu” da hānga.

¹² Kha Elijahna ngahānkai, “I Varewui mi akhana jiakha, kazingwui eina mei tāda na kala nawui hangphangā chilila chuithathaoranu.” Chieina kazingwui eina mei tāda alila awui hangphangā chilila chuithatserhaowa.

¹³ Awungana kakathuma sāda hangphangāwui raithāna kala awui hangphangā eina ngasoda chihokāluishita, kala kālaga Elijahwui mangāli khuktilaga poi, “O Varewui mi, iwui manglā kala nawui rao hangphangāwui manglā hi nawui mikyanli sakta kaphaningmilu.

¹⁴ Yanglu, kharewui hangphangāngā kala kathāna khani chi aniwui hangphangāngā eina ngasoda kazingwui eina mei tāda chuithathaira; kha iwui manglā hi nawui mikyanli sakta kakhuimilu.”

¹⁵ Chieina Prohowui kazingraona Elijahli, “Ali ngasotālu, ali mangacheelu” da hānga. Chieina ngakarthuida ani awungawuili ngasounga,

¹⁶ kala ana hānga, “Prohona kahāngna, ‘Khikhalajila Ekronwui vare Baal-zebubli angahān khavai nana paome chihovai, ngahānkhui khavai Israelwui Vare makhaleiwui vangla? Chiwui vang eina nana kapi pet hiwui eina mangakarthuilui mara, kha na thiphalunghaora.’”

¹⁷ Chiwui vang Elijahna Prohowui tui chi kahāng athishurda a thihaowa. Judahwui awunga Jehoshaphatwui nao Jehoramna mungkakhane kum, agato Jehoramna awui mahut thuishinhaowa, kaja Ahaziah naomayara maleimana.

¹⁸ Ahaziahwui kasāsā saikora Israel Awungabingwui Thotrinchān Lairikli makapiserhaimala?