2 TIMOTHY 3 - Kathara Bible (BSI)

Khanaowa Zimiksho

¹ Hi theilu kaja khangachang zimiksholi kachotkachāng kachungkha rāra.

² Mibingna kachichā khalattali leishira, ngamara, lāngsora, khayāning nganingra, chipatra, ava̱ avāwui kahāng manganāmara, ningkashi matheimara, dharma maleimara,

³ lukhamashan matheimara, phaningkhami maleimara, mashātzara, khalatta khangarin maleimara, sāshira, kaphāli yangkharingra,

⁴ mikhanam, ningngaikasā, kachorkashi kala Vareli leikashebing mangasāla lumkhalaoli leikashebing ngasāthuihaora.

⁵ Athumna akorli phārekta dharmarinwui otsak sālaga kachangkhat chiwui pangshapliva makhuisangmara.

⁶ Kaja mibing chiwui ngachaili kaikhana shim shimli zangzatta moreina shiren kahai khangazana, phaningphāphā kaje sha̱naobingli suikhui.

⁷ Sha̱naobing china tamkhui khavai panglāk eina hotnai kha khamashung chi matamkhuirarmana.

⁸ Jannes eina Jambresna Mosesli makhamayā chithada ning makhalei kala shitkasang makhalei mibing china khamashung chili mamayāmana.

⁹ Chithālala athumwui chi kasāngkha majimara, kaja aniwui thada athumwui mangkhama̱ chi mi kachiva̱na theihaora.

Khanaowa Tamkachithei

¹⁰ Kha nana iwui tamkachithei, iwui acham-aram kala iwui mirinwui kharin chi shurkhuihaira, kala iwui shitkasang, iwui khāngkathei, iwui leikashi,

¹¹ ili rekakharek, kala ina kachotkachāng kaphung chi nana theikhuihaira. Antioch, Iconium kala Lystrali hāngkhavai makhalei rekakharek ina khānghaira kaji nana thei! Kha saikora hiwui eina Prohona ili kanshokmi.

¹² Kachangkhat eina Khrista Jishuwui lungli zangda tharda ringkhangai mi kachiva̱li rekharekra.

¹³ Makaphā kala sākharekbing chi zakshikhangai zakshimamānra, kateili chipatra, athum khalattala chipatra.

¹⁴ Kha nawui vanga nali tamchithei kahai khamashung chi sāchinglu kala chili shitsangtitlu. Nawui ojābing khipalongkhala kaji nana thei,

¹⁵ kala nganuilakhawui eina thuida, Khrista Jishuli shitkasang mangā eina huikhami samphang khavaiwui apongli thanvākhamiwui thangkhamei mishapa kathara tui chi nana theihaira kaji phaningunglu.

¹⁶ Kathara tui saikora Varena kasatkhami tuina. Chieina tamkachithei, hāngkhamachin, mashung khangasak kala khamashung khangarong tamchithei khavaiwui vang kannai.

¹⁷ Chiwui vang eina Vareli otram khangatha̱ chili khamathā ot sākhavai, sāri khangavai thada kāshung ngasaka.