2 THOTRINCHĀN 4 - Kathara Bible (BSI)

Khorumshimwui Otyur

¹ Solomonna pithraiwui hanphut akha sākhui, kala asān-aret ngaraichāda khuining maga̱, kala kajui khuining tharāna.

² Chiwui thili ana khanguma shamadrunao akha sākhui, makhārshing eina tamakha khuining tharā pāka, khuining phangā juiya, kuimareida tamakha khuining thumrā jiya.

³ Kala khuining thumrā eina kakhuiya arāp kuimareida ngaher khani shon thāda heishana.

⁴ Kala chi mukvā tharāda khaniwuitungli shonghai, kathumna atungshong, kathumna zingtunshong ngareivai, kathumna azingshong ngareitai kala kathumna zingshoshong ngareishoka kala akhamei ngasunripa.

⁵ Akhamong koklui kala timrāwonwui thai, kala pangmayā rikha shai; kala hina liter thinghangtharuk sha̱kha zanga.

⁶ Ana pheokhavai khongsai tharā sākhui; kala azingshong phangā, zingtunshong phangā da haihai. Hi rikkatāwui ot pheokhavaina, kala ra̱khong chi pāngmonbing ra̱vai khavaina.

⁷ Ana hāngkahai chiwui athishurda sināwui thaomeishong tharā sālaga khorumshim alungli azingshong phangā, zingtunshong phangā da khaninghai.

⁸ Tablela tharā sākhuida khorumshim lungli azingshong phangā, atungshong phangā, zintunshong phangā da khaninghai. Kala khongsai shākha sinā eina sākhui.

⁹ Pāngmonbingwui yāngkhup eina kahaka yāngkhupla sākhui kala chiwui khāmongbingla pithrai heirorsera;

¹⁰ kala ra̱khong chi azingshongwui zingsho achikunli haihai.

¹¹ Huramna hamla, sākapeila, khongsaila sākhuisera. Chithāda Varewui shimli haikhavai Awunga Solomonwui vang sākhami Huramna sakakup;

¹² pākra̱ khani, koklui khani, kala pākra̱ khanitungli sākasang agui khani chili faror khavai rakkakhui chila;

¹³ rakkakhui khani chiwui kabothei shāmati, rakkakhui ava̱va̱wui vang kabothei ngaher khani, china pākra̱ khaniwuitungli sākasang koklui katha agui khaninili romkhavaina.

¹⁴ Khongsaila, kala khongsai khaning khavai apheila,

¹⁵ ra̱khongla, kala chi rungkhavai mukkābing chila ana sākhui.

¹⁶ Ham, belja, marik-kapei, kala khorkhong saikora Prohowui shimli haikhavai Awunga Solomonwui vang Huramabina pithrai eina sāmisera.

¹⁷ Hibing hi Jordan tampākli khalei Succoth eina Zeredah ngachaiwui leikhon ngaleili heikhuisera.

¹⁸ Solomonna sākakhui otbing chi kachungkhahaoda pithrai kayākha zangkhala kaji mashānkhuirarmana.

¹⁹ Chithāda Varewui shimli kahai Solomonna sākakhui otbing chiya; sināwui hanphut, Ngasokhamiwui khamui haikhavai table,

²⁰ hāngmi kahai thāda alungshongwui kāli shārkhavai thaomeila, thaomeishongla;

²¹ kala awonla, thaohmeila, changjeela sinā kachanga eina sāsera;

²² meikhanitla, khongsaila, khongpheila, nganamkaphā thaowui meikhongla sinā eina sāsera. Kala khorumshimwui khāmong, tharmathengmeikap kaje alunga kāwui khāmong kala kā khareiwui khāmongla sinā eina sāsera.