2 THOTRINCHĀN 35 - Kathara Bible (BSI)

Josiahna Makānkhami Phanit Khamayon

¹ Josiahna Prohowui mangāli Jerusalemli makānkhami phanit akha sāda kazipa, kala kachāng kharewui zimiksho tharāda khamatethang makānkhami yao taithata.

² Ana pāngmonbingli athumwui apamli kapangsangda Prohowui shimli otram ngatha̱ khavai kakasatla kasatsanga.

³ Kala Israel saikorali tamkachitheia Prohowui mangāli kathara Levibingli hānga, “Davidwui naomayara awunga Solomon Israelwui awungana sākahai shim chili kathara oko chi haihaolu; chi nathumwui yartuili mangava̱zatluialu. Ara nathumwui Proho Vareli kala awui Israel mibingli otram ngatha̱thulu,

⁴ Nathumwui avāva̱ ngarāwui shimkhur khumkhum eina ngayar kakhui athishurda kala Israelwui awunga David eina awui naomayara Solomonna chitheikhami athishurda nathum khalatta ngayeikhuilu.

⁵ Kala avāva̱wui shimkhurwui akhumbing chiwui athishurda katharapam chili nganinglu, kala Levi ava̱va̱wui shimkhur kachiva̱wui vang yar leiranu.

⁶ Kala makānkhami yao chi taithatta nathum khalatta tharkhuilu, kala Prohowui tui Mosesli hāngmi khangasak athishurda nathumwui chinaongarāwui vangla ngarānlu.”

⁷ Chieina Josiahna chili kharābingwui vang makānkhamiwui kachigat sāda yaonao eina menao thingthumrā, kala mukkā thing kathum, ana misera.

⁸ Kala awui wungnaobingnala mathānthup eina yaruiwui vangla, pāngmonbingwui vangla, kala Levinaobingwui vangla chigata. Hilkiah, Zechariah, Jehiel, Khorumshimwui otva̱ akhokabingna makānkhami phanitwui vang pāngmonbingli yaonao eina menao thingkhani shātharuk, kala mukkā shākathum mi.

⁹ Kala Levishiwui wungva̱bing, chiya, Conaniah, Shemaiah kala achinā Nethanel, Hashabiah, Je-iel, kala Jozabad, athumna phanit chiwui vang Levinaobingli yaonao, menao thingphāngā, kala mukkā shāphangā mi.

¹⁰ Khangarān kupser kahai eina, pāngmonbingna kachichāwui pamli nganinga, kala Levinaobingnala awungawui kakaso thāda athumwui khum athishurda nganingsera.

¹¹ Kala athumna yao taithatlaga pāngmonbingna ashee khuida yikrorlakha, Levinaobingna taikathat chi ahui hema.

¹² Moseswui lairikli kapi kahai athishurda, avāva̱ ngarāwui shimkhur athishurda kharābingna Proholi chigat khavai rikkatāchigatsā ngateida phaishokmi. Kala mukkābingla taithatlaga chithāda phaishokmi.

¹³ Khangachā shiyan athishurda makānkhami yaosā chi meili ruiya, kathara kachigat chi ham, hampai kala khāng eina hanglaga yaruili totot yaomi.

¹⁴ Chiwui thili athumwui vangla, kala pāngmonbingwui vang athum khalattana ngarānkhui; kaja Aaronwui naomayara pāngmonbingna rikkatā kachigat kala athao kachigat ot ngayā eina tangda sai, chiwui vang Levinaobingna athum khalattawui kala Aaronwui naomayarabingwui vang hangkhamina.

¹⁵ Awunga Davidna kaso kahai athishurda laa kasābing, Asaphwui naomayarana ichichāwui pamli pamripa, kala Asaph, Heman, awungawui marān Jeduthun, kala ngavei khamayonbing ngavei kachida nganinga; athumna kachichāwui otpamli pamriphaoda Levinaobingna hangkhamina.

¹⁶ Awunga Josiahwui kakaso athishurda chithang makānkhami phanitwui vang, Prohowui hanphutli rikkatā kachigat chigat khavai khangarān saikora kupserhaowa.

¹⁷ Kala chili khalei Israelnaobingna makānkhami phanit chi sāda, khawok makazang zātkhān shinithang mayona.

¹⁸ Marān Samuelwui eina thuilaga hikathā makānkhami phanit Israelli mibingna mamayonlakrangsai. Josiahna thānda pāngmonbing, Levinaobing, kala chili kazang Judah saikora, Israel, kala Jerusalemli kapambingna khamayon thāda Israelwui awunga khipānakha makānkhami phanit masāsalakmana.

¹⁹ Josiahna mungda tharāda kachishata kum khamayonna.

Josiah Kathi

²⁰ Josiahna Khorumshim sākupser kahaiwui thili, Egyptwui awunga Necona Euphratesli khalei Carchemishli rai ngarar khavai vai. Chieina Josiahnala ali ngararkida angaroka.

²¹ Kha ana paophungme chihovāda hānga, “Judahwui awunga, ini akha eina akha khi rai sākhavai leikhala? Ina aja zimik nali ngararkida kharā maningmana, kha Varena iwui yangkasheli thaklāk eina angararlu kajiwui vang ali ngararkida kazatna. Ili ngasokhame Vareli khangasung thahaolu, ana nali shimān ngasakpaishina.”

²² Chithālala Josiahna awui eina mangareiungluila azak ngacheikhuilaga ngarar khavai vai. Varena Necowui manga eina hāngkhami tui ana manganāsangla Megiddowui tampākli rai khangarar pamli azanga.

²³ Kala malā kasingbingna Awunga Josiahli kapza̱haida ana awui raimibingli, “Ili khuithuihaolu kaja ili marlak eina khamā za̱haira” da hānga.

²⁴ Chieina raimibingna awui siguigari kakhanepāli sanglaga Jerusalemli khuiunghaowa. Kala ungthihaida avāva̱ ngarāwui chikhurli chifahaowa. Judah eina Jerusalem saikorana Josiahwui vang chapngachai.

²⁵ Jeremiahnala Josiahwui vang chapkhangachāli zanga; kala sha̱naobing, mayarnaobing kala laa kasābingna Josiahwui vang chapchāt laa kasā chi aja eina tangda lei. Athumwui laa chi Israelwui shiyan sāngasaka, kala yanglu, chapchāt laa lairikli kapiserhaida lei.

²⁶ Josiahwui otsak khangatatei, kala Prohowui ainli awui otsak khamathā kapisang kahai,

²⁷ kala awui kasāsā khare eina thuilaga khanao eina tangda, yanglu, saikora hi Israelwui kala Judahwui awungabingwui Lairikli kapiser haidalei.