2 THOTRINCHĀN 34 - Kathara Bible (BSI)

Judah Awunga Josiah

¹ Josiahna mungkaphok tharan a kum chishat kāshunghairasai, kala ana Jerusalemli kum thumrāda akha munga.

² Ana Prohowui miktāli khamashung chi sai, kala avāva̱ Davidwui shongzatli zatta uishongla yāshongla mangareithuimana.

³ Kum chishat mungda, nganuilak eina leilakha avāva̱ Davidwui Vareli phāphoka; kala tharāda kakhane kum Judah eina Jerusalemwui kajujuipam, Asherim, kala rukkakhui kala heikakhui meoma̱ saikora chiwui eina tharkhavai sai.

⁴ Awui mangāli athumna Baalwui hanphut shaokhai; kala chiwuitungli khalei nganamkaphā riktā khavai hanphutbing chi ana shaokhaitai; kala Asherim eina rukkakhui kala heikakhui meoma̱la akha̱ sāmihaida, chili pha̱kaphayābingwui chikhurtungli chairora.

⁵ Ana pāngmonbingwui ara̱kuila athumwui hanphuttungli riktāda Judah eina Jerusalemli kapambingli samathakhui.

⁶ Manassehwui, Ephraimwui, Simeonwui kala Naphtali vāshungda Israelwui keinungli khalalei,

⁷ hanphutpam, Asherim kala meoma̱ saikora akha̱ sāmihaowa, kala Israelli khalei nganamkaphā riktā khavai hanphutbing sātekmiserhaowa. Chiwui thili ana Jerusalemli latunga.

Ain Lairik Samkaphang

⁸ Ana mungda tharāda kachishata kum, lamla, shimla tharngasak kahai chitharan, Azariahwui naomayara Shaphan, keinungwui rammunga Ma-nasseh kala kazipsing, Joahazwui naomayara Joah, athumli Proho Varewui shim chipho khavai chihoi.

⁹ Athumna Jerusalemli kapambing, Judah eina Benjamin saikora kala Manasseh eina Ephraim saikorawui eina rākachigat pheisā khāmong khamayona Levinaobingna kazip kakhui chi pāngmon khareiya Hilkiahli khuirāmi.

¹⁰ Athumna pheisā chi Prohowui shim kasāli kashinabingwui pāngli horsangmi; kala athumna shim chiphoda samatha khavai ot kasābingli mimarona.

¹¹ Judahwui awungabingna chipār kahai shim chiwui thing, khangen lokhavaiwui vang ngalung kashānbing kala thing mistribingli mi.

¹² Athumna ningtongda ot sai. Kala athumli yangmi khavai Levipa Merariwui naomayara Jahath eina Obadiah, kala Kohathpashi Zechariah eina Meshullamli phāsanga. Levinaobingwui alungli sipa talla̱ khongkatheibing china,

¹³ khangava̱bingli yangmi, kala sāki kaji ot saikora athumna tamchithei. Leviwui mi kaikhava kakapi ot sai; kala kaikhana otva̱a, kala khangatei kaikhana shantri-kasā zanga.

¹⁴ Prohowui shimli rākachigat pheisā chi khuishokkhami tharan, Prohona Mosesli khami ain lairik chi pāngmon kharei Hilkiahna samphanga.

¹⁵ Chieina Hilkiahna kapime Shaphanli “Ain Lairik chi Prohowui shimli ina samphangahaira” da hānga, kala Shaphanli mihaowa.

¹⁶ Shaphanna lairik chi awungali khuiungmi; kala hithāda unghānga, “Nawui raobingli mikahai saikora saserda lei.

¹⁷ Prohowui shimli leikasā pheisā saikora khuilaga ot kasanao kala yangkhamebingli miserhaira.”

¹⁸ Chiwui thili kapime Shaphanna awungali hānga, “Pāngmon kharei Hilkiahna ili lairik akha mi.” Kala ana chi awungawui mangāli pāchithei.

¹⁹ Awungana ainwui tui chi kashā tharan ana awui kachon serkhāka.

²⁰ Kala Hilkiah, Shaphanwui naomayara Ahikam, Micahwui naomayara Abdon, kapime Shaphan, kala awungawui rao Asaiah, athumli kasoda hānga,

²¹ “Vada, iwui vang kala Judah eina Israelli leida khalei saikorawui vang samkaphang lairik hiwui hāngkahaiwui pongli angahānkhuilu; kaja lairik hili kapi kahai athishurda, ishāvā ngarāna makhamayonwui vang ithumwuitungli Prohowui malungkhavāt hakmahālakhaira.”

²² Chieina awungana kachihobingli ngasoda Hilkiahna Shallum preiva̱, marānpava̱ Huldahwuili vai. Hasrahwui nao Tokhathwui nao Shallumna khāmong-khamayona kasāwui vang (preiva̱̱ chi Jerusalemwui Second Quarterli pamsai) tui saikora ahāngsera.

²³ Marānva̱ china hānga, “Israelwui Proho Varena hithāda hānga: ‘Nathumli chihokharapa chili unghānglu,

²⁴ Prohona hithāda hānga, Yanglu, Judah awungawui mangāli pāchithei kahai lairikli kapi kahahai khonkashi saikora chi apam hiwuitungli kala mibingwuitungli ina khuirāra.

²⁵ Kaja athumna ili horhaida yur khangateiwui vareli nganamkaphā riktai; athumwui otsak saikora china ili malungvāt khangasak chiwui vang iwui malungkhavāt apam hili heitāda chi khavān mavaimara.

²⁶ Kha Prohowui tui nganā khavai nathumli kachiho Judahwui awungali unghānglu, Israelwui Proho Varena hithāda hānga: Nana shākahai tui hiwui pongli,

²⁷ khikhalajila nathumwui ningkhangateiwui vang kala ngalei hili kala hiwui mibingli makhamayā kashā eina Varewui mangāli nathumna hamkasang, kala iwui mangāli nathumna hamsangda kachon serkhaklaga kachapwui vang, inala shāmihaira da Prohona hānga.

²⁸ Yanglu, navā ngarāli ngasoda nana chingri eina chikhurli zangra, kala apam hili kala mibingwuitungli kalākashi kharā chi namik eina matheimara.’” Athumna tui chi awungali unghānga.

Josiahwui Tuingashit

²⁹ Chiwui thili awungana Judah eina Jerusalemwui khararnao saikorali ahokhuilaga kazip ngasaka.

³⁰ Kala khararnaosan mateila Judahwui mi eina Jerusalemli kapam mibing saikora pāngmonbing, Levinaobing, zangda Prohowui shimli awungana ngasokai; kala saikorana shākhavai Prohowui shimli samkaphang tuingashit lairik chi pāchithei.

³¹ Kala awungana Prohowui thi shurkhavai, awui ningkhami, shiyan-chikan, kala lairik chili kapi kahai tuingashit chi awui ningyāng tongda sārada awui pamli nganingkāda Prohowui mangāli tuingashit sai.

³² Chieina Jerusalem eina Benjaminwui mi chili leikasā saikorali chithāda sākhavai nganing ngasaka. Kala avāva̱ ngarāwui Varewui tuingashit athishurda Jerusalemwui mi saikorana sai.

³³ Kala Israelwui apam saikorali khalei ningkakachai ot saikora Josiahna chiwui eina khuithuimiserhaowa. Israelli khalei athum saikora athumwui Proho Vareli otram ngatha̱ ngasaka. Awui mirin peida athumwui avāva̱ ngarāwui Proho Vareli kashurwui eina mayāmlakmana.