2 THOTRINCHĀN 33 - Kathara Bible (BSI)

Judahwui Awunga Manasseh

¹ Manassehna mungkaphok tharan a kum tharāda khani kāshunghairasai, kala ana Jerusalemli kum hangphangāda phangā munga.

² Israel mibingwui mangāli Prohona kashamshok kahai yurbingna ningkakachai ot kasā chiwui thishurda anala Prohowui mikyanli makaphā ot chi sai.

³ Kaja avāva̱ Hezekiahna pheitāmi kahai kajujuipam ana sakāluishita, kala Baalli khorum khavai hanphut sakai; ana Asherahbingla sākhui, kala kazingramli khalei zimik kachāng sirāli khorumda otram ngatha̱ya.

⁴ “Jerusalemli iwui ming mashimānda leira” da Prohona hāngkahai apam Prohowui shimli ana hanphut sakai.

⁵ Proho shimwui yāngkhup khanili zimik kachāng sirāwui vang hanphut sakai.

⁶ Kala Hinnomwui naomayarawui tampākli anaomayarali chigata; kala khanong khayang, hāngkhamarān, leivā kashon, kazei kazang eina manglāli khangasan hikathāthāla sai.

⁷ Khorumshimli ana sākakhui meoma̱ chi haihai. Shim hiwui pongli Varena Davidli kala anaomayara Solomonli hānghaisai: “Israel shang saikorawui eina ina kapangkhui kahai shim hili kala Jerusalemli iwui ming mashimānda leichingra;

⁸ kala athumna iwui kakaso nganāda Mosesli hāngkahai; kakaso ain, shiyan chikan kala sharphahorbing saikora ning ngasharda mayontitakha, ina navā ngarāwui vang mikahai ngalei chiwui eina Israelwui phei maphatthuimiluimara.”

⁹ Manassehna Judah kala Jerusalemli kapam mibingli thānda; Israel mibingwui mangāli Prohona sāshimān kahai miyurbingli athumna makaphā makhayā henmeida sai.

Manassehna Ning Khangatei

¹⁰ Prohona Manasseh kala awui mibingli kahāng khipānakha makhuisangmana.

¹¹ Chiwui vang eina Prohona Assyriawui raimi kathānabingli khuirāda Manassehli tukkhuilaga mari huishon kala pithrai khanghui eina khalaplaga Babylonli khuivāhaowa.

¹² Chotchanglak kahai tharan awui Proho Varewui phaningkhami ngakaowa, kala avāva̱ ngarāwui Varewui mangāli akhalatta hamsangchaoluishita.

¹³ Ana Vareli seihā sai, kala ana shāmida awui kapo khuisangmi; kala awui wungram Jerusalemli khuiungmiluishita. Chiwui thili Prohohi Vare chilaka da Manassehna theikhui.

¹⁴ Chiwui thili ana David keinungwui ayārli ngavei akha sākai, Gihonwui zingtunshong tampāk eina thuilaga Khaih Ngavei zangkhavai eina Ophel kuikhuida savai, kala juilak eina ngaveikai; ana Judahwui raipan ngazipta sākahai keinung saikorali raimi kathānabing kahaila haivāsera.

¹⁵ Yur khangateibingwui varebing kala meoma̱ saikora Proho shimwui eina khuithuimihaowa, kala Prohowui kaphungli kala Jerusalemli hanphutpam sākahai saikora khuilaga keinung ayarli ahorserhaowa.

¹⁶ Ana Prohowui hanphut sāmathākhuida ningyatshar kala ningkashiwui kachigatla pha̱phayai; kala Judahli Israelwui Proho Vareli otram ngatha̱ khavai kasoi.

¹⁷ Chithālala mibingna athumwui Proho Varewui māngli majila kajujui apambingli pha̱phayai.

Manasseh Khamung Khangachang

¹⁸ Manassehwui kasā khavā kala awui Vareli ana seihā kasā, kala Israelwui Proho Varewui ming singda marānbingna ali hāngkhami tui saikora, yanglu, Israel Awungabingwui Thotrinchān Lairikli kapiserhaida leili.

¹⁹ Awui seihā kasā, Varena kathāda awui kapo khuisangmi, kala awui morei, mashitkasangwui pong, kala ana ning mangateiranglakha kajujuipam sakakā, Asherahli khokharum, meoma̱ sākakhui, saikora chi marānbingwui Thotrinchānli kapiserhaida lei.

²⁰ Chithāda Manasseh thihaoda awui keinungli chifahaowa; kala anaomayara Amonna awui mahut thuishina.

Judahwui Awunga Amon

²¹ Amonna mungkaphok tharan a kum maga̱da khani kāshunghairasai, kala Jerusalemli kum khani munga.

²² Avāva̱ Manassehna kasā thāda anala Prohowui mikyanli makaphā otmāng sai. Avāva̱ Manassehna sākakhui meoma̱ saikora chili anala pha̱phayāda athi shura.

²³ Avāva̱ Manassehna Prohowui mangāli ningngateida hamkasang chithāda masāla Amonna zakshikhamei morei sākhangai sai.

²⁴ Awui raobingna ali makhamayāwui vang ngathumda mithit khalen sangda awui shimli leilakha sāthathaowa.

²⁵ Kha awunga Amonli mithit khalen kasangbing chili yarui saikorana sāthathaowa; kala ngalei chiwui mibingna anaomayara Josiahli awui mahut awunga sanghaowa.