2 THOTRINCHĀN 32 - Kathara Bible (BSI)

Sennacheribli Khayui

¹ Otsakbing hi kala shitkasang tongda kasāwui thili Assyriawui awunga Sennacheribna Judahli rākaida raipan sākahai keinung chi khuikhavai rairum rāsahaowa.

² Sennacheribna Jerusalemli rai sākhavai rāhaira kaji Hezekiahna kathei tharan,

³ awui otva̱bing kala kapingbing athumli ngachamlaga keinungwui ayarli khalei ura̱ saikora phinmi khavai ngarāna; kala athumna ali ngachonmi.

⁴ Kala mi kachungkhana rākaziplaga “Assyriawui awungana rālaga khiwui vang tara̱ kachungkha samphang khavai leikhala?” da hānglaga ram chili khalong ura̱ kala kongwui tara̱ athumna phintitmihaowa.

⁵ Ana ningyāng tongtingda ot sāphokta phākho kakai chila chiphokhuiserda chiwuitungli mayon khavai tārongla sakai, kala ayarshong phākho khangatei sāsanga; kala David keinungwui Millola makangmei khavai sāsanga. Zeighai ngahāla changveila chungmeida sāsanga.

⁶ Kala raimi kathānabing phāsanglaga keinungwui ngavei ashat chili mi kachungkha kazip ngasakta ana yaruili kasatsangda hānga,

⁷ “Pingmeida sālu, lungsanmeilu. Assyriawui awunga kala awui raimi kachungkhaya da mangacheelu kala manganglu; kaja ali ngasokazatali ithumli ngasokhamena reimei.

⁸ Awui raimibinga asā khavai raimimānga; kha ithumli ngasokhame chiya ithumwui Proho Vare china, ana ngachonmida ithumwui rai ngararmira.” Judahwui awunga Hezekiahwui tui mibingna shāda ningluma.

⁹ Awunga Sennacheribna awui raimili ngasoda Lachishli kuinamlakha Judahwui awunga Hezekiahli kala Jerusalemli khalei Judahwui mibingli awui raobing chihovāda hānga,

¹⁰ “Assyriawui awunga Sennacheribna hithāda hānga, Jerusalem kuinamhaira, laga nathumna khipāli chihānkapamkhala?

¹¹ ‘Assyriawui awungawui pāng eina ithumwui Proho Varena kanmira’ da kahāng chi Hezekiahna nathumli ra̱chan-thaichām eina chithit khavai thānkhayon maningmala?

¹² Kajujuipambing kala hanphutbing sākazamhaida, ‘Nathum hanphut akhamāngli khorumra kala chiwuitungli pha̱phayāki kajina’ da Judah kala Jerusalemwui mibingli kakaso mi chi Hezekiah hi maningmala?

¹³ Ishāvā ngarānala, inala ngalei khangateiwui mibingli khi samihairakhala kaji nathum matheimala? Ngalei chibingli varebingna ipāngwui eina athumli kanmishaplakla?

¹⁴ Ishāvā ngarāna athumli sāshimānhaida khiyurbingwui varebingwui eina kanmihaida, nathumwui Varena nathumli iwui eina kanmirada kaphaningkhala?

¹⁵ Chiwui vang eina Hezekiahna nathumli kapikta hithāda mathānngui ngasakalu, kala ali mashitsangalu kaja yurwui kala wungramwui vare khipānakha ipāngwui eina kala ishāvā ngarāwui eina athumwui mibing kankhami maleilakmana. Chithākha nathumwui Varena kayākha samithukrakhala!”

¹⁶ Chili lāngda awui raobingna Proho Vareli kala awui rao Hezekiahli zeikazama.

¹⁷ Israelwui Proho Vareli khamashāt tui chithi einala kapida hānga, “Yur khangateiwui varebingna athumli makanmikharar thāda, Hezekiahwui Varenala awui mibingli ipāngwui eina kachilikha makanmirarlakmara.”

¹⁸ Kala Jerusalemnaobing ngaveitungli kapambingna shāser khavai Judahwui tui eina panglāk eina vaokai; hāngmachitlaga keinung khuikhavai kasāna.

¹⁹ Kala pāng eina sākakhui okathuiwui miyurbingwui varebingwui pongli khamatui thāda Jerusalemwui Varelila hāngkatāpa.

Hezekiahli Huikhami

²⁰ Chieina awunga Hezekiah eina Amoswui nao Isaiah marānna Vareli hiwui vang eina seihā sāda kazingramli vaokai.

²¹ Kala Prohona kazingrao akha chihotāda Assyria awungawui rai kapingabing, raimi kathānabing, kala rairumwui otva̱bing shaothattuphaowa. Chiwui vang awungana maishilak eina aramli latunghaowa. Kala ana awui varewui shimli kazang tharan anaomayara kaikhana raighai eina shātthathaowa.

²² Chithāda sāda Hezekiahli, kala Jerusalemwui mibingli, Assyriawui awunga Sennacheribwui eina kala awui yangkashebingwui eina Prohona kanmi; kala ana achikun kachiva̱li khangasām samphang ngasaka.

²³ Kala mi kachungkhana Proho wui vang Jerusalemli lemmet khuirāmisera, kala Judahwui awunga Hezekiahlila aman kasaka ot khuirāmiserda yur saikorawui mangāli hekmaheilak eina okthuihaowa.

Hezekiahli Kakazā

²⁴ Chitharan Hezekiah kazāda thiki jihaowa, kala ana Proholi seihā kasā eina ngahānkāmida khamachut akha chitheimi.

²⁵ Kha Hezekiahna ali sākhami chiwui vang awui ningkashi maleithuwa kaja awui ningli langsohaowa. Chiwui vang, Jerusalem, Judah kala awuitungli malungvāthaowa.

²⁶ Kha Hezekiahla kala Jerusalemli kapam mibingla athumwui langsot ningwui eina hamsangluishit kajiwui vang Prohowui malungkhavāt chi Hezekiahwui atamli matāngasakthuwa.

Hezekiahwui Kashāng-kharei

²⁷ Hezekiah shāngshun kala khayāla kāshunhaowa; lan kazipshim kachungkha sākhui; luāpāsā, sinā, aman kasak ngalung, nganamkaphā otyur, chāngvei, kala aman kasasak khorkhong haikhavaila;

²⁸ zātshim, drakhāra̱ eina thao; kala seishim, yaoshimla kachungkha sha̱keiwui vang sākhui.

²⁹ Chithāda sāda akhalattawui vang keinungla sākhui; kala yao ashangva̱, sha̱kei mavātla leisai kaja Varena ali kachungkha ngavā ngasaka.

³⁰ Gihonwui atungshong longkashoka tara̱ phinhailaga David keinungwui zingtunshong longvā khangasaka chi Hezekiah hipāna. Hezekiahna awui kasāsā saikora mataikasang samphanga.

³¹ Kala ngalei chili chitheikhami sākahai chiwui pongli ngahānkhui khavai Babylonwui eina mi chihokharā chile, awui kaphaning saikora theikhavai kala ali tamyang khavai Varena awunga akhalattali phaningkhui ngasakhaowa.

Hezekiahna Khamung Khangachang

³² Hezekiahwui kaphā kasā otsak, kala awui kasāsā saikora, yanglu, Amozwui nao Isaiah marānwui phongkhami lairikli, kala Judah eina Israelwui Awungabingwui Lairikli kapiserhaida lei.

³³ Hezekiah thihaida Davidwui naomayarabingwui chikhurpamwui ashanli chifahaowa. A kathi atamli Judah saikora kala Jerusalemli kapam mibingna khayāshilak eina sāmi. Kala anaomayara Manassehna awui mahut thuishina.