2 THOTRINCHĀN 29 - Kathara Bible (BSI)

Judah Awunga Hezekiah

¹ Hezekiahna mungkaphok tharan a kum maga̱da phangā kāshunghairasai. Kala ana Jerusalemli kum maga̱da chiko munga. Ava̱va̱wui ming Abijah hoi, Zechariahwui naongalāva̱na.

² Avāva̱ Davidna kasā saikorawui athishurda anala Prohowui mangāli khamashung otmāng sai.

Khorumshim Sākhamathā

³ Ana mungphok kum kachāng khareli Prohowui shim khāmong shoda chi chiphokhui.

⁴ Ana pāngmon eina Levinaobingli hokhuilaga zingshoshongwui kayāngli kazipta hānga,

⁵ “Levinaobing, nganālu! Nathum khalatta tharmathenglu, navā ngarāwui Proho Varewui shimla tharmatheng ngasakta katharapamwui eina khamakhao khuishokserhaolu.

⁶ Kaja ishāvā ngarāna mashitsangmada ithumwui Proho Varewui mikyanli makaphā sāhaira; ali horkahaila horhaida Prohowui eina athumwui mai ngareithuihaira.

⁷ Khorumshimwui zangkhavai khāmongla shungnamhaida thaomeila masharmana; Israel Varewui katharapamlila nganamkaphā ot mariktāmana, chili lāngda rikkatāchigatla machigatmana.

⁸ Chiwui vang Judah eina Jerusalemli Prohowui malungkhavāt tāngasaka, kala nathumna kathei thāda khangachee khangachā, matakhak kahai kala mana̱shi khavai miyur ngasā ngasaka.

⁹ Kaja yanglu, ishāvā ngarā raili thiserhaira, naongalāva̱ ngarā, naomayara ngarā, kala preiva̱ ngarāla tukthuiser kahai chi hiwui vangna.

¹⁰ “Israelwui Proho Varewui malungvātshun kahai chi ithumwui eina khuithuimi khavai tuingashit akha sākhavai iningli phaninghaira.

¹¹ Inao mayarabing, paida maphaningalu; kaja Prohowui mangāli nganingda otram ngatha̱ khavai kala awui vang nganamkaphā ot riktā khavai nathumli kapangkhui kahaina.”

¹² Chieina Levinaobingna ngakarthuiuwa; Amasaiwui naomayara Mahath, Azariahwui naomayara Joel, athum hi Kohath shimkhurwui naomayarabingna; kala Merari shimkhurwui eina Abdiwui naomayara Kish eina Jehallelelwui naomayara Azariah; Gershom shimkhurwui eina Zimmahwui naomayara Joah, kala Joahwui naomayara Eden;

¹³ Eli-zaphan shimkhurwui eina, Shimri eina Jeuel; Asaph shimkhurwui eina, Zechariah eina Mattaniah;

¹⁴ Heman shimkhurwui eina Jehuel eina Shime-i; kala Jeduthun shimkhurwui eina Shemaiah eina Uzziel.

¹⁵ Athumna achinā ngarāli kazipkhuida tharmathengkhui kala Prohowui tui awungana kakaso athishurda Prohowui shim sāmathā khavai zanga.

¹⁶ Pāngmonbingna sāmathā khavai Prohowui shimwui alunga kāli zanga, kala Prohowui katharapamli leikasā khamakhao saikora khuishokta Prohowui shimwui yāngkhupli khuishoka; kala chi Levinaobingna khuilaga Kidron kongli ahorserhaowa.

¹⁷ Athumna kachāng kharewui kharethang ot sāphoka, kala kachishatathang Proho wui shimli zangkhavai chi sāmathaphoka; kala chishatthang Prohowui shim sāmathai, kala kachāng khare chiwui tharāda katharukathang kupserhaowa.

Khorumshim Dharkat Kākhalui

¹⁸ Kuphaida athumna awunga Hezekiahli ahānga, “Prohowui shim saikora, rikkatāchigatwui hanphut, chiwui khongphei khongphāng, maiyan khamui haikhavai table kala chiwui khongphei khongphāngla ithumna sāmathāserhaira.

¹⁹ Awunga Ahazna munglakha, mashitsangmada horkahai saikora ithumna tharmathengkhuiserhaira; kala yanglu, chibing chi Prohowui hanphut mangāli haihaida lei.”

²⁰ Chieina awunga Hezekiahna ngathorthakva̱, keinungwui otva̱bingli kazipkhuiserda Prohowui shimli kai.

²¹ Athumna mukvā shini, yaovā shini, yaonao shini kala mevā shini wungramwui vang, kathara shim kala Judahwui vang suihamshar sākhavai khuirai. Kala Prohowui hanphutungli chigat khavai ana pāngmon Aaronwui naomayarabingli kasoi.

²² Chieina athumna mukkābing chi taithatta pāngmonbingna ashee chi khuida hanphutli yikrora; athumna yaovābingla taithatta ashee hanphutli yikrora; kala yaonaobing chila taithatta athumwui ashee hanphutli yikrora.

²³ Chiwui thili suihamsharwui vang mevābing chi awunga kala kazipta khaleibingwui mangāli khuirāda athumna chiwuitungli pāng parsera,

²⁴ kala Israel saikorali pheomi khavai pāngmonbingna shaothatlaga ashee chieina hanphutungli suihamchigat sai. Kaja rikkatāchigatla, suihamchigatla Israel katongawui vang sālu da awungana kaso kahaina.

²⁵ Kala ana Levinaobingli, kortar, tingteilā, lyre singda Prohowui shimli David awunga kala awungawui marān Gad kala Nathan marānna kakaso athishurda chipama, kaja kakaso chi Prohona awui marānbingli rāhāng ngasaka.

²⁶ Levinaobingna Davidwui tingteilā chi sing kala pāngmonbingna talla̱ singriplaga nganinga.

²⁷ Chiwui thili Hezekiahna hanphutungli rikkatāchigat chigat khavai kasoi. Rikkatāchigat rikkaphok tharan Proholi masotlaala sāphokuwa, kala Israel awunga Davidwui tingteilā eina talla̱ ngasoda sauwa.

²⁸ Rakakazip katongana khokharum tharan laa kasābingna laa sai, talla̱ kakhongbingna talla̱ khonga; rikkatā chigat makupranglakha eina tangda chithāda sai.

²⁹ Kachigat ot kupkahai eina awungala, leikasā mi saikorala ngakhumshāmhaida khorumsera.

³⁰ Awunga Hezekiah eina wungnaobingna, Levinaobingli David eina marān Asaphwui laa chieina ngasoda Proholi masotlaa sākhavai kasoi. Athumna masotlaa mathānthup eina sāda khokharumla khoruma.

³¹ Chieina Hezekiahna hānga, “Ara nathum khalatta Prohowui mangāli tharchigathaira; rānganailu, pha̱kaphayā ot kala ningkashichigatla Prohowui shimli khuirālu.” Chieina kazipta khaleibingna pha̱kaphayā kala ningkashi kachigatla khuirai; kala mikhangaibingna rikkatāchigatla khuirai.

³² Rakakazipbingna rikkatāchigatwui vang khuikharā mukkā hangshini, yaovā shākha, yaonao shākhanina; saikora hi Proholi rikkatāchigat sākhavaina.

³³ Pha̱kaphayāwui vang tharchigat kahai mukvā shātharuk kala yao thingkathum kāshunga.

³⁴ Kha pāngmonbingna teona kahaiwui vang rikkatāchigatwui sā saikora ahui mahemrarthuda, pāngmon kateibing matharmathengranglakha, achinā ngarā Levinaobingna ot chi makupranglakha eina tangda ngachonmi, kaja katharwui otsakli Levinaobingna pāngmonbingli ning ngatarmei.

³⁵ Mahāngkharar rikkatā kachigatli lāngda, ningyatchigatwui athao, rikkatāchigatwui vang kharektā khavaila leisai. Chithāda sāda Proho shimwui otram khangatha̱li khangachā tākam eina chisinluishita.

³⁶ Varena mibingwui vang sākhami, mataimeikapta thaklāk eina samathākakhuiwui vang Hezekiahla, awui mi katongala ringphāshunhaowa.