2 THOTRINCHĀN 27 - Kathara Bible (BSI)

Judah Awunga Jotham

¹ Jothamna mungkaphok tharan a kum maga̱da phangā kāshunghairasai, ana Jerusalemli kum tharāda tharuk munga. Ava̱va̱wui ming Jerush hoi, Zadokwui naongalāva̱na.

² Avāva̱ Uzziahna kasā thāda anala Prohowui miktāli khamashung ot chi sai—avāva̱wui thāda Prohowui shimmāngli mazangmana. Kha mibingna makaphā ot sāchingpapama.

³ Prohowui shim atowui ngavei ana sakai, kala Ophelwui phākho kachungkha sāsanga.

⁴ Chili lāngda, Judahwui kaphungramli keinung kachungkha sakai, ngahongli raipanla, mayon khavai dolanla sākhui.

⁵ Ammonnaobingwui awungalila ngararlaga ana yuikahai eina Ammonnaobingna chikum lupāsā kg. thingkathum shāmati, kehu, ton thingkha kala nāpai ton thingkha da mi. Kakhane kala kakathuma kumla, Ammonnaobingna chi tākam eina milui.

⁶ Jothamna awui Proho Varewui tui makailak kajiwui vang pangkhangai panghaowa.

⁷ Jothamwui kasā khavā, ana rai khangarar, kala awui acham aram, saikora Israel eina Judahwui Awungabingwui Lairikli kapiserhaida lei.

⁸ Ana mungkaphok tharan kum maga̱da phangā kāshunghairasai, kala Jerusalemli kum tharāda tharuk munga.

⁹ Jotham thikahai eina avāva̱ ngarāli ngasoda Davidwui keinungli chifahaowa; kala anaomayara Ahazna awui mahut thuishina.