2 THOTRINCHĀN 25 - Kathara Bible (BSI)

Amaziahna Khamung

¹ Amaziahna mungkaphok tharan a kum maga̱da phangā kāshunghairasai, kala Jerusalemli kum maga̱da chiko munga. Ava̱va̱wui aming Jeho-addan hoi Jerusalemlāna.

² Prohowui miktāli ana khamashung ot chi sai, kha ning tharchao majimana.

³ Kala wungpam rungshing kahaiwui thili avāva̱li sākathata awui raobing chili ana sāthathaowa.

⁴ Kha Prohona kaso kahai Moseswui ain lairikli, “Naowui vang avāva̱li masāthatpaimana, avāva̱wui vang naoli masāthatpaimana, kha mi kachiva̱ kachichāwui khayonwui vang thiki kajina” da kapi kahai athishurda anaongarāli masāthatmana.

⁵ Chiwui thili Amaziahna Judahwui mibingli kazipkhuida avāva̱ ngarāwui shimkhurbingwui athishurda thingthing kala shāshāwui kathānabingwui azingli Judah eina Benjamin saikorawui vang ngarānmihai. Kum maga̱ kala chiwui atung saikorali shānkhayang eina, zeighai singkathei, chāngvei phungkathei, raili vākapai mi lakh kathum leisai.

⁶ Kala Israelwui eina kapingpinga mi lakh akhali lupāsā kg. thingkathum shāmati mida masākhui.

⁷ Kha Varewui mi akhana ali rāhānga, “O awunga, Israelwui raimi nali mangasoranu, kaja Israel kala Ephraimnaobingli Varena mangasomimana.

⁸ Kha athumli ngasolaga nana rai yuira da phaningakha nali yangkashebingwui pāngli horsangmihaora; kaja Varena ngachonmikashap kala horhaikashap pangshap lei.”

⁹ Amaziahna Varewui mi chili hānga, “Thākha Israel raimi khamasāwui vang lupāsā kg. thingkathum shāmati ina mikahai chi kathāura?” Varewui mi china hānga, “Chili chungmeikharda Prohona nali mishapa.”

¹⁰ Chieina Amaziahna Ephraimwui eina kharā raimibing chili shimli shiunluihaowa. Kala athumna Judahli malungvātsir shim hanunghaowa.

¹¹ Kha Amaziahna malung khanamkhuida awui mibingli thānda Machi Tampākli vai kala Seirli mi thingtharā sāthata.

¹² Judahwui mibingna khangatei thingtharā tukkhuilaga lunghārtungli khuikāda chiwui eina hortāda zangshirthatserhaowa.

¹³ Kha raili Amaziahna mathanvāla shiun kahai raimibing china Judahwui keinungli Samariawui eina thuilaga Beth-haron shangshungda chili khalei mi thingkathum sāthatlaga otla kachungkha ngaponthuihaowa.

¹⁴ Edomnaoli sākathatwui eina hankhaung thili Amaziahna Seirnaobingwui varebing khuiungda awui vare ngasāda chili khoruma, kala kachigatla chigata.

¹⁵ Chiwui vang Prohona Amaziahli malungvāthaida ana marān akha chihovāda hānga, “Napāngwui eina athumwui mibingli mangatangkhuikharara mibing chiwui vareli khokharum khiwuivang khala?”

¹⁶ Kha ana hāngmahunglakha awungana hānga, “Awungawui machinme sākhavai nali ithumna phāsangla? Thahaolu! Nali khiwui vang sāthat sarakhala?” Chieina marān china thāhaowa, kha hithāda hānga, “Nana hikathā ot kasāwui vang kala iwui hāngkachithei makakhuiwui vang Varena nali shimān khavai sāhaira kaji ina thei.”

¹⁷ Chiwui thili Judahwui awunga Amaziahna ngasankhuilaga, Jehuwui naomayara, Jehoahazwui naomayara Joash, Israelwui awungali pao chihovāda, “Ralu, ini ngasunrai sāsa” da ahāng ngasaka.

¹⁸ Awunga Joashna Judahwui awunga Amaziahli pao chihovāda hānga, “Lebanonwui ka̱shatrongna Lebanonli khalei cedarthingli ‘Nanao ngalāva̱li inaomayarawui preiva̱̱ sākhavai milu’ ji; kala Lebanonwui ramsāna rākānda ka̱shātrong chi naithathaowa.

¹⁹ Nana hānga, ‘Yanglu, ina Edomli yuihaira,’ da nawui ningna nali langso ngasaklakhaira. Kha ara shimli kasaikha pamlu; na kala nali ngasoda Judahla kongluirum khavai khisāda reokhuirakhala?”

²⁰ Kha Amaziahna manganāsangmana; kaja athumna Edomwui vareli kaphaningwui vang yangkashebingwui pāngli horsangmi khavai hi Varewui khangarānna.

²¹ Chieina Israelwui awunga Joash eina Judahwui awunga Amaziahna Judahwui Beth-shemesh raiphungli mik mai ngaphanlak eina ngarara.

²² Kala Israelna Judahli yuihaida kachāyām eina shimli yāmunghaowa.

²³ Ahaziahwui naomayara, Joashwui naomayara, Amaziah Judahwui awungali Israelwui awunga Joashna Beth-shemeshli tukkhuilaga Jerusalemli khuiunga; kala Jerusalemwui phākho, Ephraim ngavei eina thuilaga Achithek Ngavei khuining shāmati shaokhaitāmihaowa.

²⁴ Kala ana sinā kala lupāsā saikora kala Varewui shimli leikasā khorkhong saikora, kala Obed-edomla zangda khuithui haowa; chili lāngda awungawui lanla, mila, khuida Samariali khuiunghaowa.

²⁵ Israelwui awunga Jehoahazwui naomayara Joash thikahaiwui thili Judahwui awunga, Joashwui nao Amaziahna kum tharāda phangā ringvai.

²⁶ Amaziahwui kasāsā saikora khare eina thuilaga khanao eina tangda Judahwui kala Israelwui Awungabingwui Lairikli makapiserhaimala?

²⁷ Ana Prohowui eina ngareikathui eina thuida Jerusalemli khalei athumna awuitungli ngathumda ngakuka, chieina ana Lachishli yāmvāhaowa. Kha chili kharomvāda asāthathaowa.

²⁸ Athumna sigui eina phungunglaga avāva̱ ngarāli ngasoda Davidwui keinungli ungchifahaowa.