2 THOTRINCHĀN 24 - Kathara Bible (BSI)

Judahwui Awunga Joash

¹ Joashna mungkaphok tharan a kum shini kāshunghairasai, kala ana Jerusalemli kum hangmati munga. Ava̱va̱wui ming Zibiah hoi, Beershebalāna.

² Jehoiada pangmona ringlakha eina tangda Joashna Prohowui miktāli khamathā otmāng sai.

³ Jehoiadana awui vang apreiva̱ khani khuisangmida sha̱naola mayarnaola pharai.

Judahwui Awunga Joash

⁴ Hiwui thili Joashna Prohowui shim sāmathākhuilui khavai sai.

⁵ Kala ana pāngmon eina Levinaobingli kazipkhuida hānga, “Judahwui keinungbingli vāda Israel saikorawui eina nathum Varewui shim chiphokhui khavai kum kum eina pheisā ngashaikhuilu.” Kha Levinaobingna yansānghaowa.

⁶ Chiwui vang awungana Jehoiada pāngmon khareili hokhuida hānga, “Prohowui rao Mosesna tuingashit kachonshimwui vang Israelwui yaruili shai kakhui chi Judah eina Jerusalemwui mibingwui eina Levinaobingna khuikhavai khisāda makasothukhala?”

⁷ Kaja makaphā preiva̱, Athaliahwui naongarāna Varewui shimli sakhaizangda; Prohowui shim chili khalei tharchigat kahai thongthāng saikorala Baalli khorum khavai savaihaowa.

⁸ Chiwui vang awungana kasoda athumna lupā sangkhavai oko akha sākhui kala Prohowui shim khāmongli haihai.

⁹ Kala lamhāngli leilakha Proholi mikhangayi shai miphalungrada Mosesna hāngkahai athishurda Judahli kala Jerusalemli khalei saikorali pao chishāta.

¹⁰ Wungnaobingla, mibing saikorala mathānthathup eina oko chi mapemranglakha eina tangda rāchigata.

¹¹ Okobing chili pheisā chunghaira da kathei tharan kala Levinaobingna awungawui otva̱bingli khuivākhami tharan, awungawui kapimeli ngasoda pāngmon khareiwui otva̱na pheisā heikhuilaga apam chili ahailuilui ji. Chithāda athumna thongthāng pheisā kachungkha ngashaikhui.

¹² Awunga eina Jehoiadana pheisā chi Prohowui shimli otkasā kathānabingli mida athumna ngalung mistrila, thing mistrila phāsanga; kala athumna Prohowui shim chiphoda sākhuilui khavai mari sākathei, pithrai sākathei mi kachungkha phāsanga.

¹³ Chieina otkasābing china ot sāda shim kachiphowui ot chi mangā vāda athumna Khorumshim chi khangachāwui tākam eina sākhuilaga shim chi ngazipmei ngasaka.

¹⁴ Shim chi sākup kahai tharan, athumna pheisā katai chi awunga eina Jehoiadali khuirāmi, kala pheisā chieina Proho shimwui otram ngatha̱ khavai kala rikkatā chigat khavai khorkhong sāsanga, kala nganamkaphā thao riktā khavai sinā eina lupāsāwui khongphei khongphāng sākhui. Kala Jehoiada ringlakha eina tangda athumna Prohowui shimli rikkatā kachigat sāchinga.

¹⁵ Kha Jehoiada kasāngkha okthuida sarlak eina thiya; awui kathi atamli kum shākha thumrā kāshunghairasai.

¹⁶ Athumna ali Davidwui keinungli awungabingli ngasoda chifahaowa, kaja ana Israelwui vang, Varewui vang kala awui shimkhurwui vang kapha sāmihaisai.

¹⁷ Jehoiada thikahaiwui thili Judahwui wungnaobingna awungali khayākashi vāmi; kala ana athumwui kapo khuisangmi.

¹⁸ Kala athumna avāva̱ ngarāwui Vare Prohowui shim horhaida, Asherim kala meoma̱bingli otram ngatha̱haowa. Morei hiwui vang Judah eina Jerusalemli Varena malungvāthaowa.

¹⁹ Chithālala Proholi ungluishit khavai ana marānbingli chihovai; athumwuitungli makhamayā hāngchithei, kha athumna makhuisangmithuwa.

²⁰ Chieina Varewui manglāna Jehoiadawui naomayara Zechariahli singda, ana mibingwui mangāli nganingda hānga, “Varena hithāda hānga, ‘Kachiwui vang eina nathumna Prohowui ningkhami manganāmakhala, nathum mareisangpaimara kajiwui vangla? Nathumna Proholi horkahaiwui vang anala nathumli horhaira.’”

²¹ Kha athumna ngathumda ali mithit khalen sangda awungawui kakaso athishurda Prohowui shim yāngkhupli ngalung eina horthathaowa.

²² Hithāda Zechariahwui avāva̱ Jehoiadana Joash awungali lukhamashan chithei kahai chi ana maphaningungla anaomayarali sāthathaowa. Ana hithāda hāngthi, “Prohona theida athut khuimiranu!”

Joashwui Khamung Khangachang

²³ Kum chiwui apeilam Syriawui raimina Joashli ngarar khavai rai. Athumna Judah eina Jerusalemli rākaida chiwui wungnaobing saikora sāthatserhaowa, kala raili ngaponkakhui saikora Damascuswui awungali chiphunvai.

²⁴ Syria raimi kateokhamang rālala Prohona raimi kachungkha athumwui pāngli horsangmi, kaja athumna avāva̱ ngarāwui Proho Vareli malaihaowa. Chithāda sāda Joashwuitungli athumna bichar sāmihaowa.

²⁵ Khamā marlak eina za̱mihailaga Syrianaobing thuikahai eina, Joashwui raobingna ngathumda mithit khalen sālaga Jehoiadawui naomayarali ashee tākhangasakwui vang, alila pettungli shaothathaowa. A thikahai eina Davidwui keinungli chifahaowa, kha awungabingwui chikhurli machifamana.

²⁶ Ali ngathumda mithit khalen kasangbing chi: Ammonpava̱ Shime-athna kapharā Zabad eina Moabpava̱ Shimrithna kapharā Jehozabadna.

²⁷ Joashwui naomayarabingwui pongli kala awuitungli kaphong, kala Varewui shim sākākhalui saikora hi Awungabingwui Lairikli kapiserhaida lei. Anaomayara Amaziahna awui mahut thuishina.