2 THOTRINCHĀN 2 - Kathara Bible (BSI)

Khorumshim Sākā khavai Khangarān

¹ Solomonna Proho mingwui vang Khorumshim akha, kala awui konung akha da sākā khavai ngarāna.

² Kala Solomonna ot phung khavai mi thinghangshini, ngalung phuk khavai mi thinghangchishat, kala chili kashina athum thingkathum shātharuk phāsanga.

³ Kala Solomonna Tyrewui awunga Huramli pao shivatta hānga: “Ishāvā Davidli awui shim sākhavai nana cedarthing khami thāda ilila khamilu.

⁴ Yanglu, ithumwui Proho Varewui mingwui vang ina awui mangāli nganamkaphā thao riktā khavai shim chi tharchigatlaga thangkachida maiyan khamui chikatching khavai, ngathor ngazin, sabbaththang, changwokthang, kala ithumwui Proho Varena langchin sākahai Israelwui vang katang mavaila tharchisin kahahai phanit mayon khavai shim akha sākhuisi kajina.

⁵ Ina sāki kaji hi shimkhokna, kaja vare saikorali ithumwui Varena reimeithuiya.

⁶ Kha kazingram, juimeikap kaja kazingramla ana mapamchangakha awui vang khipāna shim samithukrakhala? Awui mangāli anganam riktā khavai apam maningla, I khipāda awui vang shim sakāmirarrakhala?

⁷ Chiwui vang eina sināwui, lupāsāwui, pithraiwui, mariwui, kala kahunga, hungrisi, khamateka kashankachon sākatheiya, kala ruksang katheiya mi akha kachihoramilu; ana ishāvā Davidna ngarānsang kahai Judah eina Jerusalemli khalei ili ngasokapam kathemabing eina ngasoda ot sāngarum khavaina.

⁸ Cedar, cypress kala algum thingla Lebanonwui eina kachihorāmilu, kaja nawui mibing thing kata̱ themlaka kaji ina thei. Iwui mibing nawui mibingli ngaren khavai

⁹ kaja thing mavātlakla ngarānsang khavai chihorāka, ina sāki kaji shim chi hakkhamahā tekhamatei shim akhara.

¹⁰ Ina nawui mi thing kata̱ kala thing kasābingwui vang kehu rungkahai ton thingkhani mira, nāpai ton thingkhani mira, drakhāra̱ liter lakh mati mira, kala olive thao liter lakh mati da mira.”

¹¹ Chieina Tyrewui awunga Huramna Solomonli chithi eina ngahānkāda hānga, “Khikhalajila Prohona awui mibingli leikashiwui vang athumli mungkhavai nali awunga sāngasakhaira.”

¹² Huramna hithādala hānga, “Kazing eina okathui sākhuida Awunga Davidli thangkhamei naomayara mida; ali phaningkhui kathei kala theithangkhamei ngarumsangmida Prohowui vang khorumshim kala awui vang awunga konung sākhavai sokhame Israelwui Proho Vareli sochikatranu.

¹³ Chiwui vang Huramabi kaho them-kathemapa hili ina chihokharāna,

¹⁴ avāva̱ Tyrewui mina kala ava̱va̱ Danwui sha̱naona. Sinā, lupāsā, pithrai, ngalung, thing, kala hungreoseo, khamayinga, hungping kahai khamanaka tāwon kachon, hikathāthā sātheiser kaja mina. Navā ishāmei Davidwui themkathembingli ngasoda, ama yekkasang nilala, aphor phorkasang nilala kakasoso saikora sākhavai kachihona.

¹⁵ Chiwui vang ishāmeina hāngkahai thāda kehula, nāpaila, thaola, drakhārala naraobingli kachihorāmilu;

¹⁶ nawui sāvaiki kaji chiwui athishurda ithumna Lebanonwui eina thing renmira kala Joppali marikhong eina khuitāmira, chithāda nana Jerusalemli khuiungpaira.”

Khorumshim Sākākaphok

¹⁷ Avāva̱ Davidna mishān shānkahaiwui thili, Solomonna Israelwui lamli khalei kha̱mibing saikora mishān shānngasaka, kala chili lakh-akha thinghangphangāda kathum shātharuk leisai.

¹⁸ Thinghangshinili ana ot phung ngasaka, thinghangchishatli kaphungli ngalung phukngasaka, kala thingkathum-shātharukli yangkhame sāngasaka.