2 THOTRINCHĀN 19 - Kathara Bible (BSI)

Marānna Jehoshaphatli Khamachin

¹ Jehoshaphatna hapkakhano maleilakla aram Jerusalemli latunga.

² Kha Hananiwui nao marān Jehuna asamphangda Jehoshaphatli hānga, “Makaphā-makhayā mili nana ngachonda Proholi yangkakharinga chili leishirala? Hiwui vang nawuitungli Prohona malungvāthaira.

³ Chithālala nawuili kaphā leidalei, kaja nana Asherahbing chi sākhayāngmiserhaida nawui wuklungna Vareli phai.”

Jehoshaphatwui Khangachei Khuikharā

⁴ Jehoshaphatna Jerusalemli pama; kala Beersheba eina thuida Ephraimwui kaphungrambing chi vāshungda athumwui avāva̱ ngarāwui Proho Varewuili thanungmi.

⁵ Judahwui raipan sākahai keinung saikorali bichar sākhamebing phasangmiserda athumli hānga:

⁶ “Nathum khisarakhala da phaningkazaklu, kaja nathumna miwui vang bichar kasā maningmana, kha Prohowui vang sākhamina; bichar atamli ana ngasomira.

⁷ Chiwui vang Vareli khangachee nathumwuitungli leiranu; nathumna khi sālikhala kaji ningngasharlu; kaja ithumwui Proho Varewuili mashun thānkhangui maleimana; mijangla maleimana, pheizāla maleimana.”

⁸ Chili lāngda, Jerusalemwui alungli tui kashoshok Proho mingli bichar sāmi khavai kala tuitak khuimi khavai Levibingwui einala, pāngmonbingwui einala kala Israelwui wungva̱wui einala bichar kasā mi phāsanga. Kala athumwui pamkhavai Jerusalemli ngarānmi.

⁹ Ana athumli kasoda hānga, “Hithāda nathumna ningtonglak eina shitsangchaoda Proholi khangachee eina sālu:

¹⁰ Keinungli khalei nachinā ngarāwui eina, ashee katāwui vang nilala, ningkhami nilala, ain nilala, ningkhami kala ain lah shiyan-chikanbingwui pongli nathumli khuikharā tharan nathumna Prohowui mangāli khangui ot sāda awui malungkhavāt matā khavai hāngmachinlu. Chithāda sāda nathumna morei masāmara.

¹¹ Kala yanglu, Prohowui otkasali pāngmon kharei Amariah nathumwuitungli leili; Ishmaelwui naomayara, Zebadiah lammungana Judah shimkhur awungawui otsak saikorawuitungli yangmida lei; kala nathumli ngachon khavai Levinaobing leili. Pingmeida sālu, khamashunga chili Prohona ngasomira!”