2 THOTRINCHĀN 16 - Kathara Bible (BSI)

Israel Kakhanang

¹ Asana mungda thumrāda katharuka kum, Israelwui awunga Baashana Judahli rai ngarara. Kala Judahwui awunga Asali mi khipākha mavāpai kala maungpai khavai, Ramahli ngaveiphinhaowa.

² Chieina Asana Prohowui shimli kala awungawui shimli kahai lupāsā eina sinala khuilaga Syriawui awunga Ben-hadadli mikhavai Damascusli chihovāda hānga,

³ “Navā eina ishāvā khamashit thāda inila mashit khavai lupāsāla, sinala chiphunkharāna; yanglu, Israelwui awunga Baashana ili rai masā khavai, nani mamashitluialu.”

⁴ Ben-hadadna awunga Asawui tui nganāda awui raithānbingli chihoi, kala athumna Israelwui keinung Ijon, Dan, Abel-maim, kala Naphtaliwui lan kazip khavai keinungbing yuikhui.

⁵ Tui chi kashā eina Baashana Ramah masākāluila ot ngasām ngasakhaowa.

⁶ Chieina Awunga Asana Judahwui mibingli hokhuiserlaga Baashana Ramah sakā khavai ngalung, thing, haikasā saikora apongkhuilaga chieina Geba eina Mizpah sakāvai.

Marān Hanani

⁷ Atam chili marān Hananina Judahwui awunga Asali rāhānga, “Khikhalajila nawui Proho Vareli machihamla Syriawui awungali kachihamwui vang, Syriawui raimibing yāmshokhaira.

⁸ Ethiopiashi eina Libyashi siguigarila siguiraimila sorkhangasai marāmala? Kha nana Proholi kachihamwui vang nawui pāngli horsangmi.

⁹ Kaja Proholi ningtharlak eina kaphaningbingli awui pangshap chitheimi khavai awui mik okathui kuimareida kapeishang kapeitai. Hichangli na mangma̱lak eina sāhaira; kaja ara na rai ngararchingra.”

¹⁰ Asana malungvātnahaida marān chili zurthing sanglaga narhai. Chili lāngda mi khangateilila Asana kachotkachāng mi.

Asawui Khamung Khangachang

¹¹ Asawui kasāsā, khare eina thuilaga khanao eina tangda Judahwui kala Israelwui Awungabingwui Lairikli kapiserhaida lei.

¹² Ana mungda thumrāda kachiko kum Asawui apheili kazāda marlakhaowa; kazālala Proholi maphāla khanongbingwui eina khangachon phai.

¹³ Mungda zingkum hangmatida akha kāshungkum thihaowa.

¹⁴ Ana Davidwui keinungli sākahai awui chikhur chili chifahaowa. Nganamkaphā thao kala otyur kachungkha manatlaga sākazak kahai kathipetli chipethaida athumna khayākashiwui meifa shātrunga.