2 THOTRINCHĀN 11 - Kathara Bible (BSI)

Shemaiahwui Khamarān

¹ Rehoboamna Jerusalemli khaung tharan, Judah eina Benjaminshili kazipkhuisera; kala Israelli ngararlaga Rehoboamwui wungram hankhui khavai rai kapingbing lakh akha thinghangchishat kapangkhui.

² Kha Varewui mi Shemaiahli Varewui tuina rāhānga:

³ Solomonwui nao Rehoboam, Judahwui awunga kala Judah eina Benjaminli khalei Israel saikorali ahānglu:

⁴ “Prohona hithāda hānga, Nachināngarāli rai ngarar khavai mavālu. Hi ina khangarānna, kachichā shimli ungserulu.” Chieina athumna Prohowui tui khuisangda Jeroboamli ngarar khavai mavāla hanunghaowa.

Rehoboamwui Raipan

⁵ Rehoboamna Jerusalemli pamda rairim sākhavai Judah ngaleili keinung kachungkha sakai.

⁶ Chiya: Bethlehem, Etam, Tekoa,

⁷ Beth-zur, Soco, Adullam,

⁸ Gath, Mareshah, Ziph,

⁹ Adoraim, Lachish, Azekah

¹⁰ Zorah, Aijalon, kala Hebron, keinungbing hi Judah eina Benjaminwui ngaleili sākakāna.

¹¹ Raipanbing hi ngaziplak eina ana sākālaga raithānbingli shinngasaka, kala apam chili kashakazā, thao, drakhātheira̱ hikathāthā kaziphai.

¹² Kala keinung saikora chili changveila kazeila haihaida mangatha̱ khavai sai. Chithāda ana Judah eina Benjaminli munga.

Pāngmon Levi Judahli Kharā

¹³ Israelwui ngachaili leikasā pāngmonpashila Levipashila apam saikorawui eina awuili rāzangsera.

¹⁴ Kaja Levibingna athumwui ngalei, athumwui leikasā chihohaida Judah eina Jerusalemli rāhaowa, khikhalajila Jeroboamshi vānao ngarāna Levibingli Prohowui pāngmon sāda otram ngatha̱ kasāwui eina kashamserhaowa;

¹⁵ kala kajujui apambingli ana sākakhui, satyrwui vang, kala seinaowui vang akhalatta pāngmon phāsangphaphai.

¹⁶ Israelwui Proho Vareli ningtongda kaphaning Israel shang saikorana Jerusalemli phāvāda, athumwui avāva̱ ngarāwui Proho Vareli pha̱phayai.

¹⁷ Athumna Judahwui wungram ngazipmei ngasaka, kala Solomonwui naomayara Rehoboamli kum kathumwui vang yansāngsa̱ pānngasaka, kaja athumna kum kathumwui vang David eina Solomonwui kasākhavā thāda okthuisai.

Rehoboamwui Shimkhur

¹⁸ Rehoboamna Davidwui naomayara Jerimothwui naongalāva̱, Jessewui naomayara Eliah preiva̱ Abihailna kapharā naongalāva̱ Mahalathli preiva̱ sāda khui;

¹⁹ ana Jeush, Shemariah, kala Zaham athumli pharai.

²⁰ Awui thili Absalomwui naongalāva̱ Maacahli khuida ana Abijah, Attai, Ziza, kala Shelomith, athumli pharai.

²¹ Apreiva̱ kala angashirva saikorawui ngachaili Rehoboamna Absalomwui naongalāva̱ Maacahli leishimeithuiya (apreiva̱ tharāda chishat kala angashirva hangtharuk da khui, kala mayarnao maga̱da chishat, naongalāva̱ hangtharuk da pharai);

²² Maacahwui nao Abijahli achinā ngarāwui eina Rehoboamna wungva̱ kapangsanga; kaja ali awunga sāngasak khavai phaninga.

²³ Kala ana themlāk eina naomayara kaikhali raipan sākahai Judah eina Benjamin ngaleili khalei keinung apam saikorali yartāda pamngasaka; athumli kashakazā mavātlakla ngarānmi, kala athumwui vang preiva̱ ngarā phāsangmi.