2 THOTRINCHĀN 1 - Kathara Bible (BSI)

Solomonwui Seihā Kasā

¹ Davidwui naomayara Solomonna awui wungram akhalattana ngaziplak eina sakai, kala Proho awui Varena ngasomida ali pangshap leilak kahai akha sāngasaka.

² Awunga Solomonna, raimi thing-thing kala shāshā kathānbing, shorkarwui otva̱bing, shang-shangwui wungva̱bing, kala mi saikorali,

³ ali ngasoda Gibeonwui khorum khavaipamli kākhavai kasoi. Athumna chili khavā chi Prohowui rao Mosesna lamhāngli sākakhui Varewui kazip khavai kachonshim chi apam chili leikasāwui vangna.

⁴ (Kha Prohowui oko chiya Davidna Jerusalemli kachonshim khankahai chili haihai khavai Kirith-jearimwui eina akhuihairasai).

⁵ Chili lāngmeida Hurwui ara̱, kaja Uriwui naomayara Bezalelna semkakhui pithraiwui hanphut chila Prohowui tabernacleli leichingsai. Kala Solomon eina yarui ashangva̱ china Proholi ngakaowa.

⁶ Kachonshimwui khorum khavai Prohowui mangāli khalei pithrai hanphut chili Solomonna kāda rikkatā kachigat thingkha chigata.

⁷ Chithang ngayā Varena Solomonli rāchitheida hānga, “Ina nali khi mirakhala polu.”

⁸ Solomonna ngahānkai, “Ishāvā Davidli nana hakkhamahā makhangachei leikashi chitheihaira, kala awui mahut ili awunga sāngasakhaira.

⁹ O Proho Vare, ishāvā Davidli ngashitmi kahai chi ara ungshungmilu, kaja okathuiwui chifali ngayāda khalei mibingwuitungli nana ili awunga sāngasakhaira.

¹⁰ Mibing hiwui mangāli khangashok khangakhang theishapa ili thangkhamei kala kathem milu, kaja hiyākha hakkhamahā nawui mibingli khipāna mungrarrakhala?”

¹¹ Varena Solomonli hānga, “Nawui ningli hithāda phaningda, nana lanla, sinā lupāla khangamkhareila mapomana, yangkashibingli athut khuikhavaila maphaningmana, okpeimei khavaila mapomana, kha iwui mi hiyākha khalei hili mungshap khavai theithangkhamei kala kathem kapowui vang,

¹² nali thangkhamei eina kathem mihaira. Chili lāngda ina nali kashāngla, lanla, khangamkhareila ina ngarumsangmira; nawui mangāli leikasā awungabing hithāda khipākha maleiranga, kala nawui thilila hithāda akhala maleimara.”

Sigui kala Siguigariwui Leihkhalon

¹³ Chieina Solomonna Gibeonwui kajuipam, khorum khavai kachonshimwui eina Jerusalemli latunga, kala Israelwuitungli munga.

¹⁴ Solomonna siguigarila, siguiraimila kazipkhui; awui siguigari thingkha shāmati kala sigui raimi thingtharāda khani leisai, athum chi siguigari keinungli ngayarda kala kateibinga awungali ngasoda Jerusalemli hai.

¹⁵ Awui atamli Jerusalemli sinā eina lupāsā ngalung singkhanganao thai, kala cedarthingla Shephelahwui sycamorething thāda sorngasaida singngasaka.

¹⁶ Egypt kala Kuewui eina Solomonna sigui alokhui, awui leih kasābingna aman mida Kuewui eina siguibing chi samphanga.

¹⁷ Athumna Egyptwui eina siguigari akhali lupāsā shātharuk mi, kala sigui akhali lupāsā shākha hangphangā mida khuiunga. Chi tākam eina athumna Hitnaobingwui awunga kala Syriawui awungabinglila yorsanga.