2 SAMUEL 8 - Kathara Bible (BSI)

Davidwui Wungram Hakkasang

¹ Hiwui thili Davidna Philistinenaobingli yuihaida munghaowa, kala Davidna Philistinenaobingwui eina Metheg-ammah ngapaikhui.

² Kala ana Moab yuikhui, kala Moabwui mibingli pareng sālaga ngaleili pizang ngngasaka; pareng khani shaothat khavai, kala pareng akha chihomi khavaina. Kala Moabwui mibing Davidwui rao sahaoda shai chigata.

³ Zobahwui awunga Rehobwui naomayara Hadadezerna awui lam Euphrates kongli hankhui khavai khavā atamli rai sāda Davidna yuihaowa.

⁴ Kala Davidna awui eina sigui katong mi thingkha kala shāshini, kala raimi thingmaga̱ da ngapaikhui; kala Davidna siguigari shākha shimen khavai sigui taihailaga khangateibing chiya aphei sātekmiserhaowa.

⁵ Kala Damascuswui eina Syrianaobingna Hadadezerli ngachon khavai kharā eina, Davidna Syrianaobing thingmaga̱ sāthathaowa.

⁶ Chieina Davidna Damascuswui Aramli raimi chipamhaowa; kala Syrianaobingla Davidwui rao sathuihaida shai chigata. Kala Davidna khavāpam kachida Prohona yuingasaka.

⁷ Kala Davidna Hadadezerwui raobingli sināwui chāngveibing chi Jerusalemli khuiung ngasaka.

⁸ Kala Awunga Davidna Hadadezerwui keinung, Betah kala Berothaiwui eina pithrai kachungkha khui.

⁹ Hadadezerwui raimili Davidna yuihaira da kashā eina, Hamathwui awunga Toina anaomayara Joramli,

¹⁰ Awunga Davidli shālam kala ringkaphā hāngkhavai chihovai, khikhalajila ana Hadadezerli ngararlaga yuihaowa. Kaja Hadadezer eina Toi rai sangarokchingsai. Kala Joramna sināwui ot, lupāsāwui ot, pithraiwui ot ali ngasoda khuivāmi;

¹¹ kala Awunga Davidna otbing chi khuida Proholi chigata, chieina ngasoda,

¹² Edomwui, Moab, Amon, Philistine, Amalek, kala Rehobwui nao Zobahwui awunga Hadadezerwui eina kakhui sinā lupā saikora Proholi chigata.

¹³ Kala Davidna akhalatta mingkhamayāng samphanga. Kala ana latkhaung atamli Machi Tampākli Edomnaobing thingtharāda chishat sāthata.

¹⁴ Kala Edomli Davidwui raimi chipama, Edomwui apampamli raimi chipamvāserhaida Davidwui rao sāhaowa. Kala Prohona Davidli ana khavā apam kachida yuingasaka.

Davidwui Otva̱bing

¹⁵ Davidna Israel katongali mungda mashun eina kala ngaraichā eina nganaomi.

¹⁶ Kala Zeruiahwui naomayara Joabna raimi saikorawui atungli yanga; kala Alihudwui naomayara Jehoshaphatna kapime sai;

¹⁷ kala Ahitubwui naomayara Zadok eina Abiatharwui naomayara Ahimelechna pāngmon sai; kala Seraiahna kapime sai;

¹⁸ kala Jehoiadawui naomayara Benaiah Cherethnaobing eina Pelethnaobingwui akhavā sai; kala Davidwui naongarābing pāngmon sāsera.