2 SAMUEL 3 - Kathara Bible (BSI)

¹ Saulwui shimkhur eina Davidwui shimkhur alungli kasāngkha rai sāngaroka. Kala Saulwui shimkhurna ngazankhangai ngazanda Davidna pangkhangai pangsanga.

Davidwui Nao Kapharā

² Hebronli pharākasang Davidwui naomayabing: awui naochizai Amnon, Jezreelwui Ahino-amna pharai;

³ kala kakhane, Chile-ab, Carmenli khalei Nabalwui ra̱meiva̱ Abigailna pharai; kala kakathuma Absalom, Geshur awunga Talmaiwui naongalāva̱ Maacahna pharai;

⁴ kala khamate Adonijahli Haggithna pharai, kala kaphanga Shephatiahli Abitalna pharai;

⁵ kala katharuka Ithre-amli Davidwui preiva̱ Eglahna pharai. Davidwui naobing hi Hebronli kapharāsera.

Abner eina Davidwui Tuingashit

⁶ Saulwui shimkhur eina Davidwui shimkhur rai sangarokta leilakha Saulwui shimkhurli Abner pangshap leilakhaowa.

⁷ Saulna Aiahwui naongalāva̱ Rizpah kahova̱li angashirva sāda leisai; kala Ish-boshethna Abnerli, “Kachiwui vang nana ishāvāwui angashirva̱li ngasopikhala?” da hānga.

⁸ Chieina Ish-boshethwui tui chi shālaga Abner malungvātshunhaida hānga, “I Judahwui fakuila? Aja eina tangda ina navāwui shimkhurli, achināngarāli, awui ngasotnaobingli khayākashi michinga, nalila Davidwui pāngli mahorsangmimana; laga nana ili aja sha̱naowui pongli phenphāphāda leili.

⁹ Varena Davidwui vang ngashit kahai chi ungshung khavai ina masāsi kaje, Abner ili Varena theiranu,

¹⁰ kala Saulwui shimkhur eina wungram khuithuihailaga, Davidwui wungram Israelli kala Judahli Dan eina haophokta Beer-sheba vāshungda semkāra.”

¹¹ Kala Ish-boshethna Abnerli tui khangatei mangahānkālengthuwa, khikhalajila ana Abnerli ngacheeya.

¹² Kala Abnerna Davidli paomebing Hebronli chihovai, kala hithāda hānga, “Ngalei hi khipāwuikhala? Na ili tuingashit akha sālu, kala yanglu, chithakha Israel saikora nali horsangmi khavai ina nali ngachonmira.”

¹³ Davidna hānga, “Phālaka, ina nali tuingashit sāra, kha nawui eina ina khuiki kaji akha leili; chiya, nana ili samphang khavai kharā chitharan, Saulwui naongalāva̱ Michalli rida makhuirakha ili masamphangpaimara.”

¹⁴ Chiwui thili Davidna Saulwui nao Ish-boshethli paomebing chihoda hānga, “Philistinenaobingwui ahui shākha manho sāda milaga kakhui ipreiva̱ Michal ili milu.”

¹⁵ Chieina Ish-boshethna, agahara Laishwui naomayara Palti-elwui eina Michalli vākhui ngasaka.

¹⁶ Kha agaharana chapsasui Bahurim eina tangda ali shurvai, chieina Abnerna, “Zatlu, hanungulu” da hānga kala ana hanunghaowa.

¹⁷ Kala Abnerna Israelwui khararnaobingli ngasanda, hānga, “Atam kasāngkha nathumna Davidli awunga sākhavai phai.

¹⁸ Chieina ara chiwui pongli khuirālu; kaja, Prohona Davidli hithāda ngashithaira, ‘Iwui rao Davidwui pāng eina iwui Israel miyurli Philistinenaobingwui eina kala yangkashe saikorawui eina ina kankhuimira.’”

¹⁹ Abnerna Benjamin shimkhurlila ngazeka; chiwui thili Israella Benjamin shimkhur katongala mayāhaira da Davidli hāngkhavai Abnerna Hebronli vai.

²⁰ Abnerna mi maga̱ thānphunglaga Davidwuili Hebronli khavā eina, Davidna Abner kala mibing chiwui vang zātkhān akha sai.

²¹ Kala Abnerna Davidli hānga, “Ina unglaga Israel katonga ishāmei awungawui mangāli kazipkhuira, chieina athumna nali tuingashit sāda ningkachāng athishurda saikorali nana mungra.” Chieina Davidna Abnerli chihohaida ana ringphālak eina zathaowa.

Joabna Abnerli Sākathat

²² Shāngsheilaga Joabna thānda Davidwui raimibingna kachungkha angaponkhuida ungrāsai. Kha atam chili Davidli ngasoda Abner Hebronli maleisāmana, kaja chingri eina chizathairasai.

²³ Joabna awui raimi saikorali ngasoda khaung eina, ali hithāda hānga, “Nerwui naomayara Abner awungawuili rai, kala awungana ali khikha mathālakla chingri eina ungngasakhaira.”

²⁴ Chieina Joabna awungali vāda ahānga, “Nana khi kasākhala? Yanglu, Abnerna nawuili rai; khiwui vang nana ali chiho kahaikhala?

²⁵ Nerwui naomayara Abnerna nali minam khavai kharāna kaji na matheikhala, kaja nawui khaung khavā kala kasākhavā saikora yangkhavai kharā maningmala?”

²⁶ Davidwui eina Joabna shoklaga Abnerli aho khavai paomebing chihovai; kala athumna Sirahwui ra̱khong eina ali houngluishita; kha Davidna khikha matheilakmana.

²⁷ Kala Abner Hebronli latungluishita, Joabna keinungwui ngaveipheili ngathumda angazek khavai thānvai; kala ana chili awukli toda, a thihaowa, kaja agato Asahelwui raithit hāngsangkakhuina.

²⁸ Naoda Davidna kashā eina, ana hithāda hānga, “Ila iwui wungramla Prohowui mangāli, Abner, Nerwui naomayara kathiwui asheeli khikha khangui maleilakmana.

²⁹ Hiwui kashong Joabwuitungli kala ashi avāva̱wui shimkhur tungli tāranu; kala Joabwui shimkhurli zaizai khangaya̱ nilala, phārrei kagazā nilala, khamā kaza̱ nilala, raighaina kathi nilala, kashakazā khavāt nilala, leichingranu!”

³⁰ Chithāda sāda Joab eina agato Abishaina Abnerli sāthata; khikhalajila Gibeonli rai ngararlakha agato Asahelli ana sāthathaowa.

³¹ Chiwui thili Davidna Joab kala chili leikasābing saikorali hānga, “Kachichāwui kachon serkhākta bora ngavailaga Abnerwui vang chapngachālu.” Kala Awunga Davidna kathi oko chili shurzata.

³² Athumna Abnerli Hebronli chifahaowa, kala Davidna Abnerwui chikhurtungli panglāk eina achapa, kala mibing saikorala chapsera.

³³ Kala awungana Abnerwui vang chapngachāda hānga, “Abnerla mangkhama̱na kathi thāda thirala?

³⁴ Napāngla makhalap, napheila zurthing masang; makhayāwui mangāli kongkhalui thāda na kongluihaira.” Kala latluida mi saikorana awui vang chapa.

³⁵ Kala mibingna Davidli ngashunshong phazā khavai suiya; kha ana, “Kalikha ina zimik matunranglakha zāt lah khikakha zaakha Varena ili theiranu” jihaowa.

³⁶ Kala mibingna chi theilaga ringphālakhaowa, kala awungana kasāsā chi yanglaga ningyāng unglaka.

³⁷ Chiwui vang mibingna kala Israel saikora, chithang Nerwui naomayara Abnerli sākathat hi awungawui ning eina maningmana da theikhui.

³⁸ Kala awungana awui raobingli hānga, “Israelwui lungli wungnao akha kala kahaka mi akha aja zimiksho shimānhaira kaji nathum theila?

³⁹ Thao neomihaida awunga sanglala aja I ngazanda lei. Zeruiahwui naomayarabing hi iwui vang pangnahaowa. Makaphā kasāpali awui makaphā athishurda Prohona athut khuinaora.”