2 SAMUEL 2 - Kathara Bible (BSI)

Davidli Awunga Kasang

¹ Hiwui thili Davidna Proholi, “Judahwui keinung khalaleili ina vāpairala?” da ngasana. Kala Prohona hānga, “Vālu.” Davidna, “Kachipāli vālu jikhala?” da khangahān eina, “Hebronli vālu” da ana hānga.

² Chieina Davidna preiva̱ khani Jezreelwui Ahino-am eina Carmelpa Nabalwui rameiva̱ anili ngasoda chili vai.

³ Kala Davidna ali ngayurkazatbing, kala athumwui shimkhur kachiva̱ khuivaserda athum Hebron keinungbingli asompama.

⁴ Kala Judahwui mibing rāda athumwuitungli awunga sākhavai, athumna Davidli thao neomi. Jabesh-Gileadwui mibingna Saulli kachifana da Davidli kahāng eina,

⁵ Davidna paomebing chiholaga Jabesh-Gileadwui mibingli hithāda hānga, “Nathumli Prohona somiranu, khikhalajila namei Saulli nathumna khayāshilak eina chifakhamiwui vang!

⁶ Ara Prohona awui ningtongda makhangachei leikashi nathumli tāshungmiranu! Kala nathumna khamathā ot sākahaiwui vang inala nathumli kaphā sāmira.

⁷ Chiwui vang eina nathum pangmeiranu kala pingmeiranu; kaja ara namei Saul thihaida Judah shimkhurna ili awunga sākhavai thao neomihaira.”

Saulshi eina Davidshi Khangarar

⁸ Chitharan Nerwui naomayara, Saulwui raithāna Abnerna Saulwui naomayara Ish-boshethli thānphungda Mahanaimli khuivai;

⁹ kala ana Gilead, Ashur, Jezreel, Ephraim, Benjamin kala Israel saikorawui awunga sanghaowa.

¹⁰ Saulwui naomayara Ish-boshethna Israelli khamung atamli zingkum hangmati kāshunghairasai, kala ana kum khani munga. Kha Judahwui shimkhurna Davidwui thi shura.

¹¹ Kala Davidna Hebronli awunga sāda kum shini kala kachāng tharuk munga.

¹² Nerwui naomayara Abner, kala Saulwui nao Ish-boshethwui raona Mahanaimwui eina Gibeonli vai.

¹³ Kala Zeruiahwui naomayara Joab, kala Davidwui raobingna Gibeonwui ra̱khongpamli asamphanga; akhashina ra̱khong akhavāk kala akhapāshina ra̱khong lākhavāk da pama.

¹⁴ Kala Abnerna Joabli hānga, “Yaronaobing ngakarthuida iniwui miktāli ngareoyangranu.” Joabna “Athumli sāyangranu!” da ngahānkai.

¹⁵ Chieina Ish-bosheth, Saulwui naowui vang Benjaminwui mi tharāda khani, kala Davidwui mi tharāda khani thuingalengriphaowa.

¹⁶ Kala athum kachichā ngazun akui singkhuiriplaga raighai eina tongatheida thitkha sāhaowa. Chiwui vang eina apam chili Helkath-hazzurim hoi, hi Gibeonli lei.

¹⁷ Kala chithangwui rai khangarar zakshilāka; kala Abner eina Israelwui mibingli Davidwui mibingna yuihaowa.

¹⁸ Kala chili Zeruiahwui naomayarabing, Joab, Abishai, kala Asahel, athum kathum zangsai. Asahel chaophei kathāk thāda thāka;

¹⁹ kala Asahelna Abnerli kharomvai, kala ana mikyan makhareilakla angatar eina kharomthuwa.

²⁰ Chieina Abnerna kapeiunglaga, “Na Asahella?” da ngahāna. “Mha, ina” da ana ngahānkai.

²¹ Abnerna ali hānga, “Uishong lah yāshong ngareivada, nawui kharomkapaili kharomvāda khangateili angaponkhuilu.” Kha Asahelna ali machiholakla kharoma.

²² Abnerna Asahelli hānglui, “Ili makharomalu, ina nali khisāda ngaleili pitā ngasakrakhala? Namei Joabli ina kathāda samphangkachangrakhala?”

²³ Kha ana mamayāthuda, Abnerna awukli zeimazo eina toda ngaruiwutmihaowa, kala saosang kahaipam chili thihaowa. Asahel saosangda thikahai rātheilaga chili anganingserhaowa.

²⁴ Kha Joab eina Abishaina Abnerli kharomvai; kala zimikna tunnanai athumna Ammahli vāshunga, chiya Gibeonwui lamhāngli vākhavai Giah vāshungnanailina.

²⁵ Benjaminnaobingna Abnerwui thi shurda kuimareiphinhaowa, kala kaphungton akhali kazipkha sāhaowa.

²⁶ Chiwui thili Abnerna Joabli hānga, “Raikhai eina katang mavaila sāthatpamrala? Akatanga chiya khālakra kaji na matheimala? Achinā ngarāli kakharom ngasām khavai nawui mibingli hāngnaorala?”

²⁷ Kala Joabna hānga, “Varena katheina,” kaja “kalikha nana mahāngsasi kaja ishi ngathorma eina tangda kharomki kajina.”

²⁸ Chieina Joabna talla̱ ̱ kakhong eina saikora ngasāmhaowa, kala khipākha Israelli makharomluithuwa, khangararla mangararluithuwa.

²⁹ Kala Abnerna awui mibingli ngasoda ngayā zatthailaga Arabahshong Jordan kānlaga ngashun pongda zatta Mahanaimli vāshunga.

³⁰ Joabna Abnerli kakharomwui eina latunga kala ana ashi mi kazipyangser kaji eina, Davidwui raimibing, Asahel mazangla mi tharāda chiko mapeisāthuwa.

³¹ Kha Davidwui raobingna Benjaminnaobing chiya Abnerwui mi shākathum hangtharuk sāthata.

³² Kala athumna Asahelwui angun khuiunglaga Bethlehemli khalei avāva̱wui chikhurli ungchifahaowa. Kala Joabna awui mibingli ngasoda ngayā zatthaida Hebronli kazing ungthanga.