2 SAMUEL 18 - Kathara Bible (BSI)

Absalom Kathi

¹ Davidna awui mi saikorali kazipkhuida thingthingwui kala shāshāwui kathāna phāsanga.

² Kala Davidna raimi akhum kathum sālaga, akha Joabli thānngasaka, akha Zeruiahwui nao Abishai Joabwui achinā, akha Gitpa Ittaili thānngasaka. Kala awungana raimibingli hānga, “Ila nathumli ngasoda vāra.”

³ Kha mibing china hānga, “Na marāpaimara; kaja ithum yāmhailala athumna khikhanada makhuimara. Ithum ngayarpak thihailala athumna khikhakhanada makhuimara. Kha nava ithum thingtharāli ngaraikachāna. Chiwui vang eina keinungwui eina ngachon khavai chihorākhamina phāmeira” da hānghaowa.

⁴ Awungana hānga, “Nathumna phāra kaji chi ina sāra.” Chieina raimibing thingthing, shāshā eina ngaherher eina shoklakha awungana ngavei ngalemli nganingpama.

⁵ Kala awungana Joab, Abishai kala Ittaili hānga, “Iwui mangā eina yarona Absalomli zakshida masāmialu.” Ana kahāng chi mi saikora shāsera.

⁶ Chieina raimibing china Israelli rai vāda Ephraimwui ngahongli angarara.

⁷ Kala Israel mibingli Davidwui mibingna yuihaida kachungkha sāthata, kala chithang mi thingmaga̱ thiya.

⁸ Rai chi aram ngalei vāpeida ngarara, kala raighai eina kathile ngahongli mankathatna chungmei.

⁹ Absalomna Davidwui raimili sampakhaowa. Chitharan Absalom awui siguili tongzatsai; kala shirimthing kahaka aphāng shālak kahai azingli siguina yongvāda akui shirimthingphangli huishipsanghaowa, awui siguiva yongchangthuihaida khamasaili a kangyuipamhaowa.

¹⁰ Kachikathā mi akhana atheida Joabli unghānga, “Yanglu, ina Absalom shirimthingli kangyuikapam thei.”

¹¹ Joabna mi chili hānga, “Kathāyi, nana ali theilakla! Theiakha khisāda ali masāthatthu? Nana sāthatsi kaje ina ringphālak eina nali lupāsā tharā kala shanneira̱ akha da mira.”

¹² Kha ana Joabli ngahānkai, “Lupāsā thingkhawui kharit miga jilala awungawui naomayarali kalikha eina tangda ipāng maparmara; kaja Abishai, Ittai nathumli awungana, ‘Iwui mangā eina inao Absalomli makārmilu’ da kahāng shāser kajina.

¹³ Khi kateikhada ina zakshilāk eina sathatkachanghaosi kaje (Awungana makathei maleimana) nava khikha matheimiluimara.”

¹⁴ Joabna hānga, “Nali ngazekta atam shimān khavaina.” Kala ana zeisa̱nao kathum yonkhuida Absalom shirimthingli hokthāngda mathiranglakha mathikli pharsangmiserhaowa.

¹⁵ Kala Joabwui chāngvei phungkhame athum tharāna Absalomli kuimareiphinda ali ngaphitsanghaowa, kala ali sāthathaowa.

¹⁶ Chiwui thili Joabna talla̱ kakhong eina awui raimibing Israelli makharomluila hanungserhaowa; kaja Joabna athumli khāmhaowa;

¹⁷ kala athumna Absalomli khuilaga ngahongwui akhur kahakva akhali horsanghaowa, laga lungkhor juilak eina khorphinhaowa; kala Israelnaobing kachichāwui shimli hanunghaowa.

¹⁸ Chitharan Absalomna ringlakha Awungawui Tampākli awui aming eina lungkhor akha khorhaisai; kaja ana “Inaomayara maleithuda iming phaningung khavaina” da hānga; ana lungkhor chili akhalattawui ming phokmi, kala aja eina tangda Absalomwui wonrā hochingda lei.

¹⁹ Chiwui thili Zadokwui nao Ahima-azna, “Yangkashebingwui pangshap eina Prohona awungali kanmihaira kaji pao hi ali unghang khavai ili ungngasakmilu” da hānga.

²⁰ Kha Joabna hānga, “Na aja pao hi maunghāngalu, kateithang unghāngnaolu, kha ajava na mahāngpaimara, kaja awungawui nao thihaira.”

²¹ Chieina Cushpa chili Joabna hānga, “Zatlu, nana kathathei chi awungali unghānglu.” Cushwui mi china Joabli kui mashunzangda yongunghaowa.

²² Chieina Zadokwui naomayara Ahima-azna hānglui, “Khikharanu, ili Cushpawui thili khaung ngasakmilu.” Joabna hānga, “Inaomayara, nana pao unghānglala sāman samphangki kajila maning, na khi ungsānikhala?”

²³ “Khikha-kha shokranu, iya ungura” da ana ngahānkāluiya. Chieina Joabna “Thākha ungulu” da kasoi. Chieina Ahima-azna tampākshong eina yongungda Cushpali rithuihaowa.

²⁴ Davidna ngavei khaniwui ngachaili pamda leisai; khamayona china phākhowui eina ngaveiwui shimtungli kālaga kākhangashān eina, mi akhamāng yongungrākasā thei.

²⁵ Kala khamayona china awungali vaozangda hānga. Kala awungana hānga, “Kalikhada amāngakha, ana pao khuiphungda leira.”

²⁶ Kala khamayona china khangatei akhala yongungrākasā theiluida khamayona china ngaveili vaozangda hānga, “Yanglu, khangatei akhala yongungrārāda lei.” Awungana hānga, “Ala pao khuikaphungra.”

²⁷ Kala khamayona china hānglui, “Yongzat kharepā hi Zadokwui naomayara Ahima-az thāli.” Awungana hānga, “A kaphā mina, paola khamathāmāng phungzata.”

²⁸ Chieina Ahima-azna awungali ungngavaoda hānga, “Phāshunhaira.” Kala awungali kui mashungzangda hānga, “Ishamei awungali khangararabingwui pāng eina kankhame nawui Proho Vareli ningshirali.”

²⁹ Kala awungana “Yarona Absalomli khikha mathāmala?” da ngahāna. Ahima-azna hānga, “Joabna narao ili kachiho tharan ngaunlop eina leiphunga, kha ina khikhala kaji matheithuwa.”

³⁰ Kala Awungana, “Chishong anganingsālu” kaji eina ana kasaikha anganinga.

³¹ Chieina yanglu, Cushpa chi ungrāsai, kala ana hānga, “Ishamei awungawui vang ringkaphā paona! Kaja nali makhamayābing saikorawui pangshap eina aja Prohona kanmihaira.”

³² Awungana Cushpa chili hānga, “Yarona Absalomli khikha mathāmala?” Ana ngahānkai, “Ishamei awungali yangshida makaphā sāki kajibing saikora yaronnao chikathā ngasāseranu.”

³³ Kala awunga ning chotnāhaida ngaveiwui pamkhavai chili kāda chaphaowa, kala ana zatmamānda “O inao Absalom, inao, inao Absalom! Nawui vang I mathikapai, O Absalom, inao, inao” da ana chapa.