2 SAMUEL 16 - Kathara Bible (BSI)

¹ David kaphungton kateokha kānthui kahai tharan, Mephiboshethwui rao Zibali samphanga; gadhā khanili khamuihang shākhani, drakhāthei amazān shākha, athei-arai shākha, kala drakhāra̱ sāhui khao eina shaksāmida khuiphungsai.

² Kala awungana Zibali, “Khisāda khuikharākhala?” da hānga, Zibana ngahānkai, “Gadha hi awungawui shimkhur tongkhavaina, kala khamui kala atheibing hi raimibingwui vang zākhavaina, kala drakhāra̱ hi lamhāng hili ra̱changnā kahaibingna mangkhavaina.”

³ Chieina Awungana hānga, “Nawui akhavāwui naomayara kali leili?” Zibana awungali hānga, “A Jerusalemli lei kaja ana hānga, ‘Aja Israelwui shimkhurna ishāvāwui wungram ili hanmiluira.’”

⁴ Chieina awungana, “Yanglu, Mephiboshethwui lan saikora chi ara nawui sāra.” Zibana hānga, “Ina khorumli; ishāmei awungana, nawui mikyanli ili ngahānkhangai samphang ngasakmichinglu.”

⁵ Awunga Davidna Bahurimli khavā tharan, Gerawui naomayara Shime-i kaho Saulwui shimkhurwui mi akha samphanga; ana rāda Davidli khonshi kazama.

⁶ Ana Davidli, kala David Awungawui mibingli ngalung eina thama; kathāna kala kapangabingna awunga Davidli uishong yāshong kuinama.

⁷ Kala Shime-ina khonshida “Makānkhana mi asheewui mi, thuihaolu, thuihaolu” da hānga.

⁸ Kala, “Saulwui pamli nana mungda, Saulwui shimkhurwui ashee tākahai saikora chiwui athut Prohona nawuitungli hāngsangkhamina; kala wungram chi nanaomayara Absalomwui pāngli mikahaina. Yanglu, sākakhayang chi nawuitungli lei; kaja na ashee tāngasak kahaiya mina.”

⁹ Zeruiahwui nao Abishaina, “Thikahaiya fa kathā mi hina ishāmei awungali khi sāda khonshi khavai leikhala? Ina vāda akui arangtāmihaoga” da awungali hānga.

¹⁰ Kha awungana, “Zeruiahwui naomayarabing iwui pongli khi hāngsang khavai leikhala? Prohona, ‘Davidli khonshilu’ da hāngakha, ‘Khisāda khonshikhala?’ da khipa hāngpaira?”

¹¹ Abishai kala awui rao saikorali Davidna hānga, “Yanglu, iwui naomayarana ili sāthat khavai phaakha, Benjaminwui mina kayākha sakmeida sāra! Aningkhānranu, ana khonshiranu; kaja Prohona kakasona.

¹² Iwui kachotkachāng hi Prohona theimida, ajawui khonkashi hiwui vang Prohona kaphā chi ili hanmipai.”

¹³ Davidli ngasoda awui mibingna shongfali zata, kha Shime-ina kaphungpei kāroda zatlaga ali khonshi mamānda ngalung einala leipā einala horkazama.

¹⁴ Kala awunga eina awui mi saikorana chotlak eina zatta Jordanli vāshunga; kala ana chili angasāmkhui.

¹⁵ Chitharan Absalom eina awui mi saikora, Israelwui mibing Jerusalemli ungzanga, chili Ahithophella ali ngasounga.

¹⁶ Kala Davidwui ngasotnao, Architpa Hushaina Absalomli asamphangda, “Awunga okpeimeiranu! Awunga okpeimeiranu!” da ahānga.

¹⁷ Kala Absalomna Hushaili hānga, “Ngasotnaoli khamashit hithāla? Khisāda nawui ngasotali mangasozatmakhala?”

¹⁸ Chieina Hushaina Absalomli hānga, “Maningmana; kaja Prohona kala Israelwui mi saikorana kapangkhui kahai chiwui mi sāphalungra, kala ina ali ngasopamra.

¹⁹ Chili lāngda, ina khipāli otram ngatha̱ra? Awui naomayarali maningmarala? Navāli otram khangatha̱ thāda nalila ngatha̱mira.”

²⁰ Chiwui thili Absalomna Ahithophelli, “Ithum khi sausi? Nawui theikhavā chi hānglu” da hānga.

²¹ Chieina Ahithophelna Absalomli hānga, “Shim mayon khavai haikahai navāwui angashirva̱bingli zangngasopilu; kala Israel saikorana shālaga navāli chinkāra, kala nali khangasobing pangsang ngasakra.”

²² Chieina athumna shimtungli Absalomwui vang kachonshim akha sākhuimi; kala Absalomna avāva̱wui ngashirva̱ ngarāli Israel saikorawui miktāli zangngasopi.

²³ Atam chitharan Ahithophelwui tui, mi akhana Vareli ngasanlaga khamatui thāda David eina Absalomnala saklak eina khuisai.